Manturovo

Manturovo (ven.: Ма́нтурово) om Venäman lidn da lidnümbrik Kostroman agjan keskuzpalan päivnouzmas. Se om Manturovon rajonan administrativižeks keskuseks mugažo, ei mülü sihe.

Manturovo
Мантурово

Lidnanznam	Flag
Valdkund	Venäma
Eläjiden lugu (2021)	13,043 ristitud
Pind	16 km²
Pämez'	Igor' Ustüžanin (keväz'ku 2021—, Игорь Устюжанин)
Telefonkod	+7−49 446-xx-xxx
Avtokod	44
Aigvö	UTC+3 (MSK+0)

Istorii

Eländpunkt mainitase vl 1617 kuti külä. Se oli peneks küläks hätken, no vspäi 1870 Kologrivan makundan suim päti kerata torgust külän agjas joga nedalil i Nikol'skai-jarmankad kerdan vodes. Vspäi 1906 «Vologd — Vätk»-raudtekeskust radaškanzi külänno, saudihe nell' mecpilindtegint edel Oktäbrin revolücijad, järed vugonk mäni Unž-jogedme. Ühtištadihe nenid eländpunktoid külänke: bajarišton koume usadibad, Nikolo-Mokrovskoje-žilo (valdmoidenke), Berežki-külä.

Vspäi 1929 Manturovo om rajonan keskuseks, kätihe radnikžiloks sil-žo vodel. Se sai lidnan statusad vn 1958 11. sulakud, ühtištadihe Jurovskii-radnikžilonke fanerantegimenno. Lidn lainzi amuist Gradilevo-žilod (1962), Rečkovo-, Vešnäkovo- i Žarihino-külid (1966).

Manturovo šingotase mecan ümbriradmižel (faneran kombinat, mecpilindan 22 edheotandad), medicinižel tegimištol (koume edheotandad), sömtegimištol (mineralveded, lihaproduktad, sagud).

Geografijan andmused

Lidnan sijaduz ümbärdajas rajonas i agjas vn 2006 kartal

Lidn sijadase Unž-jogen oiktal randal, 120 m ü.m.t. keskmäižel korktusel.

Matkad agjan administrativižhe Kostrom-keskushesai om 234 km päivlaskmha-suvipäivlaskmha orhal, 262 km avtotedme vai raudtedme. Lähembaižed lidnad oma Šarj nell'kümne kilometrad päivnouzmha orhal, 53 km avtotedme vai raudtedme, i Nei 51 km päivlaskmha orhal i 61 km avtotedme vai Transsib-raudtedme.

Tobmuz

Lidnümbrikon sijaduz agjas vn 2015 kartal

Manturovo om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez'. Edeline lidnan Administracijan pämez' om Aleksei Smirnov (heinku 2018 — viluku 2021). Lidnümbrikon Duman ezimez' om Aleksandr Makarov vn 2018 kül'mkuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 17 479 ristitud, vn 2021 — 13 043 ristitud. Vl 2017 kaik 15 619 ristitud elihe lidnas. Kaikiš suremb lidnan ristitišt oli 21..22 tuhad eläjid vll 1970−1998 (22 574 rist. vl 1979).

Rahvahad (enamba 0,4 % vl 2021): venälaižed — 96,9 %, toižed rahvahad — 2,2 %, rahvahuden ozutandata — 0,9 %.

Ortodoksižen hristanuskondan kaks' jumalanpertid oma avaitud lidnas: ph. Mikulai-čudonsädajan (1836) i Jumalanmaman «Kaiken caric»-jumalaižen (letihe vll 2014−2016).

Lapsiden opendusen aluzkundad oma päivkodid, keskškolad, joudan keskuz, čomamahtoiden škol, norišton «Junost'»-keskuz, sportškol. Manturovon politehnine tehnikum om lidnan professionaližen opendusen aluzkundaks.

Galerei

• 
  Vezičuhunduz raudtestancijanno (2020)
• 
  Ph. Mikulai-čudonsädajan jumalanpert', vn 2015 nägu
• 
  Kul'turkeskuz (2020)
• 
  Manturovo-päraudtestancijan sauvuz vl 2014

Irdkosketused

• Lidnümbrikon tobmuden sait (manturovo.kostroma.gov.ru). (ven.)
• Manturovon kodirandantedištandmuzejan sait (mk-museum.kst.muzkult.ru). (ven.)