Kašir

Kašir (ven.: Каши́ра) om Venäman lidn Moskvan agjan suves. Se om Kaširan lidnümbrikon administrativine keskuz (edel vn 2015 redukud — rajonan).

Kašir
Кашира

Lidnanznam	Flag
Valdkund	Venäma
Eläjiden lugu (2024)	44,551 ristitud
Pind	26,35 km²
Telefonkod	+7−49 669-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Istorii

Eländpunkt mainitase ezmäižen kerdan vl 1356 Ivan Kalita-ruhtinasen Ivan II-poigan kirjeižes kuti zavetoittud hänen Dmitrii-poigale žilo Košir-nimitusenke (ven.: Кошира). Lidn zavodihe Okan hural randal eziauguižešti, Kaširk-jogen lanktendanno Okanjogehe, nimitihe jogen mödhe ezimeletaden. Oli lidnaks, puine lidnuz oli saudud vl 1531. Nügüd'aigan pened Gorodišče- i Vanh Kašir-žilod oma olmas sen sijal.

Edeližel sijal Kašir alištui vihanikoiden äiluguižile londoile, sen tagut vl 1619 zavottihe ut lidnad Okan taga, jogen oiktal randal, nügüdläižes sijas. Se sai makundan lidnan statusad vl 1777, šingotihe torguindal. Vl 1900 saudihe raudted läz lidnad. Toižen mail'man sodan aigan lidn ei olend okkupiruidud, no alištui bombardiruindale vn 1941 lopus. Vl 1963 ühtištadihe Kaširad Novokaširsk-lidnanke (nimi oli Ternovsk vll 1932−1935, sid' Kaganovič vhesai 1957). Ožerel'je-lidn om mülütadud Kaširha vn 2015 kül'mkus.

Kašir šingotase Kaširan GRES:al (elektruz i lämuzenergii), sömtegimištol (čipsad, makaronad, leibän edheotand, jauhtegim), laivansauvomižel tegimel, maižanduzmašinoiden tegimel, valamižtegimel (alüminijaspäi i kaugedraudaspäi), gidromehanižel tegimel, sauvondmaterialiden pästandal (metalližed konstrukcijad elektrostancijoiden täht, savič), mugažo meblin, gofrokartonpakuitesen i pölusiden-sijakatusiden tehmine radab lidnas.

Geografijan andmused

Lidn sijadase lidnümbrikon pohjoižröunanno, Okan oiktal randal, 190 m ü.m.t. keskmäižel korktusel.

Matkad Tulan agjan röunhasai om kümne kilometrad suvipäivlaskmha orhal. Matkad Moskvhasai om 100 km lodeheze-pohjoižhe. Lähembaine lidn om Stupino ani lodeheze, Okanjogen taga.

Kašir-raudtestancii (passažiroiden täht) radab lidnan pohjoižröunal ühtes kilometras Okaspäi vspäi 1900 «Moskv (Pavelecan päraudtestancii) — Mihailov»-keskustal. Toine Ožerel'je-stancii om ühtennimižen suvižen mikrorajonan keskuses, Tesn-stancii (ven.: Тесна) om niiden keskes. Raudtesol'm radab Ožerel'je-mikrorajonanno, toine sarak ühtenzoitab Novomoskovskanke. «Don»-avtote (M4-trass) mäneb 5 km suvipäivlaskmha Kaširan päpalaspäi, «Kaspii»-avtote (R22-trass) mäneb vides kilometras suvipäivlaskmha Ožerel'je-mikrorajonaspäi i ühtištub «Don»-avtotenke.

Eläjad

Vl 1939 lidnan ristitišt oli 17 419 eläjad, vl 1959 — 22 121 eläjad. Vn 2010 Venäman rahvahanlugemižen mödhe lidnan eläjiden lugu oli 41 870 ristutud, rajonan (nüg. lidnümbrik) kaks' koumandest, vn 2021 — 45 922 ristitud. Kaikiš suremb lidnan ristitišt oli 44 200 eläjad vl 1992 (Ožerel'jeta) i 49 638 eläjad vl 2016.

Rahvahad (2010): venälaižed — 95,7 %, ukrainalaižed — 1,0 %, toižed rahvahad — 3,3 %.

Rahvahad (enamba 0,4 % vl 2021): venälaižed — 90,5 %, tadžikalaižed — 1,6 %, uzbekad — 0,7 %, kirgizlaižed — 0,5 %, ukrainalaižed — 0,4 %, toižed rahvahad — 3,1 %, rahvahuden ozutandata — 3,2 %.

Ortodoksižen hristanuskondan vižtoštkümne pühäpertid oma kaičenus i saudud lidnas: Pühän Jumalanmaman Emäganpäivän päjumalanpert' (om saudud vll 1829−1842), kahesa jumalanpertid, koume časounäd, ph. Nikita-moknikan naižjumalankodi (alusenpanend 1884) Sündun Toižetamižen päjumalanpertinke (om letud vll 1889−1894) i kahtenke jumalanpertinke.

Lapsiden opendusen aluzkundad oma 17 nomeruidud päivkodid (nomer 1..11, 13..18), kaks' aluzškolad (nomer 5 i 8), kahesa keskškolad (nomer 1..4, 7, 9, 10, 12), lapsiden da norišton keskuz, norišton keskuz, čomamahtoiden škol (ende kaks' muzikškolad), Kašira-sportškol, lapsiden ekologine keskuz. Professionaližen opendusen aluzkundad oma «Moskovii»-profkolledžan Kaširan kaks' filialad i Ožrel'jen raudtekolledž.

Galerei

• 
  Policijan palakundan pert' (2011)
• 
  Emäganpäivän päjumalanpert', vn 2012 nägu
• 
  Kaširan GRES vl 2008
• 
  Lidnan kodirandantedištandmuzei (2011)
• 
  Kašir-raudtestancijan sauvuz

Irdkosketused

• Lidnümbrikon tobmuden sait (kashira.su). (ven.)
• Lidnan informacine portal (kashira.ru). (ven.)