Minsk

Minsk (vaugedvenäkelel: Мінск, venäkelel: Минск, vodhesai 1939 — Mensk) om Vaugedvenäman pälidn, Minskan agjan da Minskan rajonan adminisrativine keskuz (niihe adminisrativižhe ühtnikoihe iče lidn ei mülü), vägilidn.

Minsk
Мінск (vaug.)
Минск (ven.)

Lidnanznam	Flag
Valdkund	Vaugedvenäma
Eläjiden lugu (2019)	1,992,685 ristitud
Pind	348,84 km²
Pämez'	Anatolii Sivak (kül'mku 2018—. Анатоль Сівак)
Telefonkod	+375−17
Aigvö	UTC+3

Lidnan administrativine jagand (2011)

Nece om valdkundan politine, ekonomine, kul'turine da tedoline keskuz. Minskas om Ripmatomiden Valdkundoiden Ühtnendan päfater.

Istorii

Ezmäine johtutez lidnas vasttase vodel 1067 «Aigaižiden voziden starinas». Vodelpäi 1242 Minsk oli Litvanmas (möhemba — Sures Litvanman Ruhtinazkundas). Vodel 1499 lidn sai Magdeburgan oiktust. Vodelpäi 1793 Minsk oli Minskan gubernijan pälidnaks Venälaižes imperijas. Vodel 1871 Minsk sidotihe raudtel Moskvaha da Varšavaha. Vodelpäi 1919 vodehesai 1991 se oli Vaugedvenäman NST:n pälidnan. Suren Tatanmaižen sodan aigan 70 000 minskalašt oli riktud, lidn oli muretud.

Vodespäi 1991 Minsk om ripmatoman Vaugedvenäman pälidn.

Geografijan andmused

Minskan sijaduz om läz valdkundan geografišt keskust, Svisločjogen randal (Dnepran bassein). Lidn seižub Minskan ülüden suvipäivnouzmaižil pautkil, 220 m valdmeren pindan päl keskkorktusel, 181..283 m korktusil. Lähembaine pälidn om Vil'nüs 180 kilometras lodeheze avtotedme.

Baltijan da Mustmeren basseinoiden röun läbitab lidnad. Vezivaradimiden sistem i manaluižed vezipurtked jottas lidnad. Pompatas vet Vilijan vezivaradimespäi (Nemanan bassein) Zaslavlin vezivaradimhe (Minskan meri) lodeheze lidnaspäi, kuspäi vezi jokseb Svisloč-jogehe.

Klimat om ven Atlantižen valdmeren valatoitusenke. Heinkun lämuz om +18,5 C°, vilukun −4,5 C°, uhokun −4,4 C°. Voden keskmäine lämuz om +6,7 C°. Paneb sadegid 690 mm vodes, enamba kezakus-heinkus (89 mm kus).

Minsk jagase 9 administrativižeks rajonaks (vaug.: раён) vspäi 1977, rajonan administracii om kaikuččes. Edel 2006 vot Minskan pind oli 307,8 km².

Eläjad

Vl 1939 ristitišt oli 239 tuh. eläjid. Vodele 1977 se ületi millionad. Vodel 2011 eläjiden lugu oli 1 864,1 tuhad ristituid. Läz 2,65 mln elädas Minskan lidnaglomeracijas (2014).

Rahvahad (vn 2009 rahvahanlugemižen mödhe): vaugedvenälaižed — 85,8%, venälaižed — 10,8%, ukrainalaižed — 1,6%, pol'šanmalaižed — 0,8%, evrejalaižed — 0,3%, toižed rahvahad — 0,7%.

Transport

Avtobusad, trolleibusad, lidnelektrojonused da tramvaid oma kundaližeks transportaks lidnan südäimes. Vspäi 1984 metro radab lidnas. Vl 2019 metros om kaks' linijad 37,2 km pitte da 29 stancijad (vspäi 2014).

Minsk om mugažo kaikiš järedamb transportsol'm Vaugedvenämas. Kümne avtoted lähttas tazovaldkundan kaikihe polihe, M9-trass om Minskan rengazavtote 56 km pitte. Vaugedvenäman M1-kiruhte ühtenzoitab lidnad Moskvanke, matkad om läz 700 km päivnouzmha.

Rahvahidenkeskeine Minsk-lendimport (Minsk-2, MSQ) sijadase 22 km päivnouzmha lidnan keskusespäi, mülüb lidnha. Tehtas reisid Evropan maihe da Azijan erasihe maihe. Penemb rahvahaline Minsk-1-aeroport om sauptud vspäi 2017, uz' lidnan rajon linneb saudud sil territorijal. Minsk-Pasažirski-päraudtestancii (vaug.: Мінск-Пасажырскі), 7 raudtestancijad da 11 seižutezpunktad oma lidnas.

Galerei

• 

  Ohjastusen pert'

• 

  Ülälidn. Ratuš

• 

  Telečuhunduz

Ripmatomuden torg.

Irdkosketused

• Lidnan ohjastusen portal (minsk.gov.by). (ven.) (vaug.) (angl.)