Krasavino

Krasavino (ven.: Краса́вино) om Venäman lidn Vologdan agjan pohjoižpäivnouzmas. Se om Suren Ustügan ümbrikon kahtenz' lidn.

Krasavino
Красавино

Lidnanznam
Valdkund	Venäma
Eläjiden lugu (2023)	5,460 ristitud
Telefonkod	+7−81 738-xx-xxx
Avtokod	35
Aigvö	UTC+3 (MSK+0)

Istorii

Nügüdläine eländpunkt mainitase Krasavino-küläks 19. voz'sadan augotišespäi, se oli külišton keskuses. Külä šingotihe, i vozil 1842−1851 saudihe tekstil'fabrikad pästmaha hoikid pölvazkanghid.

Krasavino sai lidnan statusad vl 1947. Vozil 1960−1980 udištadihe pertištod, saudihe lebukodid, laukoid, äižiruižid pertid. Krasavinon uz' LES 63,8 MVt vägevudenke radaškanzi vl 2010, se tegeb elektrust londuseližes gazaspäi, vajehti vn 1957 lidnan LES:ad (oli 6 MVt). Vl 2012 pölvhankombinat tuli bankrotnendale, lidnan tegimišt diversificiruiše.

Krasavinon ižandusen päsarakod oma elektroenergetine, sauvondmaterialiden tehmine (savič, pumaterialad) i sömtegimišt (mecproduktoiden ümbriradmine).

Geografijan andmused

Lidn sijadase rajonan pohjoižes, Pohjoižen Dvinan hural randpolel i sen Lapink-ližajogen (ven.: Ла́пинка 22 km pitte) randoil, 65 m ü.m.t. keskmäižel korktusel.

Matkad Vologdhasai om 410 km suvipäivlaskmha orhal vai 465 km avtotedme. Lähembaižed lidnad oma Sur' Ustüg 25 km suvhe orhal vai avtotedme i Kotlas 34 km pohjoižhe orhal vai 44 km avtotedme.

Krasavino-raudtestancii sijadase koumes kilometras päivlaskmha lidnaspäi.

Tobmuz

Krasavinon lidnankund rajonan kartal vn 2021 lopus

Krasavinon lidnankund oli vll 2006−2022. Kaik kuz' küläd mülüiba lidnankundha Krasavinon ližaks: Buhinino, Korobovskoje, Korolövo, Podgor'je, Uz' Külä (ven.: Новая Деревня), Uz' Žilo (Новое Село). Lidnankundan pind oli 60 km². Se om kätud ümbrikon territorialižeks palakundaks vn 2022 kezakuspäi.

Jurii Buškovskii radoi lidnankundan pämehen vspäi 2015.

Eläjad

Vn 2010 Venäman rahvahanlugemižen mödhe lidnan eläjiden lugu oli 7 003 ristitud, lidnankundan — 7 479 ristitud, rajonan ristitišton seičemendez. Vl 2017 kaik 6 084 ristitud elihe lidnas i 6 539 ristitud kaikes lidnankundas. Kaikiš suremb lidnan ristitišt oli 11 186 eläjad vl 1959.

Ortodoksižen hristanuskondan tazostadud apostolihe Vladimiran jumalanpert' om saudud vll 2001−2004, se vajehti pandud mantazole ühtennimišt jumalanpertid (oli olmas vll 1889−1933).

Lapsiden opendusen aluzkundad oma päivkodi (nomer 2), keskškol nomer 15 S. Premininan nimed, čomamahtoiden škol. Lähembaižed professionaližen opendusen aluzkundad sijadasoiš Sures Ustügas.

Transport

Avtobusad oma kundaližeks transportaks lidnas, ühtenzoittas sidä lähižidenke eländpunktoidenke. «Sur' Ustüg — Kotlas»-avtote ümbärdab lidnad päivlaskmaspäi.

Krasavino-raudtestancii zavodi radod udel sarakol Surhe Ustüghasai vl 1977, se om vaiše turistjoukuiden da jüguiden täht, mecan i mectegesiden täht tobjimalaz.

Irdkosketused

• Lidnan territorialine palakund ümbrikon 35velikoustugskij.gosuslugi.ru-saital. (ven.)