Klivlend

Klivlend (angl.: Cleveland [ˈkliːvlənd]) om AÜV:oiden lidn pohjoižpäivnouzmaiženno röunanno. Se om Ogajo-štatan kahtenz' surtte lidn, Kajahogan ümbrikon (1180 km² kuivmad) administrativine keskuz.

Klivlend
Cleveland

Lidnanznam	Flag
Valdkund	Amerikan Ühtenzoittud Valdkundad
Eläjiden lugu (2022)	361,607 ristitud
Pind	213,62 km²
Pämez'	Džastin Bibb (viluku 2022—, Justin Bibb)
Telefonkod	+1−216-xxx-xxxx
Aigvö	tal'vel UTC−5, kezal UTC−4

Sil sanal voib olda toižid znamoičendoid; miše nähta niid, tulgat tänna.

Lidnan transportkart (2011)

Istorii

Eländpunktan aluz om pandud Mozes Klivlendal (angl.: Moses Cleaveland, jenaral da politikanmez', eli 1754−1806) vl 1796, om nimitadud alusenpanijan kanzannimen mödhe. Klivlend-külä sai oficiališt lidnan statusad vl 1836.

Klivlend šingotase tervhudenkaičendal. Nened kompanijad Fortune 500-nimikirjutesespäi baziruišoiš lidnas i Kajahogan ümbrikos: Cleveland-Cliffs (terasen tehmine), Progressive Corporation (avtoiden varmituz), Sherwin-Williams (sauvondmujud i krepindad), Parker-Hannifin (azotimed, klimatkontrol', fil'truind i toižed ladimed ohjandusen likundal täht), KeyCorp (banking) i Travel Centers of America (jüguavtoiden seižundtahoiden verk).

Geografijan andmused

Lidn sijadase Erinjärven suvirandal i langenijan sihe Kajahog-jogen randoil (angl.: Cuyahoga), valdkundröunanno, 199 m ü.m.t. keskmäižel korktusel. Kanad levitase järven vastrandal.

Klimat om ven kontinentaline subtropižen röunal. Keza om päivoikaz, tal'vaig om pil'vekaz. Voden keskmäine lämuz om +11,3 C°, kezakun-elokun +21,3..+23,6 C°, tal'vkun-uhokun −1,6..+1,3 C°. Ekstremumad oma −29 C° (viluku) i +40 C° (kezaku). Kezaaigan minimum om −1 C° (kezaku), tal'vaigan maksimum om +25 C° (tal'vku, uhoku). Ei voi panda halad heinkus-elokus, sügüz'kun minimum om 0 C°. Paneb sadegid 1042 mm vodes, enamba sulakus-redukus (90..100 mm kus), vähemba uhokus (63 mm). Paneb lunt 162 sm 46 päiväd tal'ves, lumikatken keskmäine korktuz sase 19 santimetrhasai vilukus-uhokus. Kun keskmäine relätivine nepsuz vajehtase 66..74 % röunoiš voden aigan. Järven veden keskmäine lämuz kuidme om +0,6 (uhoku) ..+24,6 C° (eloku).

Eläjad

Lidnan neiborhudad (2017)

Vn 2010 rahvahanlugemižen mödhe lidnan eläjiden lugu oli 396 815 ristitud, vn 2020 — 372 624 ristitud. Kaikiš suremb lidnan ristitišt oli enamba 750 tuhad eläjid vll 1920−1970 (914 808 rist. vl 1950). Läz 2,2 mln elädas lidnaglomeracijas (2020).

Edeline lidnan pämez' (mer) om Frenk Džordž Džekson (Frank George Jackson, viluku 2006 — viluku 2022).

Transport

Avtobusad i metro oma kundaližeks transportaks lidnas. Metropoliten radab vspäi 1955 (om koume jonod, 50 stancijad, 54 km raudted). Konteinerport radab Kajahogan jogensun randal.

Rahvahidenkeskeine civiline Klivlend Hopkins-lendimport (CLE / KCLE, 10 mln passažiroid vl 2019) sijadase 14 kilometras suvipäivlaskmha lidnan keskuzpalaspäi.

Sebruzlidnad

Irlandii Akill, Irlandii (vspäi 2003) Egipt Aleksandrii, Egipt (1977) Bahr Dar, Efiopii (2004) Indii Bangalor, Indii (1975) Izrail' Beit Šean, Izrail' (2019) Romanii Brašov, Romanii (1991) Slovakii Bratislav, Slovakii (1990) Albanii Fijer, Albanii (2006) Pol'šanma Gdan'sk, Pol'šanma (1990) Saksanma Haidenhaim, Baden-Vürtemberg, Saksanma (1977) Izrail' Holon, Izrail' (1977) Ibadan, Nigerii (1974) Keiptaun, Suviafrikan Tazovaldkund (2023)

Kigali, Ruand (2023) Litvanma Klaiped, Litvanma (1992) Sur' Britanii Klivlend, Anglii, Sur' Britanii (1977) Konakri, Gvinei (1991) Lim, Peru (1964) Slovenii Lüblän, Slovenii (1975) Mad'jaranma Miškol'c, Mad'jaranma (1995) Francii Ruan, Francii (2008) Sal'vador Segundo Montes, Sal'vador (1991) Taivan' Taibei, Taivan', Kitai (1975) Tem, Gan (2023) Italii Vičenc, Italii (2009) Venäma Volgograd, Venäma (1990)

Irdkosketused

• Lidnan tobmuden oficialine sait (clevelandohio.gov). (angl.) (+ äikel'ne känduz)