Kambodž (khmer.: កម្ពុជា [kam.pu.ciə]), enzne kävutadud nimi oli Kampučii, oficialižikš Kambodžan Kunigahuz (khmer.: ព្រះរាជាណាចក្រកម្ពុជា Preăh Réachéanachâk Kâmpŭchéa, transkripcii: Preah Reatjeannatjakr Kamputjie), om valdkund Suvipäivnouzmpol'žes Azijas, Indokitai-pol'saren suves. Sen päine da kaikiš suremb lidn om Pnompen'.

Kambodžan Kunigahuz
ព្រះរាជាណាចក្រកម្ពុជា
(Preăh Réachéanachâkr Kâmpŭchéa)
 Flag
 Valdkundznam
Pälidn Pnompen'
Eläjiden lugu (2017) 16,204,486[1] ristitud
Pind 181,035 km²
Kambodžan Kunigahuz ព្រះរាជាណាចក្រកម្ពុជា (Preăh Réachéanachâkr Kâmpŭchéa)
Kel' khmeran
Valdkundan pämez' Norodom Siamoni
Päministr Hun Sen
Religii buddizm
Valüt kambodžan riel' (KHR)
Internet-domen .kh
Telefonkod +855
Aigvö UTC+7

Istorii vajehta

Vn 1953 9. päiväl kül'mkud Kambodž sai ripmatomut Francijaspäi.

Valdkundan ezmäine Konstitucii oli olmas vspäi 1947. Nügüdläine kudenz' lugul Konstitucii[2] om vahvištadud vl 1993, sen vn 2008 versii om väges.

Geografijan andmused vajehta

 
Kambodžan topografine kart.

Kambodž om mavaldkundröunoiš Tailandanke lodehes (803 km), Laosanke pohjoižes (541 km) da Vjetnamanke päivnouzmas (1228 km). Sen suvipäivlaskmaižed randad lainištab Tünen valdmeren Kitain Suvimeren Siaman laht. Randpird om 443 km.

Om koume mägisel'gad man laptoiš: Kravan'-mäged läz randištod, Elefan-mägisel'g suves da Dangrek pohjoižes. Kaikiš korktemb čokkoim om Oral'-mägi Kravan'-mägiš, 1813 m meren pindan päl. Kambodžan päjogi om Mekong, se läbitab kaiken man da jokseb suvehe. Kaikiš suremb järv om Tonlesap-järv.

Tobmuz vajehta

 
Parlamentan Nacionaližen Suiman sauvuz Pnompeniš.

Ohjandusen form om unitarine parlamentine konstitucine monarhii. Oficialine valdkundan pämez' om Norodom Siamoni-kunigaz (vn 2004 29. päivälpäi redukud), hän om Norodom Sianukan poig. Kunigahan Valdištmen Nevondkund valičeb monarhad. Monarh hüvästab alakodin päministran kandidatad. Päministr (ministrišton ezimez', khmer.: នាយករដ្ឋមន្ត្រីនៃព្រះរាជាណាចក្រកម្ពុជា, transkripcii vepsän kirjamil: Neajuok Rodthamontrei nei Preahreatjeannatjakr Kamputjie) om Hun Sen, radab vn 1998 30. päiväspäi kül'mkud.

Käskusenandmižtobmuz om parlament, se om kaks'kodine. Senat (khmer.: ព្រឹទ្ធសភា Protsaphea) om üläkodi, mülütab 62 ühtnijad, sidä kesken 58 ezitajad valitas agjoiden suimil, kaks' — moharhal, kaks' — alakodil, kaikid — kudeks vodeks. Alakodi om Nacionaline Suim (khmer.: រដ្ឋសភា Radhsphea), se kogoneb 125 ristituspäi, rahvaz valičeb heid videks vodeks.

Käskuzkundaline tobmuz om Ülembaine Sudijoiden Nevondkund.

Parlamentan üläkodin järgvaličendad oliba vn 2018 25. päiväl uhokud, alakodin — vn 2018 29. päiväl heinkud.

Administrativiž-territorialine jagand vajehta

   Kacu kirjutuz: Kambodžan administrativiž-territorialine jagand.

Administrativiž-territorialižikš Kambodž jagase 23 agjaks (provincijaks, khmer.: khet) da 1 keskuseližikš ohjatud lidnaks. Päiči pälidnas, ned alajagasoiš 185 ümbrikoks (khmer. srok), sid' ned — 1621 kundaks (kommunaks, khmer. khum).[3]

Eläjad vajehta

Kambodžas elädas kambodžalaižed. Khmeralaižed ottas läz ühesad kümnendest ristitištos. Eläjiden 96% pagižeb khmeran kelel.

Uskondan mödhe (2013): buddistad — 97,9% (oficialine religii), islamanuskojad — 1,1%, hristanuskojad — 0,5%, toižed uskojad i religijatomad — 0,6%.

Toižed järedad lidnad (enamba 100 tuh. ristituid vl 2012[4]): Takmau, Battambang, Sisophon, Siemreap, Kampongtäm, Sianukvil'. Kaik om 25 lidnad valdkundas.

Rahvahanižanduz vajehta

Vl 2009 Kambodžan päeksport oli erazvuiččed sobad (läz 80%); toine eksport — metallatoi (magnitatoi) lete (5%), kuld (4%), velosipedad (2%). Turizm om valdkundan ižandusen znamasine sarak.

Homaičendad vajehta

  1. Kambodžan ristitišton endustuz vn 2017 heinkus // Mail'man faktoiden kirj. — Cia.gov. (angl.)
  2. Kambodžan Konstitucijan tekst constituteproject.org-saital. (angl.)
  3. Päandmused Kambodžan polhe. — Stat.go.jp. (angl.)
  4. Kambodž: kaikiš surembad lidnad da niiden ristitišton statistik. — Worldgazetteer.com. (angl.)

Irdkosketused vajehta



Azijan valdkundad
 
Azijan valdkundad
Afganistan | Araban Ühtenzoittud Emiratad (AÜE) | Armenii | Azerbaidžan1 | Bahrein | Bangladeš | Brunei | Butan | Egipt2 | Filippinad | Gruzii1 | Indii | Indonezii3 | Irak | Iran | Izrail' | Japonii | Jemen2 | Jordanii | Kambodž | Kazahstan1 | Katar | Kipr1 | Kirgizstan | Kitai | Korejan Rahvahaliž-Demokratine Tazovaldkund | Korejan Tazovaldkund | Kuveit | Laos | Livan | Malaizii | Mal'divan Sared | Mjanmar | Mongolii | Nepal | Oman | Pakistan | Päivnouzmaine Timor | Saudan Arabii | Singapur | Sirii | Šrilank | Tadžikistan | Tailand | Turkanma1 | Turkmenistan | Uzbekistan | Venäma1 | Vjetnam

1 Om Evropas mugažo. 2 Om Afrikas mugažo. 3 Om Valdmerimaiš mugažo.