Livan

Livan (arab.: لُبْنَان Lubnān, sijaline virkand: [lɪbˈneːn]), täuz' oficialine nimi — Livanan Tazovaldkund (arab.: الجمهورية اللبنانية al-Jumhūriyyah al-Lubnāniyyah, Al'-Džumhurija al'-Lubnanija), om valdkund Päivlaskmaižes Azijas, Keskmeren randal. Sen pälidn da kaikiš suremb lidn om Beirut.

Livanan Tazovaldkund
الجمهورية اللبنانية
(Al'-Džumhurija al'-Lubnanija)

Flag	Valdkundznam
Pälidn	Beirut
Eläjiden lugu (2018)	6,100,075 ristitud
Pind	10,452 km²
Kel'	araban
Valdkundan pämez'	Mišel' Aun
Päministr	Hasan Diab
Religii	islam, hristanuskond
Valüt	Livanan funt (LBP)
Internet-domen	.lb
Telefonkod	+961
Aigvö	tal'vel UTC+2, kezal UTC+3

Istorii

Vn 1943 22. päiväl kül'mkud Livan tedištoiti ičeze ripmatomudes Francijaspäi.

Vn 1926 semendkun 23. päivän vahvištadud Konstitucii (völ edel ripmatomut) tirpi järgenduselišt udištamišt vl 1990.

Vozil 1975−1990 sur' Rahvahanikoiden soda tegihe valdkundas.

Geografijan andmused

Livanan topografine kart (2007)

Valdkund otab Keskmeren päivnouzmaižen randan palad. Mererandan piduz om 225 km.

Livan om mavaldkundröunoiš Sirijanke pohjoižes da päivnouzmas (röunoiden piduz — 375 km), Izrailinke suves (79 km). Ühthine röunoiden piduz — 454 km.

Mererandaline alangišt om vaiše severt-se kilometrid levette. Mäged ottas valdkundan tobmad palad, ned oma Livan- da Antilivan-mägisel'gad. Kaikiš korktemb čokkoim om Livan-sel'gan Kurnat as Saud-mägi, 3088 m valdmeren pindan päl.

Klimat om Keskmeren tropine. Keskmäine lämuz kezal om +28 C° mererandal, +22 C° mägil; tal'vel +13° da +6°. Paneb sadegid 400 mm vodes mererandal, 1000 mm mägipautkil. Tal'vel om vilukaz da neps (mägil lämuz om alemba noläd, sigä paneb lunt, se ei suland lophu kezhasai). Kezal om räk da kuivahk. Lete- da pölütorokad oleskeldas.

Londuseližed varad oma vezi, raudkivendod, mouckivi, keitandsol.

Politine sistem

Livanan parlamentan pert' Beirutas, heinku 2005

Ohjandusen form om unitarine parlamentine tazovaldkund äjiden partijoiden sistemanke. Valdkundan pämez' om prezident (arab.: رئيس الجمهورية اللبنانية Rajijs aldžumhuriat allubnania). Parlament valičeb händast kudeks vodeks, üks'jäižeks strokuks. Prezident vahvištab ohjastusen päministrad parlamentan nevondan mödhe. Kvotad uskondan mödhe ottud kaikes tobmudes: prezident om hristanuskoi, päministr om islamanuskoi. Ministrišton radsijad alajagasoiš mugažo: pol'ohjastust oma hristanuskojad, ohjastusen kahtenz' pol' oma islamanuskojad.

Livanan parlament om üks'kodine Ezitajiden Suim (araban kelel: مجلس النواب Mažlis an-Nuvvab) 128 ühtnijanke, sidä kesken 64 oma hristanuskojišpäi, 64 — islaman uskojišpäi.

Vn 2018 semendkun 6. päiväl Livanan parlamentoiden ühtnijoiden valičendad oliba (valdkundan parlamentha sidä kesken), edeližed valičendad oliba vl 2009. Vn 2016 redukun 31. päiväl prezidentan pit'kastunuded valičendad parlamentas oliba, Mišel' Aun om valitud, hän-žo tegi prezidentan velgusidme vll 1988 (sügüz'ku) − 1990 (reduku). Hasan Diab radab päministran vn 2020 vilukun 21. päiväspäi.

Administrativiž-territorialine jagand

   Kacu kirjutuz: Livanan administrativiž-territorialine jagand.

Livanan Tazovaldkund jagase kudeks agjaks (arab.: muhafaza). Agjad alajagasoiš, päiči Beirut-pälidnas, 25 ümbrikoks (arab. kadaa). Ümbrikod jagasoiš municipalitetoikš (arab. nahija).

Eläjad

Vn 2013 Livanan kart rahvahan da uskondan levigandusen mödhe

Livanas elädas livanalaižed: arabialaižed — 95 %, armenijalaižed — 4 %, toižed rahvahad — 1 %. Arabad-hristanuskojad nimitadas ičtase finikijalaižikš. Vn 2014 heinkus valdkundan ristitišt oli 5 882 562 eläjad. Kaikiš suremb valdkundan ristitišt oli 6,4 mln eläjid vl 2015, pordaigaližidenke migrantoidenke Sirijaspäi päpaloin. Valdkundan ristitišt migrantoita om läz 4 mln eläjid.

Uskondan mödhe (2017): islamanuskojad — 57,7 % (28,7 % sunnitad, 28,4 % šijitad, toižed oma alavitad da ismailitad), hristanuskojad — 36,2 % (kaikiš suremb religijankund om katolikad), druzad — 5,2 %, toižed uskojad — 0,9 %.

Livanan toižed sured lidnad (enamba 100 tuh. ristituid, surembaspäi penembha): Tripoli, Sidon, Zahle, Alei. Kaik om läz tuhad lidnoid valdkundas. Lidnoiden ristitišton mär om 56 %.

Ižanduz

Livan om šingotai agrariž-industrialine ma, keskmäižen šingotesen. Valdkundan maižanduz om kaikiš enamba šingotadud araban mail'mas. Industrijan päsarakod oma kaivuztegimišt, himine, kivivoin i diamantoiden ümbriradmine, metalloiden tehmine, pumaterialiden i meblin pästand, sauvond i cementan tehmine, sömtegimišt (sidä kesken vinad), banking, turizm.

Vl 2012 valdkundan päeksport oli kuld (21 %), juvelirižed tegesed da kalližarvoižed kived (11 %), elektromašiništ (10 %); toine eksport — raud, vas'k, alüminii, cement, kirjad, fruktad.

Irdkosketused

• Livanan parlamentan oficialine sait (lp.gov.lb). (arab.)
• Livanan prezidentan oficialine sait (presidency.gov.lb). (angl.) (arab.) (fr.)
• Livanan ohjastusen oficialine sait (pcm.gov.lb). (arab.)
• Livanan e-ohjastusen oficialine portal (dawlati.gov.lb). (angl.) (arab.) (fr.)