Pretorii

Pretorii (afrikaans- i anglijan kelil: Pretoria) om Suviafrikan Tazovaldkundan pälidn de fakto, prezidentan da ohjastusen olendsija. Lidn mülüb Gauteng-provincijan Tsvane-lidnümbrikho.

Pretorii
Pretoria (afrikaans i angl.)

Lidnanznam	Flag
Valdkund	Suviafrikan Tazovaldkund
Eläjiden lugu (2011)	741,651 ristitud
Pind	687,54 km²
Pämez'	Stivens Mokgalapa (uhoku 2019—)
Telefonkod	+27−012
Aigvö	UTC+2

Pretorii om valdkundan ekonomine, torguind- da tedoline keskuz.

Geografijan andmused

Pretorii sijadase valdkundan pohjoižpäivnouzmaižes poles. Lidn seižub alangištol 1339 m ü.m.t. keskmäižel korktusel. Kukhad kaitas necidä alangištod viluid suvižid tulleid vaste.

Klimat om subtropine neps. Pit'k räk keza (vilukus) da lühüd tal'v (heinkus) oleldas. Paneb lunt tal'vel lujas harvas. Äi päipaštod om vodes läbi. Voden keskmäine lämuz om +18,6 C°. Paneb sadegid 733 mm vodes.

Eläjad

Vn 2011 rahvahanlugemižen mödhe eläjiden lugu oli 741 651 ristitud. Lidnan aglomeracii om 6298 km² surtte, läz 3 mln eläjidenke.

Transport

Pretorii sädab konurbacijad Johannesburganke, miččen keskuz seižub 55 km suvhe. Gautrein-jonused ühtenzoittas lidnan rajonad keskneze, lidnad — rahvahidenkeskeižidenke lendimportoidenke da Johannesburganke.

Kaks' rahvahidenkeskešt lendimportad sijadasoiš lähižes Johannesburgas: O.R. Tambo (JNB) — pälendimport, 45 km suvipolehe Pretorijan keskusespäi, da Lanserii (HLA) — 35 km suvipäivlaskmha Pretorijaspäi. Sen ližaks, üks' lendimport om lidnan pohjoižes penen aviacijan täht. Kaks' il'mvägiden sodabazad om saudud lidnan suves, Svartkop i Voterkluf.

Irdkosketused

• Tsvane-ümbrikon ohjastusen oficialine portal (tshwane.gov.za). (angl.)