Maseru

Maseru (mugažo sesoto- da anglijan kelil; kändase sesoton kelespäi «rusttan čurukiven sija») om Lesoton pälidn da kaikiš suremb lidn, agrarižen valdkundan industrialine keskuz. Se-žo om Maserun ümbrikon administrativine keskuz.

Maseru

Valdkund	Lesoto
Eläjiden lugu (2016)	330,760 ristitud
Pind	138 km²
Telefonkod	+266
Aigvö	UTC+2

Kingsvei-ird

Istorii

Eländpunktan aluz om pandud vl 1869 policijan lagerikš kuti britanižen Basutolend-protektoratan pälidn. Vspäi 1966 om ripmatoman valdkundan pälidnaks. Eli läbi järgendusetomuziš 1990-nzil vozil.

Maseru šingotase sömtegimištol, sobiden tehmižel, torguindal i turizmal. Valdkundan finansoiden i üläopendusen keskuz.

Geografijan andmused

Lidn sijadase valdkundan lodehliženno rounanno Suviafrikan Tazovaldkundanke, 1600 m valdmeren pindan päl, Kaledon-jogen (sesoto: Mohokare) hural randal.

Sild Kaledon-joges päliči ühtenzoitab lidnad SAT:anke vspäi 1905. Raudtesol'm radab lidnas.

Klimat om subtropine mägiden vihmsezonanke (reduku-sulaku). Voden keskmäine lämuz om +15 C°, tal'vkus-uhokus +20..+22 C°, kezakus-heinkus +9 C°. Ekstremumad oma −3 C° i +33 C°. Paneb sadegid 691 mm vodes, vähemba semendkus-sügüz'kus (12..29 mm kus).

Eläjad

Vn 1966 rahvahanlugemižen mödhe, Maserun eläjiden lugu oli 28 tuhad ristituid. Ripmatomuden tedotusen jäl'ghe ristitišt ližadaškanzi teravas, äi ekspatriantoid tuliba elämižhe Maseruhu. Läz 430 tuhad eläjid om lidnaglomeracijas (2006).