Kambodž

Kambodž (enzne kävutadud nimi oli Kampučii), oficialižikš Kambodžan Kunigahuz (khmer. Preăh Réachéanachâk Kâmpŭchéa, transkripcii: Preah Reatjeannatjakr Kamputjie), om valdkund Suvipäivnouzmpol'žes Azijas, Indokitai-pol'saren suves. Sen päine da kaikiš suremb lidn om Pnompen'.

Kambodžan Kunigahuz

(Preăh Réachéanachâkr Kâmpŭchéa)

Flag	Valdkundznam
Pälidn	Pnompen'
Eläjiden lugu (2017)	16 204 486 ristitud
Pind	181 035 km²
Kel'	khmeran
Valdkundan pämez'	Norodom Siamoni
Päministr	Hun Sen
Religii	buddizm
Valüt	kambodžan riel' (KHR)
Internet-domen	.kh
Telefonkod	+855
Aigvö	UTC+7

Südäiolend

Istorii

Vn 1953 9. päiväl kül'mkud Kambodž sai ripmatomut Francijaspäi.

Geografijan andmused

Kambodžan topografine kart.

Kambodž om mavaldkundröunoiš Tailandanke lodehes (803 km), Laosanke pohjoižes (541 km) da Vjetnamanke päivnouzmas (1228 km). Sen suvipäivlaskmaižed randad lainištab Tünen valdmeren Kitain Suvimeren Siaman laht. Randpird om 443 km.

Om koume mägisel'gad man laptoiš: Kravan'-mäged läz randištod, Elefan-mägisel'g suves da Dangrek pohjoižes. Kaikiš korktemb čokkoim om Oral'-mägi Kravan'-mägiš, 1813 m meren pindan päl. Kambodžan päjogi om Mekong, se läbitab kaiken man da jokseb suvehe. Kaikiš suremb järv om Tonlesap-järv.

Tobmuz

Ohjandusen form om unitarine parlamentine konstitucine monarhii. Oficialine valdkundan pämez' om Norodom Siamoni-kunigaz (vn 2004 29. päivälpäi redukud), hän om Norodom Sianukan poig. Kunigahan Valdištmen Nevondkund valičeb monarhad. Monarh hüvästab alakodin päministran kandidatad. Päministr om Hun Sen (vn 1998 30. päiväspäi kül'mkud).

Käskusenandmižtobmuz om parlament, se om kaks'kodine. Senat om üläkodi, mülüb 61 ühtnijad (57 — valitas oficialižel valičijoiden kollegijal, kahted — moharhal, kahted — alakodil, kaikid — 5 vodeks). Alakodi, Nacionaline Suim, mülüb 122 ristitud (rahvaz valičeb, mugažo 5 vodeks).

Käskuzkundaline tobmuz om Ülembaine Sudijoiden Nevondkund.

Administrativiž-territorialine jagand

   Kacu kirjutuz: Kambodžan administrativiž-territorialine jagand.

Administrativiž-territorialižikš Kambodž jagase 23 agjaha (provincijha, khmer.: khet) da 1 keskuseližikš ohjatud lidnha. Päiči pälidnas, ned alajagasoiš 185 ümbrikho (khmer. srok), sid' ned — 1621 kommunha (khmer. khum).

Eläjad

Kambodžas elädas kambodžalaižed. Khmeralaižed ottas läz ühesad kümnendest ristitištos. 96% eläjid pagižeb khmeran kelel.

Toižed järedad lidnad (enamba 100 tuh. ristituid vl 2012): Takmau, Battambang, Sisophon, Siemreap, Kampongtäm, Sianukvil'. Kaik om 25 lidnad valdkundas.

Rahvahanižanduz

Vl 2009 Kambodžan päeksport oli erazvuiččed sobad (läz 80%); toine eksport — metallatoi (magnitatoi) lete (5%), kuld (4%), velosipedad (2%).

Irdkosketused

• Venäman sur'oigenduzkundan Kambodžan kunigahuses oficialine sait (embrusscambodia.mid.ru). (ven.) (angl.)
• Kambodžan röunantagaižiden azjoiden da rahvahidenkeskeižen kooperacijan ministrusen oficialine sait (mfaic.gov.kh). (angl.) (khmer.)
• Kambodžan Statistikan Nacionaližen Institutan sait (nis.gov.kh). (angl.)