Galič (Kostroman agj)

Galič (ven.: Га́лич, Venäs Галичь Мерьский Merän Galič) om Venäman lidn, lidnümbrik da raudtesol'm Kostroman agjan päivlaskmas. Se om Galičun rajonan administrativižeks keskuseks, ei mülü sihe.

Galič
Галич

Lidnanznam	Flag
Valdkund	Venäma
Eläjiden lugu (2020)	16,754 ristitud
Pind	16,5 km²
Pämez'	Aleksei Karamišev (sügüz'ku 2018—, Алексей Карамышев)
Telefonkod	+7−49 437-xx-xxx
Avtokod	44
Aigvö	UTC+3 (MSK+0)

Istorii

Eländpunkt mainitase ezmäižen kerdan vl 1237 Lavrentii-manahan aigkirjas kuti Merän Galič, kudambhasai totarlaižed otiba plenha kaikid ristituid Volgan randoil, no 1159. voz' lugese lidnan alusenpanendan oficialižeks dataks. Vll 1247−1450 lidn oli ripmatoman eriližen Merän Galičun ruhtinazkundan pälidnaks, sid' oli alištunu Moskvan tobmudele i kändihe Galičun makundan keskuseks. Saudihe lidnust, i vhesai 1552 Galič oli znamasine kaičendlidn Kazanin hankundad vaste. 17. voz'sadal kazvoi Sibirin i Anglijan (Arhangel'skan kal't) torguindteil, torguihe karvoid da kalad, keskaigan ortodoksižen hristanuskondan kümne jumalankodid oli olmas lidnan ümbrištos. Vl 1906 Galič-raudtestancii radaškanzi «Vologd — Vätk»-keskustal, vspäi 1956 se om raudtesol'meks.

Galič šingotase gidravližiden avtolibutimiden i vailöndagregatoiden tehmižel, mecan varhapanendal, nahkantegimel i kengiden fabrikal, mugažo lindferm radab. Faneran kombinat om saudud vodele 2022.

Geografijan andmused

Lidn sijadase rajonan keskuses, pidust' Galičunjärven (75,4 km², 101 m ü.m.t.) suvipäivnouzmašt randad, 130 m ü.m.t. keskmäižel korktusel. Balčug-kukkaz seižub lidnan keskuzpalas. Kešm-jogi (ven.: Кешма 15 km pitte) ristikoičeb lidnan keskuzpalad.

Matk Kostrom-lidnhasai om 105 km suvipäivlaskmha orhal, 120 km avtotedme vai raudtedme pidust' Galičun ülüt. Lähembaižed lidnad oma Čuhlom 46 km pohjoižhe orhal vai 50 km avtotedme i Bui 40 km päivlaskmha avtotedme vai raudtedme.

Tobmuz

Galič om lidnümbrikon üks'jäižeks eländpunktaks.

Lidnümbrikon pämez' om lidnan Administracijan pämez'. Edeline lidnan Administracijan pämez' om Sergei Sinickii (reduku 2015 — sügüz'ku 2018). Lidnümbrikon Duman ezimez' om Vasilii Ivasišin vn 2017 tal'vkuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 17 346 ristitud. Vl 2017 lidnan ristitišt oli 16 922 eläjad. Kaikiš suremb lidnan ristitišt oli 20..21 tuhad eläjid vll 1979−2000 (21 652 rist. vl 1989).

Ortodoksižen hristanuskondan üks'toštkümne pühäpertid oma kaičenus lidnas, niiden kesken Galičun eparhijan kafedraline Ph. Jumalanmaman Tulendan Pühäpertihe päjumalanpert' (1798), Pühän Jumalanmaman Blagoveššenjan päjumalanpert' (om letud möhemb mi vl 1815, ei ole rados), Pühän Stroican Eziauguižen päjumalanpert' (1839−1859, ei ole rados), ph. Vasilein Suren jumalanpert', phh. Koz'man da Damianan jumalanpert', Paisijevo-Galičun naižjumalankodi.

Lapsiden opendusen aluzkundad oma severz'-se päivkodid, keskškolad. Galičun agrariž-tehnologine i pedagogine kolledžad oma lidnan professionaližen opendusen aluzkundoikš.

Galerei

• 
  Lämoipalonvastaine palakund vl 2020
• 
  Paisijevo-Galičun naižjumalankodi, vn 2020 nägu
• 
  Ph. Jumalanmaman Tulendan Pühäpertihe kafedraline päjumalanpert' (huralpäi) i ph. Vasilein Suren jumalanpert' (oiktalpäi), vn 2020 nägu
• 
  Adivpert'tanaz — Torguindrived (2020)
• 
  Sädamižen pert' i lapsidenkirjišt (2020)
• 
  Galič-päraudtestancijan sauvuz vl 2011

Irdkosketused

• Lidnümbrikon oficialine portal (galich.kostroma.gov.ru). (ven.)