Belgorod

Belgorod (ven.: Бе́лгород) om lidn da lidnümbrik Venäman päivlaskmas. Se om Belgorodan agjan administrativine keskuz da kaikiš suremb lidn. Vspäi 2007 Belgorod om «sodahoštusen lidn»-arvnimenke.

Belgorod
Белгород

Lidnanznam	Flag
Valdkund	Venäma
Eläjiden lugu (2020)	394,142 ristitud
Pind	153,1 km²
Pämez'	Valentin Demidov (kül'mku 2022—, velgusentäutai)
Telefonkod	+7−4722-xxx-xxx
Avtokod	31
Aigvö	UTC+3 (MSK+0)

Belgorodan ümbrikod:
     Päivlaskmaine      Päivnouzmaine

Istorii

Amuine Severskii-lidnuz oli pandud Vezölk-jogen randal sen lanktendan sijanno Severskii Doncha 10. voz'sadal. Sil-žo voz'sadal kalaidajad heimod paniba sidä mantazole.

Nügüdläižen eländpunktan aluz om pandud Födor I Čudokahan käskön mödhe vn 1596 sügüz'kun 11. päiväspäi kuti lidnuz Venäman valdkundröunanno. Vozil 1727−1779 Belgorod oli Belgorodan gubernijan keskuseks, sid' mülüi Kurskan gubernijha makundan keskuseks. Vl 1954 panihe Belgorodan agjan alust, i Belgorod kätihe sen keskuseks.

Belgorod šingotase mašinansauvomižen tegimil (kaivuzmašiništ), sauvondmaterialiden pästandal (abrazivad, mel, cement, pumaterialad), himižel i farmaceftižel sarakoil, sömtegimištol.

Geografijan andmused

Lidn sijadase agjan päivlaskmas, Severskii Donc-jogen muugotil randoil, 200 m keskmäižel korktusel valdmeren pindan päl (keskuz om 130 m korktusel). Pertišt otab koumen kukhan pautkid, reljef om vanoikaz. Belgorodan vezivaradim augotaze lidnan territorijal. Matkad Moskvhasai om 700 km pohjoižhe, Ukrainan röunhasai — 40 km suvhe. Lähembaine järed lidn om röunantagaine Har'kov 71 km suvipäivlaskmha.

Klimat om ven. Voden keskmäine lämuz +7,7 C°. Paneb sadegid 605 mm vodes, enamba kezal (192 mm).

Londuseližed varad oma mel, letked, saved, reskvezi, mineralveded, mustma, ištutadud kavag'mecad.

Belgorod jagaze kahteks ümbrikoks: Päivnouzmaine (ven.: Восточный) i Päivlaskmaine (ven. Западный). Lidn om lidnümbrikon üks'jäine eländpunkt.

Eläjad

Vn 2010 Venäman rahvahanlugemižen mödhe eläjiden lugu oli 356 402 ristitud. Kaikiš suremb lidnan ristitišt om nügüd'. Vl 2017 lidnan ristitišt oli 391 135 eläjad. Läz 600 tuhad elädas ezilidnoidenke. Eländpertiden sauvondan korged piguz (enamba mi keskmäine valdkundas) vedatab migracijad Venäman pohjoižiš regionoišpäi.

Rahvahad (2010): venälaižed — 94,1 %, ukrainalaižed — 3,4 %, armenijalaižed — 0,5 %, toižed rahvahad — 2,0 %.

Lidnümbrikon pämez' om lidnan Administracijan pämez' (mer). Edeližen merad oma Anton Ivanov (tal'vku 2021 — kül'mku 2022), Jurii Galdun (keväz'ku 2019 — reduku 2021), Konstantin Poležajev (kül'mku 2015 — keväz'ku 2019). Lidnan Nevondkundan ezimez' om Vadim Radčenko vn 2022 vilukuspäi.

Transport

Avtobusad, trolleibusad da taksid oma kundaližeks transportaks lidnas. Avtobusad ühtenzoittas lidnad rajonkeskusidenke, Venäman da Ukrainan järedoidenke lidnoidenke. 20. voz'sadan augotišespäi Belgorod om raudtesol'm, raudted lähttas Kurskha, Sumihe, Har'kovha.

Rahvahidenkeskeine civiline Belgorod-lendimport (EGO / БЕД / UUOB, 468 tuh. passažiroid vl 2017) sijadase nelläs kilometras pohjoižhe lidnan keskusespäi. Sišpäi tehtas čarterreisid Keskmeren da Tailandan lebutahoihe, mugažo reisid Venämadme (Moskv, Piter, Alauz'lidn; Tümenin agj, Noril'sk — vahtradnikoiden täht).

Galerei

• 

  Jumalanmaman Počajevan jumalaižen jumalanpert', vn 2018 nägu

• 

  Lämuzizoläcijan «Izovol»-kombinat vl 2010

• 

  Aleksandrovskii-bizneskeskuz i adivpert' vl 2010

• 

  Belgorodan valdkundaližen universitetan päkonkurs (2013)

• 

  Belgorodan valdkundaline akademine dramteatr M.S. Ščepkinan nimed (2009)

• 

  Belgorodan valdkundaline filarmonii (2011)

• 

  «Energomaš»-kul'turkeskuz (2017)

• 

  «Aerobus»-torguindkeskuz (2009)

• 

  Belgorod-lendimportan terminal vl 2014

Irdkosketused

• Belgorod-lidnan sijaližen ičeohjandusen aluzkundoiden oficialine portal (beladm.ru). (ven.)