Alamad vai Niderland (alam.: Nederland [ˈneːdərlɑnt]), vhesai 2020 mugažo Gollandii, täuz' oficialine nimituz — Alaman Kunigahuz (alam.: Koninkrijk der Nederlanden), om valdkund Päivlaskmaižes Evropas, Pohjoižmeren randal, EÜ:n ühtnii vspäi 1957 (sen üks' alusenpanijoišpäi) i PAKO:n üks' alusenpanijoišpäi. Oficialine pälidn da kaikiš suremb lidn om Amsterdam, faktine pälidn — Hag (monarhan, ohjastusen da parlamentan rezidencijad sijadasoiš siš).

Alaman Kunigahuz
Koninkrijk der Nederlanden
 Flag
 Valdkundznam
Pälidn Amsterdam
Eläjiden lugu (2018) 17,151,228[1] ristitud
Pind 41,543 km²
Alaman Kunigahuz Koninkrijk der Nederlanden
Kel' alaman
Valdkundan pämez' Villem-Aleksandr
Päministr Mark Rütte
Religii ateizm, hristanuskond
Valüt evro (€) (EUR)[2]
Internet-domen .nl[3]
Telefonkod +31
Aigvö tal'vel UTC+1,
kezal UTC+2

Alamad oma kaikiš tihedašti elänzoittud Evropan sur' valdkund.

Istorii vajehta

Vn 1581 26. päiväl heinkud Alamad tedištoitihe ripmatomudes Ispanijaspäi. Toižed valdkundad tundištihe ripmatomut Kahesakümnevoččen sodan jäl'ghe (1568−1648). Ižandusen i kul'turan änikoičendan pord mäni kaiken 17. voz'sadan aigan.

Alamad kändihe monarhijaks francižen okkupacijan lopindan jäl'ghe 19. voz'sadan augotišes. Vl 1830 Bel'gii erigoittihe täuzin, vl 1890 Lüksemburg sait ripmatomut. Vspäi 1848 Alamad oma konstitucižeks monarhijaks. Ezmäižen mail'man sodan aigan Alamad oliba neitraližeks valdkundaks. Alamad oliba okkupiruidud Saksanmal Toižen mail'man sodan aigan vozil 1940−1945.

Konstitucii vajehta

Nell' Konstitucijad (alam.: De Grondwet voor het Koninkrijk der Nederlanden) om valdkundan istorijas: voziden 1795, 1798, 1806 i 1815. Jäl'gmäine vn 1815 Konstitucijan sur' udištamine oli vl 1983[4], se dokument om väges äiluguižidenke vajehtusidenke.[5]

Geografijan andmused vajehta

 
Alamaiden reljefan kart vl 2012

Alamad oma mavaldkundröunoiš Saksanmanke päivnouzmas (röunan piduz — 575 km) da Bel'gijanke suvipäivlaskmas (478 km). Ühthine röunoiden piduz — 1053 km. Randanpird om 451 km. Valdkundan pind — 41 543 km², sidä kesken ma — 33 893 km², vezi — 7 650 km².

Valdkundan kaikiš korktemb čokkoim om Vaalserberg-sija, 322 m valdmeren pindan päl, Kariban meres — Sceneri-mägi (862 m, Sab-sarel). Kaikiš madalamb čokkoim om Züidplas-pol'der, seičeme metrad alemba meren pindad. Valdkundan läz pol't territorijad sijadase alemba meren pindad, völ koumandez om ühten metran penemba meren pindan päl korktusidenke. Znamasižed joged oma Maas da Rein niiden suhištoidenke. Kaikiš suremb järv om ratud Eisselmer-järv, se om kaikiš järedamb Päivlaskmaižes Evropas.

Alamaiden klimat om ven meren. Lämuz vilukul om 0..+2 C°, heinkul — +16..+17 C°. Paneb sadegid 650..750 millimetrad vodes, vihmub läz kaikuččel päiväl. Mec katab territorijan üks'toštkümnendest.

Londuseližed pävarad oma kivivoi, londuseline gaz; toižed varad — turbaz, mouckivi, keitandsol, letked, gravii, väghine mahuz.

Politine sistem vajehta

 
Alaman Kunigahusen parlamentan üläkodin pert' Hagas

Ohjandusen form om unitarine parlamentine konstitucine monarhii. Vspäi 2013 valdkundan pämez' om Villem-Aleksandr-kunigaz. Hän delegiruib valdatusid ministrištole. Hot' Konstitucijan mödhe kunigaz voib panda ministrid radsijihe da allekirjutada kaikuččen käskusen, faktižikš parlamentan ühtnijad tehtas necidä. Ohjastuz sättutab znamasižid pätandoid parlamentanke. Ohjastusen ühtnijad oma ministrad (kogotas Ministriden Nevondkundha) da valdkundsekretarid.

Parlament om kaks'kodine, sen nimituz om Alaman Kunigahusen Päštatad (alam.: Staten-Generaal van het Koninkrijk der Nederlanden). Üläkodi om Ühtenz' Kodi vai Senat (alam. Eerste Kamer), kogoneb 75 ühtnijaspäi, agjoiden nevondkundad valitas heid nelläks vodeks. Alakodi om Kahtenz' Kodi vai Ezitajiden Kodi (alam.: Tweede Kamer), mülütab 150 deputatad, rahvaz valičeb heid nelläks vodeks. Molembad kodid sätas käskusid.

Ülembaine Käskuzkund om käskusenandajan tobmuden pä.

Parlamentan alakodin ühtnijoiden järgenduseližed valičendad oliba vn 2017 15. päiväl keväz'kud. Mark Rütte radab päministran vs 2010 redukun 14. päiväspäi.

Administrativiž-territorialine jagand vajehta

   Kacu kirjutuz: Alamaiden administrativiž-territorialine jagand.

Alaman Kunigahuz jagase 12 agjaks (provincijaks, alam. provincie). Agjad alajagasoiš kundoikš (alam.: gemeente), erased kundad — kundrajonikš (alam.: deelgemeente). Mugažo om koume merentagašt territorijad Kariban meres, niil kundoiden statusad oma (Boneir, Sint Estatius, Sab). Kundad alajagasoiš 647 municipalitetaks. Niiden ližaks, koume territorijad ičeohjastusenke sijadasoiš Kariban meren saril (Arub, Kürasao, Sint Marten).

Eläjad vajehta

Vl 2012 eläjiden lugu oli 16 847 007 ristitud, vodel 2017 — 17 100 475 ristitud. Kaikiš suremb ristitišt om nügüd'.

Nene rahvahad elädas Alamaiš (2018, enamba 1%, ozutadud rahvahudenke): alamalaižed — 76,9%, EÜ:n augotižlibundanke — 6,4%, turkad — 2,4%, marokolaižed — 2,3%, indonezijalaižed — 2,1%, saksalaižed — 2,1%, surinamalaižed — 2,0%, pol'šanmalaižed — 1,0%, toižed rahvahad — 4,8%.

Uskondan mödhe (2017): riman katolikad — 23,6%, protestantad — 14,9%, islamanuskojad — 5,1%, toižed uskojad — 5,7% (sidä kesken induistad, buddistad i judaistad), religijatomad — 50,7%.

Alamaiden sured lidnad (enamba 500 tuh. ristituid vl 2012, surembaspäi penembha): Amsterdam (oficialine pälidn), Rotterdam, Hag (pälidn de-fakto). Lidnalaižiden pala om 92,2% (2020).

Ižanduz vajehta

Šingotadud postindustrialine ižanduz. Radajiden 1,2% oma ottud maižandushe, 17,2% ratas industrijas, 81,6% — holitišiden sferas (2015). Tegimišton päsarakod oma londuseližen gazan i kivivoin samine, elektrotehnine, kivivoinhimine, avia-, avto- i laivansauvomine, raudan metallurgii, sömtegimišt. Znamasižed sarakod oma rahvahidenkeskeine turizm i ofšorzonad Kariban meren saril.

Vl 2012 Alamaiden päeksport oli kivivoi (20%), elektrotehnik ofisan da kodin täht (läz 12%), likkuimed da niiden palad (läz 10%), himižen tegimišton produkcii (läz 10%); toine da toštmižeksport — zelläd (2%), änikod (2%, sidä kesken mahusenke), kakaovoi, sobad, sagud da maplodud. EÜ:n ühtnijad i Sur' Britanii oma pätorguindpartnorikš.

Homaičendad vajehta

  1. Alamaiden ristitišton endustuz vn 2018 heinkus // Mail'man faktoiden kirj. — Cia.gov. (angl.)
  2. Mugažo AÜV:oiden dollar (USD) Kariban meren departamentoiš.
  3. Mugažo .eu kuti EÜ:n ühtnii; .frl Frizii-agjas.
  4. Alamaiden Konstitucii Vikipurtkiš. (alam.)
  5. Alamaiden Konstitucijan vn 2008 versii constituteproject.org-saital. (angl.)

Irdkosketused vajehta

Tobmuz
Ühthine informacii valdkundas


Evropan valdkundad
 
Evropan valdkundad
Alamad | Albanii | Andorr | Armenii1 | Azerbaidžan1 | Avstrii | Bel'gii | Bolgarii | Bosnii da Gercegovin | Čehanma | Danii | Estinma | Francii | Grekanma | Gruzii1 | Horvatii | Irlandii | Islandii | Ispanii | Italii | Kazahstan1 | Kipr1 | Latvii | Lihtenštein | Litvanma | Lüksemburg | Mad'jaranma | Mal't | Moldov | Monako | Mustmägi | Norvegii | Pohjoižmakedonii | Pol'šanma | Portugalii | Ročinma | Romanii | San Marino | Saksanma | Serbii | Slovakii | Slovenii | Suomenma | Sur' Britanii | Šveicarii | Turkanma1 | Ukrain | Vatikan | Vaugedvenäma | Venäma1

1 Om Azijas mugažo.