Dzeržinskii (lidn)

Dzeržinskii (ven.: Дзержи́нский) om Venäman lidn da lidnümbrik Moskvan agjan keskuzpalan suvipäivnouzmas. Se om Moskvan suvipäivnouzmaine ezilidn.

Dzeržinskii
Дзержинский

Lidnanznam	Flag
Valdkund	Venäma
Eläjiden lugu (2023)	57,700 ristitud
Pind	15,66 km²
Pämez'	Andronik Pak (uhoku 2024—)
Telefonkod	+7−495-xxx-xx-xx
Avtokod	50, 90, 150, 190, 750
Aigvö	UTC+3 (MSK+0)

Istorii

Dmitrii Donskoi pani eländpunktan alust Ph. Mikulain Ugrešalaižen jumalankodikš vl 1380 Kulikovon toran lopun oiktastuseks, se om vahvištoittud kirjutadud purtkiš. Jumalankodi oli sauptud 1920-nzil vozil, armotomiden lapsiden kommun Feliks Dzeržinskijan nimed (ven.: Коммуна имени Дзержинского) eli sen sauvusiš. Vl 1938 kätihe žilod lidnanvuiččeks. Saudihe lämuzelektrokeskust nomer 22 vspäi 1956. Žilo sai lidnan statusad vl 1981, mülüi Lübercin rajonha vhesai 1996.

Dzeržinskii šingotase LEK:al-22 (elektruz i lämuz) i energetižen sauvondal kompanijal, Kaksitadud tehnologijoiden federaližel «Sojuz»-keskusel (raketad i tehnologijad), turizmal, mugažo avtoiden utilizacijan tegim radab lidnas.

Geografijan andmused

Lidnan sijaduz vn 2023 agjan kartal

Lidn sijadase Moskv-jogen hural randal, 160 m ü.m.t. keskmäižel korktusel. Röunatab Moskvanke lodehes, se om Kapotn'-rajon Moskvan kivivoinümbriradajanke tegimenke, Moskvan rengazavtote om röunaks. Toižed lähembaižed lidnad oma Kotel'niki ani pohjoižhe, Lüberci (passažirine raudtestancii) nell' kilometrad pohjoižhe-pohjoižpäivnouzmha, Litkarino üks' kilometr suvipäivnouzmha. Tomilinon puišton pala uitoidenke om lidnan pohjoižes.

Janičkino-raudtestancijan ližated oma olmas lidnas «Lüberci — Dzeržinskii»-raudtesarakol, ned oma vaiše jüguiden täht. Vll 1946−1997 Dzeržinskai-raudtestancii (ven.: Дзержинская) radoi lidnas passažirlikundanke. Raudtestancii, platform i teiden pala oma likvidiruidud. Jogivaldmad Moskv-jogel oma turistlaivoiden täht.

Tobmuz

Dzeržinskii om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez'. Edeližed lidnümbrikon pämehed oma Vladimir Šeluhin (semendku 2022 — viluku 2024), Sergei Budkin (semendku 2021 — semendku 2022), Lüdmila Ivanova (keväz'ku 2019 — semendku 2021). Lidnümbrikon Deputatoiden nevondkundan ezimez' om Irina Šuvalova vn 2019 sügüz'kuspäi. Deputatoiden i Administracijan pämehen valdatusiden strok om viž vot.

Eläjad

Vl 1939 žilon ristitišt oli 7 649 eläjad, vl 1959 — 15 354 eläjad. Vn 2010 Venäman rahvahanlugemižen mödhe lidnan eläjiden lugu oli 47 163 ristutud, vn 2021 — 57 918 ristitud, se ristitišt oli kaikiš suremb. Kaik 54 788 eläjad oli lidnas vl 2017.

Rahvahad (2010): venälaižed — 92,6 %, ukrainalaižed — 2,1 %, totarlaižed — 1,0 %, toižed rahvahad — 4,3 %.

Ortodoksižen hristanuskondan kahesatoštkümne pühäpertid oma saudud lidnas: ph. Mikulai Ugrešalaižen jumalankodi (kaks' päjumalanpertid, ühesa jumalanpertid, koume časounäd), koume jumalanpertid i časoun'.

Lapsiden opendusen aluzkundad oma severz'-se päivkodid, kuz' keskškolad, muzikškol, čomamahtoiden škol. Lübercin tehnikuman korpus om lidnan professionaližen opendusen aluzkundaks. «Dubn»-universitetan lähembaine filial radab Kotel'niki-lidnas, ende aluzkundan filial radoi Dzeržinskijas.

Galerei

• 
  Dmitrii Donskoin muštnik (2009)
• 
  Ph. Mikulai Ugrešalaižen jumalankodi Spasan Toižetamižen päjumalanpertinke, vn 2014 nägu
• 
  Kaksitadud tehnologijoiden federaline «Sojuz»-keskuz vl 2018
• 
  Torguindkeskuz (2011)
• 
  Sur' Dzeržinskijan kar'jer, nägu lidnan randirdaspäi vn 2021 kezakus

Irdkosketused

• Lidnümbrikon tobmuden sait (dzr.mosreg.ru). (ven.)