Vologd

Vologd (ven.: Во́логда) om lidn da lidnümbrik Venäman lodehpoles. Se om Vologdan agjan administrativine, tedoline da kul'turine keskuz. Mugažo lidn om Vologdan ümbrikon administrativižeks keskuseks, ei ole sen ümbrikon palaks.

Vologd
Вологда

Lidnanznam	Flag
Valdkund	Venäma
Eläjiden lugu (2023)	311,628 ristitud
Pind	116 km²
Pämez'	Jurii Sapožnikov (sügüz'ku 2016—)
Telefonkod	+7−8172-xxx-xxx
Avtokod	35
Aigvö	UTC+3 (MSK+0)

Lidnan shematine kart (2009)

Duman pert' lidnan keskuzpalas (2013)

Lidnan oficialižetoi nimi om «Verai Pohjoižmaha».

Istorii

Eländpunkt mainitase ezmäižen kerdan vl 1147 sekundarižiš purtkiš kuti Stroican jumalankodin alusenpanend. Aigan mändes nimitaškanzihe lidnad jogen mödhe. Lidn alištui Uz'lidnan Tazovaldkundale vhesai 1456 formaližikš, tora Tverin, Vladimiran i Moskvan oigenuziden keskes jätksi 13. voz'sadaspäi. Vozil 1566−1822 Vologdan kremlin seinäd oliba olmas, nimitihe sidä mugažo Nason-lidnaks (ven.: Насон-город).

Vodel 1782 Vologd linni Vologdan gubernijan keskuseks. Vspäi 1937 Vologd om Vologdan agjan administrativižeks keskuseks.

Nened ižandusen sarakod oma šingotadud Volodgas: tarkoiged mašiništonsauvomine, transportmašinoiden tehmine (trolleibusad, avtod likkumha teita, libutimed, vagonoiden kohenduz), torguind (agjan läz pol't), sömtegimišt (lihakombinat, maidkombinat, kaks' leibtegint, konditerine fabrik, keitišen i mineralveden edheotandad) i kompjuterprogramiden sarak. Kaikiš järedambad edheotandoišpäi oma Vologdan pörutügitegim i Vologdan optiž-mehanine tegim.

Geografijan andmused

Lidn sijadase agjan keskuzpalan suves, Venäman pohjoižes, 120 m ü.m.t. keskmäižel korktusel. Vologd seižub ühtennimižen jogen molembil randoil.

Matkad Moskv-pälidnaspäi om 450 kilometrad pohjoižpolehe, Piterišpäi om 650 km päivnouzmha. Lähembaižed lidnad oma Gräzovec 42 km suvhe «Holmogorid»-avtotedme (M8) vai raudtel, Sokol 42 km pohjoižhe avtotedme vai raudtel i Kadnikov 40 km pohjoižpäivnouzmha M8-avtotedme.

Klimat om ven kontinentaline, sän arvoimižed vajehtudas paksus. Voden keskmäine lämuz om +3,1 C°, kezakun-elokun +14,7..+17,5 C°, tal'vkun-uhokun −8,4..−10,7 C°. Ekstremumad oma −47,1 C° (viluku) i +36,4 C° (eloku). Kezaaigan minimum om −3,1 C° (kezaku), tal'vaigan maksimum om +8,5 C° (tal'vku). Ei voi panda halad heinkus vaiše (minimum +1,2 C°). Paneb sadegid 566 mm vodes, enamba kezakus-elokus (68..76 mm kus), vähemba uhokus-sulakus (26..31 mm kus). Tal'veližen sezonan hätkeližuz voib sadas vidhe polenke kuhusai. Il'man vozne keskmäine relätivine nepsuz om 80 %.

Tobmuz

Vologdan lidnümbrik om kaikiš suremb agjas eläjiden lugun mödhe — 320 702 ristitud vl 2017. Moločnoje-žilo (7 690 rist. vl 2017) mülüb lidnümbrikho mugažo. Se om ümbärtud Vologdan rajonan territorijal kaikiš polišpäi.

Lidnan pämez' om Jurii Sapožnikov vn 2016 sügüz'kun 26. päiväspäi. Käskusenandai tobmuz om Lidnan Dum 30 ezitajanke, valitas heid 30 üks'mandatižes valičemižümbrikos. Ezitajiden valdatusiden strok om viž vot. Duman ühtnijoiden järgenduseližed valičendad oliba vn 2019 8. päiväl sügüz'kud, edeližed vn 2014 14. päiväl sügüz'kud.

Radonoigendai tobmuz om Lidnan administracii, kogoneb seičemes departamentaspäi. Lidnan administracijan pämez' (mer) radab sen ohjandajaks. Vologdan mer om Sergei Voropanov vn 2017 kül'mkun 23. päiväspäi. Departamentoiden pämehed oma lidnan meran varapämehikš. Edeližed merad oma Andrei Travnikov (kül'mku 2016 — reduku 2017), Jevgenii Šulepov (kül'mku 2008 — sügüz'ku 2016).

Eläjad

Vl 1897 lidnan eläjiden lugu oli 27 705 ristitud, vl 1939 — 95 314 ristitud. Vn 2010 Venäman rahvahanlugemižen mödhe lidnan eläjiden lugu oli 301 755 ristitud, lidnümbrikon — 309 290 ristitud. Kaikiš suremb lidnan ristitišt oli 313 012 eläjad vl 2017 i 313 944 eläjad vl 2021. Kaik 320 702 ristitud elihe kaikes lidnümbrikos vl 2017.

Rahvahad (2010, ozutadud rahvahudenke): venälaižed — 97,3 %, toižed rahvahad — 2,7 %.

Ortodoksižen hristanuskondan 88 pühäpertid oma kaičenus täuzin vai paloin i saudud lidnas: Pühän Jumalanmaman Sündundan kafedraline päjumalanpert', Hristan Eläbzdusen päjumalanpert', Jumalan Sofija-melevuden päjumalanpert', Spasan Prilukin Dimitrijan mez'jumalankodi (päjumalanpert', kuz' jumalanpertid i časoun'), Pühän Hengen mez'jumalankodi (päjumalanpert', jumalanpert'), Emäganpäivän naižjumalankodi (kaks' jumalanpertid), 53 jumalanpertid, seičeme kodijumalanpertid, 13 časounäd. Spasan Armahtajan päjumalanpert' ei ole kaičenus. Protestantizman uskojiden tulendad oma lidnas: katoližen jumalankodikundan, baptizman, seičemenden päivän adventistoiden. Islaman Al'-Džuma-pämečet' om saudud vll 1998−2001.

Professionaližen opendusen aluzkundad oma 12 kolledžad, raudtetransportan i mašinansauvomižen tehnikumad, üläopendusen aluzkundad: Vologdan valdkundaline universitet, Vologdan oiktusen da ekonomikan institut (Venäman UTFR), severz'-se filialoid (Valdkundaližen radnikoičendan akademii, Moskvan valdkundaline juridine akademii), Vologdan hengeline seminarii.

Transport

Avtobusad, trolleibusad (üks'jäine maršrut nomer 4) da taksid oma kundaližeks transportaks lidnas. Lidn om järedaks raudte- da avtotesol'meks Venäman lodehes. Vspäi 2003 avtoümbärte om saudud lidnas.

Federaline civiline Vologd-lendimport (VGD / ULWW / ВГД, 9,5 tuh. passažiroid vl 2019) sijadase lidnan pohjoižröunanno, kümnes kilometras pohjoižhe keskusespäi. Sišpäi tehtas reisid Moskvha, Piterihe, Surhe Ustügha da Čerepovecha.

Tetabad sündnuded

• Varlam Šalamov (1907−1982) — oli Nevondkundaližen Ühtištusen prozan kirjutai da runokirjutai.

Sebruzlidnad

• Vaugedvenäma Grodno, Vaugedvenäma (vn 2011 kül'mkuspäi)
• Suomenma Kouvol, Suomenma (vn 2010 uhokuspäi)

Partnörlidnad

• Bolgarii Burgas, Bolgarii (vn 2012 semendkuspäi)
• Francii Elankur, Francii (vn 2010 kezakuspäi)
• Kitai Intan', Czänsi, Kitai (vn 2018 semendkuspäi)
• Vaugedvenäma Mogilöv, Vaugedvenäma (vn 2014 elokuspäi)
• Francii Strasburg, Francii (vn 2009 tal'vkuspäi)

Sebruzlidnad enččes

• AÜV Londonderri, Nju Gempšir, AÜV (1990-nded voded)
• Mad'jaranma Miškol'c, Mad'jaranma (1990-nded voded)
• Alamad Zvolle, Alamad (1990-nded voded)

Galerei

• 
  Lidnan administracijan pert' (merii, 2014), eziauguižešti «Ermitaž»-adivpert'
• 
  Vologdan Kremlin südäimes (2007)
• 
  Spasan Prilukin Dimitrijan mez'jumalankodi vl 2010
• 
  Vologdan optiž-mehanine tegim vl 2010
• 
  Nägu päivlaskmha lidnan röunanno,
  RIO-torguindkeskuz i Vologdan pörutügitegim oma tagamal (2011)
• 
  Vologdan valdkundaližen universitetan üks' openduzsauvusišpäi (2009)
• 
  Vologdan oiktusen da ekonomikan institut (2010)
• 
  «Vologd»-sportpert'kulu (2011)
• 
  Vologdan muzejan pala — Arhijerein ezitanhan Gavriilan korpus (2009)
• 
  Transportiž-logistine keskuz Babuškinan torgul: avtostancii (huralpäi kuvan taga), Vologd I-päraudtestancii, počtamt (2009)

Irdkosketused

• Lidnan Duman oficialine sait (duma-vologda.ru). (ven.)
• Lidnan Administracijan oficialine portal (vologda.gosuslugi.ru). (ven.) (angl.)