Mihailov (lidn)

Mihailov (ven.: Миха́йлов) om Venäman lidn da lidnankund Räzanin agjan päivlaskmas. Se om Mihailovan rajonan administrativine keskuz.

Mihailov
Михайлов

Lidnanznam	Flag
Valdkund	Venäma
Eläjiden lugu (2019-01-01)	10,072 ristitud
Pind	8 km²
Pämez'	Sergei Tämisov (keväz'ku 2009—)
Telefonkod	+7−49 130-xx-xxx
Avtokod	62
Aigvö	UTC+3 (MSK+0)

Istorii

Eländpunkt mainitase ezmäižen kerdan Ph. Ipatijan jumalankodin aigkirjas vozil 1172 i 1238. Eziauguižin se oli meščora-rahvahan žilo, möhemba segoitadud slaviženke. Mihailov-nimituz om anttud miččen-se sijaližen ruhtinasen nimen mödhe. Varmitadud lidnusen aluz oli pandud Ivan Grazii-carin käskön mödhe vl 1551.

Anttihe makundan lidnan statusad vl 1708. Saudud vodele 1898 raudte abuti lidnan šingotesele. Kružavan pramozl oli olmas lidnas da sen makundas 19. voz'sadan lopuspäi. Toižen mail'man sodan aigan lidn oli okkupiruidud lühüdaks aigaks vl 1941 (24. kül'mku — 7. tal'vku). Lidnan administracii om likvidiruidud vn 2019 kül'mkus, rajonan administracii tegeb sen velgusidme.

Mihailov šingotase sömtegimištol (maidkombinat). Cementan järed tegim radab lähižes lidnanvuiččes Oktäbr'skii-žilos 6 km päivlaskmha.

Geografijan andmused

Lidn sijadase rajonan keskuzpalan pohjoižes, Pron'-jogen molembil randoil (ven.: Проня 336 km pitte, Okan hura ližajogi), 166 m ü.m.t. keskmäižel korktusel. Matkad Moskvan agjhasai om 20 km lodeheze orhal, Tulan agjhasai — 15 km päivlaskmha orhal. Matkad Räzanihesai om 62 km pohjoižpäivnouzmha orhal, 69 km avtotel vai 120 km raudtel. Toižed lähembaižed lidnad oma Skopin suvipäivnouzmha, Kimovsk (Tulan agj) suvipäivlaskmha i Venöv (Tulan agj) päivlaskmha. Mihailov-raudtestancii radab lidnan päpalan päivlaskmaižel röunal. «Moskv — Astrahan'»-avtote («Kaspii»-trass, R-22) ümbärdab lidnad pohjoižpäivnouzmaspäi.

Kuz' eländpunktad mülüdas lidnankundha Mihailovan ližaks: Kozlovk-žilo (1043 rist. vl 2010), koume pen't žilod i kaks' küläd. Enzne Elektrik-žilo om lidnan palaks 5 km pohjoižhe. Lidnankundan pind — 59,88 km².

Eläjad

Vl 1897 lidnan ristitišt oli 9 200 eläjad, vl 1939 — 6 538 eläjad. Vn 2010 Venäman rahvahanlugemižen mödhe lidnan eläjiden lugu oli 11 784 ristitud, lidnankundan — 13 097 ristitud, rajonan koumandez. Kaikiš suremb lidnan ristitišt oli 14..15 tuhad eläjid vll 1970−2001 (15 302 rist. vl 1989). Kaik 11 633 ristitud elihe lidnankundas vl 2017.

Rahvahad (2010): venälaižed — 95,5%, čiganalaižed — 1,6%, toižed rahvahad — 2,9%. Ortodoksižen hristanuskondan Jumalanmaman Katken naižjumalankodi, nell' jumalanpertid i kaks' časounäd oma olmas lidnas.

Professionaližen opendusen aluzkundad oma Mihailovan ekonomine kolledž-internat i Mihailovan tehnikum A. Merzlovan nimed.

Galerei

• 
  Lidnan administracijan sauvuz
  (1912, vn 2012 nägu)
• 
  Sündun Raštvoiden pühäpert'
  (vn 2012 nägu)
• 
  Sild Pron'-joges päliči
• 
  «T-34»-tank-muštnik

Irdkosketused

• Lidnan lehtpoled rajonan tobmuden aluzkundoiden mihrayadm.ru-saital. (ven.)