Kostrom

Kostrom (ven.: Кострома́) om Venäman lidn da lidnümbrik valdkundan päivlaskmas. Se om Kostroman agjan administrativine keskuz da kaikiš suremb lidn. Järed jogiport.

Kostrom
Кострома

Lidnanznam	Flag
Valdkund	Venäma
Eläjiden lugu (2024)	265,761 ristitud
Pind	144,5 km²
Pämez'	Jurii Žurin (uhoku 2011—, Юрий Журин)
Telefonkod	+7−4942-xxx-xxx
Avtokod	44
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Lidnan kart (2022)

Istorii

Eländpunktan aluz om pandud vl 1152. Kostrom mainitase kirjutadud purtkiš ezmäižen kerdan vl 1213 kuti lidn. Vll 1246−1320 se oli Kostroman ruhtinazkundan pälidnaks.

Kostrom šingotase mašinansauvomižel (lämbitusen da ventiläcijan mašiništ, mašiništ toguindan täht, avtolikutimiden paloiden tegim, ekskavatorad), sauvondmaterialiden pästandal (fanerankombinat, sauvondpolimeriden tegim, silikatsavičun tegim, katusenmaterialad), tekstil'tegimištol (pölvhankombinat, pölvhanmanufaktur, vönen täsmäižen fabrik), sömtegimištol (leibänkombinat, maidkombinat, etilspirtan tegim, söndtavaroiden kombinat, pörukaižiden tegim), meblin kahtel fabrikal, kahtel LEK:al, juvelirtegesiden edheotandal.

Geografijan andmused

Lidnan sijaduz agjas vn 2015 kartal

Lidn sijadase agjan suvipäivlaskmas, Volgan muugotil randoil (Gor'kijan vezivaradim) läz ühtennimižen jogen lanktendan sijad, 110 m ü.m.t. keskmäižel korktusel. Matkad Moskvan ümbärtehesai om 306 kilometrad suvipäivlaskmha avtotedme. Lähembaine järed lidn om Jaroslavl' 60 km suvipäivlaskmha avtotedme vai jogedme.

Klimat om ven kontinentaline, Atlantižen valdmeren valatoitusenke. Voden keskmäine lämuz om +4,5 C°. Ekstremumad oma −46,4 C° (viluku) i +37,3 C° (heinku, eloku). Kezaaigan minimum om −2,7 C° (kezaku), tal'vaigan maksimum om +9,4 C° (tal'vku). Ei voi panda halad heinkus-elokus. Paneb sadegid 574 mm vodes, enamba kezakus-elokus (69..71 mm kus), vähemba uhokus-keväz'kus (24..26 mm kus). Il'man keskmäine vozne nepsuz om 79 %.

Tobmuz

Kostroman lidnrajonad: (2017)      Keskuzrajon      Fabričnii-rajon      Volgantagaine rajon

Kostrom jagase koumeks territorialižeks rajonaks, ned oliba ičeze administracijoidenke vozil 2011−2013. Lidn om lidnümbrikon üks'jäižeks eländpunktaks.

Lidnümbrikon pämez' om Lidnan Duman ezimez'. Kostroman Administracijan pämez' om Aleksei Smirnov vn 2018 sügüz'kuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 268 742 ristitud, vn 2021 — 267 481 ristitud. Kaik 277 648 eläjad oli lidnas vl 2017. Kaikiš suremb lidnan ristitišt oli 289 300 eläjad vl 1999.

Rahvahad (enamba 0,4 % vl 2021): venälaižed — 60,4 %, ukrainalaižed — 0,4 %, toižed rahvahad — 2,9 %, rahvahuden ozutandata — 36,3 %.

Openduz

Lidnan üläopendusen aluzkundad:

• Kostroman valdkundaline universitet (alusenpanend 2016 kahten üläopendusen aluzkundan ühtištusel);
• Radiacižen, himižen i biologižen kaičendan sodaakademii S.K. Timošenko-maršalan nimed (vspäi 1932);
• Kostroman hengeline seminarii (1747−1918, udessündutadud vl 1990 kut eparhijan hengeline škol, seminarii vspäi 1996).

Kostroman valdkundaline maižanduzakademii radab lähižes Karavajevo-žilos.

Transport

Avtobusad (31 maršrutad) i taksid oma kundaližeks transportaks lidnas. Edel vn 2023 heinkud maršruttaksid i trolleibussistem radoiba mugažo. Jogiport radab turizman astjoiden täht päpaloin kezaaigan.

Lidn sijadase läz kaht federališt avtoted. Üks'jäine avtotesild ühtenzoitab Volgan randoid, kahtenden sildan projekt om vaiše planoiš. Vl 1887 raudte tuli lidnha Jaroslavlišpäi. Vodele 1932 raudtesild Volgas päliči i Kostrom Uz' -päraudtestancii oma saudud. Om harvoid ezilidnelektrojonusid, sidä kesken Jaroslavlihesai (jonuz mäneb pol'tošt časud).

Federaližen znamoičendan soda- da civiline Kostrom (Sokerkino)-lendimport (KMW / УУБА / UUBA, 7,3 tuh. passažiroid vl 2017) sijadase kudes kilometras pohjoižpäivnouzmha lidnan keskuzpalaspäi. Tehtas reisid Piterihe, čarterreisid Venäman Mustmeren lebutahoiže.

Galerei

• 
  Lämoipalonvastaine čuhunduz Susaninan torgul om lidnan simvolaks
• 
  Lidnan Duman i administracijan pert' (2009)
• 
  Ph. Stroican i ph. Ipatijan Gangralaižen mez'jumalankodi (Ipatijan jumalankodi), vn 2011 nägu
• 
  Sündun Nägundan i Anastasijan naižjumalankodi, vn 2015 nägu
• 
  Fanerkombinat vl 2010
• 
  «Sovkombank:an» päfater vl 2020
• 
  Kostroman valdkundaline universitet N. Nekrasovan nimed (2008)
• 
  Kostroman dramteatr A. Ostrovskijan nimed (2016)
• 
  «Volg»-turistkompleks (2001)
• 
  Kostrom Uz' -päraudtestancijan sauvuz vl 2009

Tetabad sündnuded

• Aleksandra Išimova (1804−1881) — oli Venäman lapsidenkirjutainaine i kändusiden tegii.

Irdkosketused

• Lidnan Duman oficialine sait (duma-kostroma.ru). (ven.)
• Lidnan Administracijan oficialine sait (grad.kostroma.gov.ru). (ven.)