Brazzavil'

Brazzavil' (franc.: Brazzaville [bʁazavil], kongo: Balazavile) om Kongon Tazovaldkundan pälidn da kaikiš suremb lidn.

Brazzavil'
Brazzaville

Valdkund	Kongon Tazovaldkund
Eläjiden lugu (2017)	1,838,348 ristitud
Pind	263,9 km²
Pämez'	Kristian Rožer Okemba (eloku 2017—, Christian Roger Okemba)
Telefonkod	+242−1
Aigvö	UTC+1

Pälidnan sijaduz valdkundas (vn 2011 kart)

Istorii

Eländpunktan aluz om pandud vn 1880 redukus kuti francijalaižiden Nkun-sodapost (franc.: Ncouna) da lidnuz ekspedicijan Pjer Savornjan de Brazza-ohjandajan käskön mödhe. Om olmas nügüdläiženke nimenke vspäi 1884. 19. voz'sadan lopus kävutihe lidnad torguindkeskuseks, vspäi 1903 se tegi kolonijan administrativižiden funkcijoiden mödhe. Vl 1912 saudihe lidnan ičeohjastusen pertid i panihe ezmäšt merad radsijha. Vl 1934 raudte 512 km pitte ühtenzoiti lidnad Atlantižen valdmeren Puent-Nuar-meriportanke, läz 400 km päivlaskmha orhal. Vspäi 1960 Brazzavil' om ripmatoman valdkundan pälidnaks.

Brazzavil' šingotase pälidnan funkcijoil.

Geografijan andmused

Lidnan nägu Man kaimdajaspäi vn 2003 tal'vkus (pohjoižel randal)

Lidn sijadase Kongo-jogen oiktal randal, 320 m ü.m.t. keskmäižel korktusel. Jogiport radab lidnas. KDT:n Kinšas-pälidn seižub vastrandal. Lidnad ühtenzoitasoiš ehtatimil, sild om vaiše projektas niiden keskes.

Klimat om subekvatorialine. Kun lämuz om +22..+27 C° vodes läbi, voden keskmäine lämuz om +25,4 C°. Paneb sadegid 1394 mm vodes, vähemba kaiked kezakus-elokus (16 mm pordos), enamba kaiked kül'mkus (261 mm).

Brazzavil' jagase ühesaks ümbrikoks (franc.: arrondissement).

Eläjad

Vn 2007 Kongon Tazovaldkundan rahvahanlugemižen mödhe lidnan eläjiden lugu oli 1 373 382 ristitud, valdkundan koumandez. Kaikiš suremb lidnan ristitišt om nügüd'.

Rahvahad oma afrikalaižed päpaloin: bakongo, bateke, mboši i sanga.

Religijan mödhe hristanuskojad oma enambuses, om islamanuskojid-ki.

Transport

Avtobusad da taksid oma kundaližeks transportaks lidnas.

Rahvahidenkeskeine soda- da civiline Maja-Mai-lendimport (franc.: Aéroport international Maya-Maya, BZV / FCBB) radab lidnas. Tehtas reisid Afrikan lähižiden maiden surihe lidnoihe, Parižha, Luandha, Kasablankha, Addis-Abebha. Om jügureisid Abu Dabihe, Addis-Abebha, Lagosha, Lüksemburgha.

Sebruzlidnad

• Saksanma Drezden, Saksonii, Saksanma (vspäi 1975)
• Kinšas, Kongon Demokratine Tazovaldkund
• Francii Reims, Francii (1961)

Irdkosketused

• Brazzavil'-kommunan oficialine sait (brazzaville.cg). (fr.) (angl.)