Lim

Lim (isp., keč. i aimar.: Lima [ˈlima]) om Perun pälidn da kaikiš suremb lidn. Se om Lim-provincijan administrativine keskuz, nece provincii ei mülü nimiččehe regionha.

Lim
Lima

Lidnanznam	Flag
Valdkund	Peru
Eläjiden lugu (2015)	8,852,000 ristitud
Pind	2,672,3 km²
Pämez'	Luis Kastaneda Lossio (2015—)
Telefonkod	+51-(0)1
Aigvö	UTC−5

Linan kart (2013)

Perun KSP:n kaks' koumandest tehtas Limas.

Istorii

Eländpunktan aluz om pandud vn 1535 vilukun 18. päiväl kuti Sjudad-de-los-Reies («Kunigahiden lidn» kätes ispanijan kelespäi). Sid' sijaližed eläjad nimitaškanzihe lidnad Rimak-jogen (isp.: Rímac) da sen ümbriolijan tahondan mödhe.

Geografijan andmused

Lidn sijadase valdkundan keskuzpalan suves, Tünen valdmeren suvipäivnouzmaižel randal, Andiden ezimägištol, 0..500 m ü.m.t. korktusil. Lidnan keskuzpala sijadase 15 kilometras valdmerespäi.

Klimat om tropine neps. Päivesen keskmäine lämuz om +16..+22 C° vodes läbi. Minimaline enzne lämuz om +9 C°. Paneb sadegid seičeme millimetrad vodes, necen tagut voib nimitada klimatad pehmdaks-ki letetazangišton. Nepsuz om luja, sikš miše vilu valdmerine Gumbol'dtan joksmuz tuleb Antarktikan randoidennopäi räkile tahondoile, i se kucub paksuid sumegid da pil'vištod. Lujad manrehkaidused oleldas (oliba vozil 1687, 1746, 1940).

Tobmuz

Liman rajonad (oli 49 vl 2007)

Lim jagase seičemeks administrativižeks ümbrikoks. Ümbrikod alajagasoiš 43 rajonaks.

Eläjad

Vl 2015 lidnan eläjiden lugu om 8 852 000 ristitud. Perun kaikutte koumanz' ristit eläb Liman lidnaglomeracijas (9,7 mln v 2015).

Ristitišton enambuz oma vaugedverižed (kaks' videndest), mestizo (vaugedverižiden da indejalaižiden jäl'gelaižed, kaks' videndest) da azijalaižed (kümnendez').

Om enamba katoližen jumalankodikundan uskojid.

Transport

Avtobusad da kiruhavtobusad (El Metropolitano) oma kundaližeks transportaks. Vodespäi 2001 metropoliten radab lidnas (vspäi 2012 üks'jäine jono radab 26 stancijanke, 34 km raudted).

Kal'jao-port lugese erižeks eländpunktaks, hot' se om ümbärtud Lim-lidnal koumes polespäi. Se om Suviamerikan järedaks kalatezportaks. Raudte 535 km pitte oigendase randaspäi kaivuzidennoks, mugažo kävutadas sidä ozutamha turistoile.

Rahvahidenkeskeine civiline lendimport Horhe Čavesan nimed (LIM, 23,7 mln passažiroid i 370 tuh. jügutonnoid vl 2018) sijadase üks'toštkümnes kilometras lodeheze lidnan istorižes keskusespäi. Sišpäi tehtas reisid Suviamerikan äjihe maihe da AÜV:oiden surihe lidnoihe, Madridha i Londonha, mugažo Perudme.

Irdkosketused

• Lim-lidnan oficialine sait (munlima.gob.pe). (isp.)