Kalačinsk

Kalačinsk (ven.: Калачинск) om Venäman lidn da lidnankund Omskan agjan päivlaskmas. Se om Kalačinskan rajonan administrativine keskuz.

Kalačinsk
Калачинск

Lidnanznam
Valdkund	Venäma
Eläjiden lugu (2021)	22,297 ristitud
Pind	25,13 km²
Pämez'	Aleksei Basov (kül'mku 2020—)
Telefonkod	+7−38 155-xx-xxx
Avtokod	55
Aigvö	UTC+6 (MSK+3)

Istorii

Eländpunktan aluz om pandud vl 1794 kuti Kalačiki-külä vai Kalač. Vl 1896 saudihe Transsiban stancijad 2 km suvhe žilospäi, ned ühtištuiba aigan mändes. Vozil 1920−1925 se sai makundan lidnan statusad i nimitihe nügüdläižikš, sid' oli žiloks möst. Vl 1943 kätihe Kalačinskad radnikžiloks, vn 1952 27. päiväl kül'mkud — lidnaks tošti.

Kalačinsk šingotase mehanižel tegimel (maižanduzazeged, katl'ad) i keramižen savičun tegimel, mugažo maidtegim, leibänkombinat i raudtedepo ratas lidnas.

Geografijan andmused

Lidn sijadase Om'-jogen (ven.: Омь, Irtišan oiged ližajogi) hural randal tobjimalaz, 100 m ü.m.t. keskmäižel korktusel. Matkad Omskan röunhasai om 65 km päivlaskmha raudtedme vai avtol. Toine lähembaine lidn om Tatarsk (Novosibirskan agj) 90 km päivnouzmha Transsibal vai avtotedme.

Kalačinsk om lidnankundan üks'jäine eländpunkt. Lidnankundan Nevondkund radab (2020). Lidnan administracii om likvidiruidud vl 2015, rajonan administracii tegeb sen velgusidme.

Eläjad

Vn 2010 Venäman rahvahanlugemižen mödhe eläjiden lugu oli 23 556 ristitud, rajonan pol'. Kaikiš suremb ristitišt oli 26 tuhad eläjid vl 1998.

Professionaližen opendusen aluzkund om Kalačinskan agrariž-tehnine tehnikum.

Galerei

• 
  Memorialine sein Suren sodan pölištunuzile (2016)
• 
  Lidnan kodirandantedištandmuzei (2016, ende škol, P.E. Osminin-vägimez' openui siš)
• 
  Kalačinskai-päraudtestancijan sauvuz vl 2021

Irdkosketused

• Lidnan i Kalačinskan rajonan tobmuden aluzkundoiden sait (kalach.omskportal.ru). (ven.)