Omsk

Omsk (ven.: Омск) om millionerlidn da lidnümbrik Venäman keskuzpalan suves. Se om Omskan agjan administrativine keskuz (vspäi 1934) da kaikiš suremb lidn, kahtenz' surtte Sibirin lidn.

Omsk
Омск

Lidnanznam	Flag
Valdkund	Venäma
Eläjiden lugu (2017)	1 178 391 ristitud
Pind	566,9 km²
Pämez'	Oksana Fadina (tal'vku 2 017—)
Telefonkod	+7-3 812-xxx-xxx
Avtokod	55
Aigvö	UTC+6 (MSK+3)

Omskan agjan kaikutte koumanz' ristit videspäi eläb Omskas.

Südäiolend

Istorii

Eländpunktan aluz om pandud vl 1716 Omskan lidnuseks. Vl 1782 žilo udenke lidnusenke oiktal randal saiba lidnan statusad.

Vozil 1918−1920 Venäman rahvahanikoiden sodan aigan Omsk oli Venäman valdkundan da Vauktan Gvardijan likundan pälidnaks. Vn 1921 kezal sirtihe Sibirin keskusen aluzkundoid Novosibirskha. Vl 1930 ühtištuihe Leninsk-Omskii-lidnad i Omskad, vl 1933 — Novo-Omsk-lidnad Omskanke. Vll 1947−1958 lidn alištui Venäman NFST:n tobmudele oikti.

Geografijan andmused

Administrativižed ümbrikod:
1. Kirovan ümbrik
2. Leninan ümbrik
3. Oktäbrin ümbrik
4. Nevondkundaline ümbrik
5. Keskuzümbrik

Lidn sijadase Irtiš-jogen muugotil randoil Ominjogen lanktendan sijas, 90 m ü.m.t. keskmäižel korktusel. Lähembaižed lidnad oma Kalačinsk 65 km päivnouzmha raudtel vai avtol i Isil'kul' 149 km päivlaskmha raudtedme vai avtotedme.

Omsk om lidnümbrikon üks'jäine eländpunkt. Se jagase 5 administrativižhe ümbrikho vspäi 1945.

Eläjad

Omsk kändihe millionerlidnaks vl 1979. Vn 2010 Venäman rahvahanlugemižen mödhe eläjiden lugu oli 1 154 116 ristitud. Kaikiš suremb ristitišt oli 1 169 tuh. eläjid vl 1992 da om nügüd'.

Rahvahad vl 2010 (ozutanuziden rahvahudes pala): venälaižed — 88,8%, kazahlaižed — 3,4%, ukrainalaižed — 2,0%, totarlaižed — 1,9%, saksalaižed — 1,3%, toižed rahvahad — 2,6%.

Ižanduz

Ekonomikan päsarakod oma kivivoin ümbriradmine, himine sarak, aerokosmižed tegimed, sodatehnikan tehmine (tankad, somuzavtod), maižanduztehnikan pästand, radioledimiden i avtodetaliden tehmine, sömtegimišt.

Transport

Transsiban raudtestancii om saudud Omskas vl 1896. Järed jogiport levineb läz raudtestancijad. Jogistancijaspäi passažirlaivad ujudas Salehardhasai.

Rahvahidenkeskeine civiline da Venäman policijan Keskuzline Omsk-lendimport (OMS / ОМС) sijadase 5 kilometras suvipäivlaskmha lidnan keskusespäi. Vspäi 1989 uz' civiline Omsk-Födorovk-lendimport om sauvomas vajehtamha vanhad lendimportad. Sauvond sijadase 32 km lodeheze lidnan keskusespäi.

Avtobusad da trolleibusad oma kundaližeks transportaks lidnas. Vspäi 1992 metro vai kiruhtramvai sauvose lidnas. Viž manalašt stancijad lindäs ezmäižeks jonoks.

Tetabad sündnuded

• Jegor Letov (Igor' Letov) (1964−2008) — oli Nevondkundaližen Ühtištusen i Venäman runokirjutai da muzikant.
• Dar'ja Mel'nikova (sünd. 1992) — Venäman kinon da teatran aktris.
• Mihail Vrubel' (1856−1910) — oli Venäman pirdai.

Galerei

• 

  Omsk-aren

• 

  Jogistancii

• 

  Torguimiž-kontorine «Festival'»-keskuz hural randpolel

• 

  Regionaline kirjišt

Irdkosketused

• Lidnan Nevondkundan oficialine sait (omskgorsovet.ru). (ven.)
• Lidnan Administracijan oficialine sait (admomsk.ru). (ven.) (angl.) (saks.) (kit.)