Volgorečensk

Volgorečensk (ven.: Волгоре́ченск) om Venäman lidn da lidnümbrik Kostroman agjan suvipäivlaskmas.

Volgorečensk
Волгореченск

Lidnanznam	Flag
Valdkund	Venäma
Eläjiden lugu (2021)	14,355 ristitud
Pind	17,83 km²
Pämez'	Aleksandr Ščerbakov (sügüz'ku 2020—)
Telefonkod	+7−49 453-xx-xxx
Avtokod	44
Aigvö	UTC+3 (MSK+0)

Istorii

Eländpunktan aluz om pandud vl 1964 kuti lidnanvuitte Volgorečensk-žilo sauvomha da holitamha Kostroman GRES:ad, samha elektrust. Sil aigal žilon tahond oli edahaine agjas, ei olend ni hüvid teid, ni sildoid, vedatihe elektrust lähižihe külihe 1950-nzil vozil. Žilo oli alištunu Kostrom-lidnan tobmudele alusenpanendan aigaspäi vhesai 1994. Žilo sai lidnan statusad vn 1994 16. kezakud.

Volgorečensk šingotase GRES:al, kalankazvatandal (osötr, karp), Gazprom-kompanijan torviden metallurgižel tegimel, sauvondan kompanijal.

Geografijan andmused

Lidn sijadase Volgan Gor'kijan vezivaradimen oiktal randal, 110 m ü.m.t. keskmäižel korktusel.

Röunatab Ivanovon agjanke suves. Matkad agjan Kostrom-pälidnhasai om 40 km pohjoižhe orhal, avtotedme vai jogedme. Lähembaižed lidnad oma Ivanovon agjas: Privolžsk kudes kilometras suvipäivnouzmha orhal vai kümnes kilometras avtotedme i Furmanov 17 km suvhe orhal vai 24 km avtotedme. Üks'raižuine raudte ühtenzoitab lidnad Furmanovanke.

Tobmuz

Volgorečensk om lidnümbrikon üks'jäižeks eländpunktaks. Lidnümbrik röunatab agjan Krasnosel'skii-rajonanke pohjoižes i päivnouzmas, Nerehtan rajonanke päivlaskmas.

Lidnümbrikon tobmuden pämez' om sen Administracijan pämez'. Edeline lidnan pämez' om Vladimir Baldin (reduku 2015 — sügüz'ku 2020). Lidnümbrikon Duman ezimez' om Natal'ja Romanova vn 2017 kezakuspäi. Edeline Duman ezimez' om Aleksandr Timofejev (reduku 2015 — kezaku 2017).

Eläjad

Vn 2010 Venäman rahvahanlugemižen mödhe lidnan eläjiden lugu oli 17 104 ristitud, vn 2021 — 14 355 ristitud. Kaik 16 653 eläjad oli lidnas vl 2017. Kaikiš suremb lidnan ristitišt oli 19 tuhad eläjid vl 2001.

Rahvahad (enamba 0,4 % eläjid vl 2021): venälaižed — 94,6 %, ukrainalaižed — 0,5 %, toižed rahvahad — 1,8 %, rahvahuden ozutandata — 3,1 %.

Ortodoksižen hristanuskondan kaks' pühäpertid oma saudud i avaitud lidnas: ph. Tihon Luhalaižen päjumalanpert' (om letud vll 1999−2005) i «Murendamatoi sein»-jumalaižen časoun'-muštnik (om vspäi 2010).

Lapsiden opendusen aluzkundad oma viž päivkodid (nomer 1, 2, 4, 5, 7), licei (nomer 1), kaks' keskškolad (nomer 2 i 3), sädamižen Istoki-pert' («purtked»), čomamahtoiden škol, sportškol. Volgorečenskan tegimištoline tehnikum om lidnan professionaližen opendusen aluzkundaks.

Galerei

• 
  Ph. Tihon Luhalaižen päjumalanpert', vn 2019 nägu
• 
  Kostroman GRES tagamal vl 2017
• 
  Energetik-kul'turkeskuz (vn 2020 olend)
• 
  Sar' Volgas läz elektrostancijad

Irdkosketused

• Lidnümbrikon oficialine portal (volgorechensk.kostroma.gov.ru). (ven.)