Šarj

Šarj (ven.: Шарья́) om Venäman lidn Kostroman agjan päivnouzmas. Se om Šarjan lidnümbrikon da Šarjan rajonan administrativine keskuz. Lidn ei mülü rajonha, alištub agjan tobmudele oikti.

Šarj
Шарья

Lidnanznam	Flag
Valdkund	Venäma
Eläjiden lugu (2017)	23,912 ristitud
Pind	25,3 km²
Pämez'	Eduard Neganov (2011−2012; reduku 2017—)
Telefonkod	+7−49 449-xx-xxx
Avtokod	44
Aigvö	UTC+3 (MSK+0)

Istorii

Eländpunktan aluz om pandud vl 1906 kuti Šarj-raudtestancii Vätk — Vologd raudten sauvomižen aigan (1903−1906). Nimitihe penen jogen mödhe, jogi kändihe soks nügüd' suvhe stancijaspäi. Radnikžilo sai lidnan statusad vl 1938. Mülüb Kostroman agjaha sen alusenpanendaspäi vl 1944 lidnaks agjan alištusenke kerdalaz.

Šarjan ižandusen päsarakod oma mecan süvä ümbriradmine da raudten holituz, mugažo meblin tehmine i sömtegimišton edheotandad oma olmas lidnas. Järed puapakoiden tegim sijadase lähižes Vetlužskii-žilos.

Geografijan andmused

Lidn sijadase rajonan keskuzpalas, Vetlug-jogen hural randpolel (Volgan hura ližajogi), 4 kilometras randaspäi, 110 m valdmeren pindan päl keskmäižel korktusel. Lidnanvuitte Vetlužskii-žilo seižub Šarj-lidnan i Vetlug-jogen keskes. Matkad Kostromhasai om 275 km päivlaskmha orhal vai 320 km avtotedme. Lähembaine lidn om Manturovo 40 km päivlaskmha orhal.

Lidnanvuitte Vetlužskii-žilo (11 919 rist. vl 2017) da koume pen't küläd mülüdas lidnümbrikho Šarjan ližaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 23 681 ristitud, lidnümbrikon — 36 659 ristitud. Kaikiš suremb lidnan ristitišt oli 27 062 eläjad vl 1989. Vl 2002 ühthemänho 39 365 ristitud elihe lidnümbrikon röunoiš (om olmas vspäi 2004). Kaik 36 565 ristitud elihe lidnümbrikos vl 2017.

Professionaližen opendusen aluzkundad: politehnine i agrarine tehnikumad, pedagogine i medicinine kolledžad, üläopendusen Moskvan i Kostroman aluzkundoiden 4 filialad. Ortodoksižen hristanuskondan koume pühäpertid om olmas lidnas.

Transport

Pened avtobusad da maršruttaksid oma kundaližeks transportaks lidnas da sen ümbrištos. «Kotlas — Nikol'sk — Uren' (Alalidnan agj)»-avtote ümbärdab lidnad päivnouzmaspäi, «Kostrom — Kirov»-avtote ümbärdab lidnad suvespäi.

Galerei

• 

  Ph. Mikulain jumalanpert', vn 2007 nägu

• 

  Vedimdepo vl 2006

• 

  Šarj-päraudtestancijan sauvuz vl 2020

• 

  Sild Vetlugas päliči vl 2006

Irdkosketused

• Lidnümbrikon tobmuden aluzkundoiden oficialine sait (adm-sharya.ru). (ven.)