Akkr

Akkr (angl.: Accra [əˈkrɑː]) om Ganan pälidn (vspäi 1957) da kaikiš suremb lidn. Se om mugažo Akkr-agjan administrativižeks keskuseks.

Akkr
Accra

Flag
Valdkund	Gan
Eläjiden lugu (2021)	1,782,150 ristitud
Pind	199,4 km²
Pämez'	Elizabet Saki (uhoku 2017—, Elizabeth Kwatsoe Tawiah Sackey)
Telefonkod	+233-(0)30
Aigvö	UTC+0

Suren Akkran neiborhudoiden kart (2010)

Istorii

Eländpunktan aluz om pandud 15. voz'sadal. Danijan, Alamaiden i Suren Britanijan lidnused oma kaičenus. Vhesai 1807 Akkr oli orjantorguindan keskuseks, vll 1877−1957 — Britanijan Kuldrandan pälidnaks. Vspäi 1957 Akkr om ripmatoman valdkundan pälidnaks i ohjastusen sijaduseks.

Akkr šingotase valdkundaližil holitišil, sauvondal, kalanpüdandal, torguindal, penen biznesan edheotandoil, bankoiden keskuseks, finansižil i varmitezkompanijoil. Ganan fondbirž (GSE) radab lidnas vspäi 1989.

Geografijan andmused

Lidn sijadase Gvinejan lahten suvirandal, kukhikahas tahondas, 61 metrad ü.m.t. keskmäižel korktusel.

Klimat om savannan tropine mussonine. Kun lämuz vajehtase +25,6..+29,2 C° röunoiš vodes läbi. Ekstremumad oma +15 C° (viluku) i +38,7 C° (sulaku, kül'mku). Paneb sadegid 798 mm vodes, enamba sulakus-kezakus (430 mm pordos) i redukus (80 mm), vähemba tal'vkus-uhokus (12..27 mm kus) i elokus (21 mm). Kun keskmäine relätivine nepsuz vajehtase 77..85 % röunoiš voden aigan. Kaikiš päivoikahambad kud oma reduku i kül'mku.

Tobmuz

Lidnan alaümbrikod (2017)

Akkr jagase koumetoštkümneks alaümbrikoks, niiden formiruind tuli lophu vodele 2019: Akkr-lidnan metropolitenine ümbrik i koume submetropoliteništ ümbrikod, 12 nimitadud municipališt ümbrikod.

Suren Akkran regionan pämez' (mer) om ministr (angl.: Deputy Greater Accra Regional Minister). Arni Akkr-lidnan metropolitenižen ümbrikon mer om Mohammed Adžei Sovah (Mohammed Adjei Sowah) vn 2017 keväz'kuspäi.

Eläjad

Vn 2012 rahvahanlugemižen mödhe lidnrajoniden eläjiden lugu oli 2 291 352 ristitud 225,67 nellikkilometrad pindal. Vl 2010 kaik 4 010 054 ristitud elihe lidnan aglomeracijas (Akkr-agjas, kahtenz' surtte agj valdkundas) 3245 km² pindal, vn 2021 rahvahanlugemižen mödhe — 5 455 692 ristitud.

Transport

Avtobusad da taksid oma kundaližeks transportaks lidnas. Meriport radab. Raudte ühtenzoitab Tem-ezilidnanke.

Rahvahidenkeskeine Kotok-lendimport (angl.: Kotoka, ACC / DGAA, 3,1 mln passažiroid vl 2023) sijadase kümnes kilometras päivlaskmha lidnan keskuzpalaspäi. Sil soda- da civiline kävutand oma olmas. Tehtas reisid Afrikan i Evropan järedoihe lidnoihe, Nju Jorkha i Dubaihe.

Sebruzlidnad

• AÜV Čikago, Illinois, AÜV (vspäi 1989)
• AÜV Vašington, Kolumbijan federaline ümbrik, AÜV (2006)

Irdkosketused

• Akkr-ümbrikon ohjastusen oficialine portal (ama.ghanadistricts.gov.gh). (angl.)