Sosnovii Bor (lidn, Leningradan agj)

Sosnovii Bor
Сосновый Бор
Lidnanznam;	Flag;
Valdkund	Venäma
Eläjiden lugu (2023)	64,121 ristitud
Pind	71,98 km²
Pämez'	Mihail Voronkov; (reduku 2019—)
Telefonkod	+7−81 369-xx-xxx
Avtokod	47
Aigvö	UTC+3 (MSK+0)

Sosnovii Bor (ven.: Сосно́вый Бор, vepsäks kangaz «hongišt»- vai «pedajik»-znamoičendanke, est.: Sosnovõi Bor, suom.: Sosnovyi Bor) om Venäman lidn da lidnümbrik Leningradan agjan päivlaskmas. Vspäi 2006 se om üks'jäine alištui agjan tobmudele oikti lidn.

Istorii

Eländpunktan aluz om pandud vl 1958 kuti radnikžilo atomtegimišton täht Lomonosovan rajonas. Vozil 1967−1973 Leningradan AES:an ezmäine energoblok om saudud, vodele 1981 — jäl'gmäine, nellänz' lugul. Vl 1973 sulakun 19. päiväl radnikžilo kändihe lidnaks agjan alištusenke. Vl 1974 ühtištuihe sidä lähižen Ustjan küläkundan eländpunktoidenke. Lidnümbrik om olmas nügüdläižiš röunoiš vspäi 2006.

Vspäi 1993 lidnan territorii om Venäman röunmaks, se om sauptud verhiden maiden rahvahanikoiden tulendad vaste eriližeta laskendbumagata.

Sosnovii Boran ižandusen päsarakod oma atomenergetik (Leningradan AES, Leningradan AES 2, tedoinstitutad), sauvond da sauvondmaterialoiden pästand (raudbeton, metallkonstrukcijad, teraztorvveimed)^[1].

Geografijan andmused

Lidn sijadase Suomen lahten suvirandal (Koporjen laht), 20 m ü.m.t. keskmäižel korktusel. Matkad Piterin röunhasai om 35 kilometrad päivnouzmha orhal (Lomonosov-lidn), Piterin keskushesai — 80 km.

Kovaši-jogi lankteb Suomen lahthe lidnan südäimes.

Sosnovii Bor-lidnümbrik röunatab Lomonosovan rajonanke pohjoižpäivnouzmas, päivnouzmas da suves. Baltijan meren Suomen laht levigandeb päivlaskmha lidnaspäi.

Sosnovii Bor om lidnümbrikon üks'jäižeks eländpunktaks. Lidnümbrik jagase 20 valičemižümbrikoks.

Tobmuz

Käskusenandai tobmuz om Deputatoiden nevondkund (ven.: Совет депутатов) 20 ühtnijanke. Kaik rahvaz valičeb heid videks vodeks. Järgenduseližed valičendad sihe oliba vn 2019 sügüz'kun 8. päiväl. Deputatoiden nevondkund valičeb lidnan administracijan pämest.

Edeline lidnümbrikon pämez' (Deputatoiden nevondkundan ezimez') om Dmitrii Puläjevskii (2009 — keväz'ku 2017), radoi kaks' strokud jäl'geten. Edel sidä vozil 2006−2009 hän radoi lidnan administracijan pämehen. Hänen lähtendan jäl'ghe lidnümbrikon Administracijan pämez' kändihe lidnümbrikon pämehen. Deputatoiden nevondkundan ezimez' om Ivan Babič vn 2019 redukuspäi.

Municipaližen ühtnikan pämez' om lidnan Administracijan pämez'. Ezmäine varapämez' da nell' muite varapämest oma hänele abhu. Kuz' komitetad, 18 palakundad da üks' laudkund alištudas lidnümbrikon administracijan pämehištole. Edeline lidnan Administracijan pämez' om Vladimir Sadovskii, radoi vn 2014 tal'vkuspäi. Nügüdläine municipaližen ühtnikan pämez' om Mihail Voronkov vn 2019 redukuspäi.

Eläjad

Vl 1989 lidnan ristitišt oli 55 800 eläjad. Vn 2010 Venäman rahvahanlugemižen mödhe lidnan eläjiden lugu oli 65 788 ristitud. Kaik 68 045 eläjad oli lidnas vl 2017. Kaikiš suremb lidnan ristitišt oli 68 344 eläjad vl 2019.

Rahvahad (enamba 0,4 % vl 2010): venälaižed — 71,9 %, ukrainalaižed — 2,1 %, vaugedvenälaižed — 1,2 %, totarlaižed — 0,6 %, toižed rahvahad — 1,8 %, rahvahuden ozutandata — 22,4 % (jäl'gmäižišpäi vaiše 3,8 % mahttas pagišta venäkelel).

Erased igähižed rahvahad^[2]: suomalaižed — 70 rist. (0,11 %), karjalaižed — 37 rist. (0,06 %), estilaižed — 24 rist. (0,04 %), vepsläižed — 9 rist. (0,01 %), ižoralaižed — 7 rist. (0,01 %), vodilaižed — 3 rist. (vähemba mi 0,01 %).

Ortodoksižen hristanuskondan nell' pühäpertid^[3] oma avaitud lidnas: Jumalanmaman «Korbendatoi Penzaz»-jumalaižen päjumalanpert', ph. Panteleimonan jumalanpert', ph. Lazar' Nell'päiväižen jumalanpert' i ph. Mikulai-čudonsädajan časoun'.

Om professionaližen opendusen aluzkundoid lidnas: keskopenduz — politehnine kolledž^[4], üläopenduz — Piterin universitetoiden koume filialad i Venäman valdkundaližen radnikoičendan akademijan filial.

Galerei

Lidnan administracijan sauvuz (2011)
Optoelektronikan tedoinstitutan «Vertikal'»-kodvindkompleks, vn 2008 nägu
Leningradan atomelektrostancii vl 2010
Lapsiden «Andersengrad»-bobuštuzkompleks (2008, om saudud vll 1975−1980)
Kališče-raudtestancii vl 2014

Homaičendad

Irdkosketused

Sosnovii Bor-lidnümbrikon oficialine sait (sbor.ru). (ven.)

Sosnovii Bor (lidn, Leningradan agj) Vikiaitas

	Leningradan agjan lidnad
	Boksitogorsk \| Bugri \| Gatčin \| Ivangorod \| Kamennogorsk \| Kingisepp \| Kiriši \| Kirovsk \| Koltuši \| Kommunar \| Kos'kenaluine \| Kudrovo \| Lug \| Lüban' \| Murino \| Nikol'skoje \| Otradnoje \| Pikalövo \| Primorsk \| Priozersk \| Pöud \| Sertolovo \| Slanci \| Sosnovii Bor \| Svetogorsk \| Säs'stroi \| Šlissel'burg \| Tel'manan lidn \| Tihvin \| Tosno \| Uz' Ladog \| Viipur \| Visock \| Volhov \| Volosovo \| Vsevoložsk

[1] Sosnovii Bor-lidnankundan investicine pasport (lenoblinvest.ru). — 12 lp. — Lpp. 1−4. (ven.)

[2] Национальный состав и владение языками, гражданство населения Ленинградской области (Leningradan agjan rahvahaline mülükund, ristitišton kel'mahtod da rahvahanikuz.) / Стат. сборник. Часть 1. — СПб.: Петростат, 2013. — 266 lpp. — Lp. 21. (ven.)

[3] Sosnovii Boran pühäpertid sobory.ru-saital. (ven.)

[4] Sosnovii Boran politehnižen kolledžan sait (pl36.ru). (ven.)

[1]

[2]

[3]

[4]

Lidnanznam	Flag
Valdkund	Venäma
Eläjiden lugu (2023)	64,121 ristitud
Pind	71,98 km²

Pämez'	Mihail Voronkov (reduku 2019—)
Telefonkod	+7−81 369-xx-xxx
Avtokod	47
Aigvö	UTC+3 (MSK+0)