Soligalič

Soligalič
Солигалич
	Lidnanznam;
Valdkund	Venäma
Eläjiden lugu (2021)	5,534 ristitud
Pind	8 km²
Telefonkod	+7−49 436-xx-xxx
Avtokod	44
Aigvö	UTC+3 (MSK+0)

Soligalič (ven.: Солига́лич, Venäs oli Соль Галичьская Galičun Sol) om Venäman lidn Kostroman agjan lodehes. Se om Soligaličun ümbrikon (edel vn 2023 sulakud — rajonan) administrativine keskuz da pala.

Istorii

Eländpunkt mainitase ezmäižen kerdan vl 1335 kuti Sol' Galičskai (Galickai) (ven.: Соль Галичьская (Галицкая)). Se mülüi Galičun ruhtinazkundha. Lidn šingotihe keitandsolan samižel (vhesai 1823), sid' pajad radoiba sijaližel raudal soišpäi. Puine lidnuz oli olmas Kostrom-jogen hural randal 16. voz'sadal. Mouckiven löudmižsijad abutihe leta kivižid sauvusid jo 17. voz'sadal.

Soligalič sai makundan lidnan oficiališt statusad vl 1778. Mecan varhapanend da ümbriradmine leviganzi 20. voz'sadaspäi. Sarak Monzan raudtespäi tuli lidnha 1960-nzil vozil.

Soligalič šingotase klejatud pukonstrukcijoiden kompanijal^[1], sömtegimištol (konservtegim^[2]), mouckiven kombinatal^[3] pohjoižes Turovk-ezilidnas, turizmal, bal'neologižeks kurortaks (vspäi 1841).

Geografijan andmused

Lidn sijadase rajonan keskuzpalas, Kostrom-jogen (Volgan hura ližajogi) üläjoksmusen oiktal randal tobjimalaz, 130 m ü.m.t. keskmäižel korktusel, ani päivlaskmha Galičun ülüdespäi. Matkad Vologdan agjan röunhasai om 15 km lodeheze orhal vai Monzan raudtedme, agjan Kostrom-keskushesai om 165 km suvhe-suvipäivlaskmha orhal vai 220 km avtotedme. Lähembaine lidn om Čuhlom 42 km suvipäivnouzmha orhal vai 48 km avtotedme.

Klimat om ven kontinentaline. Voden keskmäine lämuz om +2,9 C°, kezakun-elokun +15,5..+18,0 C°, tal'vkun-uhokun −9,0..−11,6 C°. Ekstremumad oma −52,8 C° (viluku) i +36,4 C° (heinku). Kezaaigan minimum om −3,4 C° (eloku), tal'vaigan maksimum om +7,2 C° (tal'vku). Ei voi panda halad heinkus vaiše. Paneb sadegid 600 mm vodes, enamba kezakus-uhokus (70..79 mm kus), vähemba uhokus-keväz'kus (28..29 mm kus).

Tobmuz

Soligalič oli lidnankundan üks'jäižeks eländpunktaks. Lidnankundan pind oli 54,2 km². Vn 2023 keväz'kus kätihe rajonad ümbrikoks, sen lidankundad — territorialižeks palakundaks.

Lidnan Administracijan jäl'gmäine pämez' om Väčeslav Čižikov (2008 — heinku 2018). Vspäi 2019 lidnan Administracii oli likvidacijan pordhal, Soligaličun rajonan administracii tegi lidnankundan administracijan velgusidme. Sen jäl'ghe lidnan Deputatoiden nevondkundan ezimez' oli lidnankundan pämehen.

Eläjad

Vn 2010 Venäman rahvahanlugemižen mödhe lidnan eläjiden lugu oli 6 438 ristitud, rajonan kaks' koumandest, vn 2021 — 5 534 ristitud. Vl 2017 lidnan ristitišt oli 5 976 eläjad. Kaikiš suremb lidnan ristitišt oli 7 500 eläjad vl 1992.

Rahvahad (enamba 0,4 % vl 2021): venälaižed — 97,7 %, toižed rahvahad — 1,4 %, rahvahuden ozutandata — 0,9 %.

Ortodoksižen hristanuskondan kümne pühäpertid^[4] oma kaičenus lidnas, niišpäi äjad ei ole rados: Hristan Eläbzdusen jumalankodi ühtennimiženke päjumalanpertinke, Jumalanmaman Sündundan päjumalanpert', Ristan Zdviženjan (Borisan da Gleban) päjumalanpert' i seičeme jumalanpertid.

Lapsiden opendusen aluzkundad oma kaks' päivkodid, keskškol, lapsiden sädamižen pert'. Čuhloman mectegimišton tehnikuman Soligaličun filial^[5] om lidnan professionaližen opendusen aluzkundaks.

Galerei

Soligaličun rajonan administracijan sauvuz (2020)
Ph. Jumalanmaman sündundan päjumalanpert' (huralpäi) i Sündun Eläbzdusen mez'jumalankodi (oiktalpäi), vn 2020 nägu
Torguindrividen päivnouzmaine korpus vl 2020
Kul'turkeskuz (2014)
Avtotesild joges päliči vl 2014
Soligalič-raudtestancijan sauvuz vl 2014