Brüssel'

Brüssel' (alam.: Brussel [ˈbrʏsəl], franc.: Bruxelles [bʁyˈsɛl], saks.: Brüssel) om Bel'gijan pälidn da valdkundan kaikiš suremban lidnaglomeracijan keskuz. Se om mugažo Brüsselin pälidnaižen agjan päkommun.

Brüssel'
Brussel (alam.)
Bruxelles (fr.)
Brüssel (saks.)

Lidnanznam	Flag
Valdkund	Bel'gii
Eläjiden lugu (2022)	188,737 ristitud
Pind	32,61 km²
Pämez'	Filipp Kloz (heinku 2017—, Philippe Close)
Telefonkod	+32-(0)2
Aigvö	tal'vel UTC+1, kezal UTC+2

Brüssel'-lidn (sandal'ne) om üks' 19 kommunaspäi Brüsselin pälidnaižes agjas.

EÜ:n da PAKO:n päfaterad sijadasoiš neciš lidnas.

Etimologii

«Brüssel'»-nimituz sündui alaman kelen vanhiš sanoišpäi: bruoc «so» da sella «külä», «žilo». Ned znamoitas ühthe «külä (žilo) sol».

Istorii

Legend sanub, miše Ph. Gagerik (vai Sen-Žeri) pani lidnan alust 6. voz'sadal meiden erad. Bruocsella-eländpunkt mainitase ezmäižen kerdan vn 966 Suren Ottonan kirjeižes. Vozil 977−979 saudihe lidnust časounänke Sennanjogen sarel, i lidn šingotaškanzihe. Lidnusen sein oli saudud 11. voz'sadal. Phh. Mihailan da Gudulan päjumalanpert' om saudud vozil 1047−1485.

Brüssel' šingotase mašinansauvomižel (mašiništ tegimišton täht), gastronomijal (enamba kaht tuhad restoranoid), om bankoiden keskuseks.

Geografijan andmused

Brüssel' sijadase valdkundan keskuzpalas, 13 m ü.m.t. keskmäižel korktusel. Lidnan pind — 32,61 km².

Klimat om ven valdmeren. Voden keskmäine lämuz om +10,4 C°, kezakun-elokun +16..+18 C°, tal'vkun-uhokun +3,2..+4,5 C°. Ekstremumad oma −21,1 C° i +38,8 C°. Paneb sadegid 818 mm vodes, vähemba uhokus (53 mm) i sulakus (54 mm), toižiš kuiš 62..79 mm kus.

Eläjad

Vl 2013 eläjiden lugu oli 166 497 ristitud, vl 2016 — 178 552 ristitud. Läz kaht millionad ristituid elädas kaikes lidnaglomeracijas.

Edeline lidnan pämez' (mer) om Ivan Majer (tal'vku 2013 — heinku 2017, Yvan Mayeur).

Irdkosketused

• Brüssel'-lidnan ohjastusen oficialine sait (bruxelles.be). (fr.) (alam.) (angl.)