Ozöri

Ozöri (ven.: Озёры) om Venäman lidn Moskvan agjan suvipäivnouzmas. Mülüb Kolomnan lidnümbrikho vn 2020 redukuspäi.

Ozöri
Озёры

Lidnanznam	Flag
Valdkund	Venäma
Eläjiden lugu (2024)	23,826 ristitud
Pind	12 km²
Telefonkod	+7−49 670-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Istorii

Eländpunkt mainitase kirjutadud purtkiš vspäi 1588 kuti Ozerki-külä (vai Ozerok). Külän šingotez zavodiše bumagkanghan manufakturan sauvondanke vl 1834. Jumalanpert' om saudud vl 1851. Moskvan regionan znamasine tekstiline keskuz 19. voz'sadan lopuspäi. Žilo sai lidnan statusad vn 1925 17. päiväl elokud. Toižen mail'man sodan aigan lidn ei olend okkupiruidud, no oli alištunu bombardiruindale Okan vastrandaspäi. Mehanine (optikan) tegim oli saudud da radoi sodan jäl'ghe.

Ozöri šingotase vilugoitimiden pästandal tegimišton i torguindan täht, optižen stöklan tegimel, metallan ümbriradmižen tegimel, sömtegimištol (konditerine kombinat), sömpakuitesen kahtel edheotandal, spravitandan edheotandoil (pansionat, sanatorii).

Geografijan andmused

Lidn sijadase lidnümbrikon suvipäivlaskmas, Okanjogen hural randal, 120 m ü.m.t. keskmäižel korktusel. Om ümbärtud segoitadud mecal i kavag'mecoil, om äi penid järvid i jogid niiš.

Matkad Moskvan röunhasai (Moskvan rengazavtotehesai) om 126 km lodeheze orhal, avtotel vai raudtel. Lähembaižed lidnad oma Kašir 23 km päivlaskmha orhal, 36 km avtotedme vai 150 km raudtedme, i Zaraisk 24 km suvipäivnouzmha, 32 km avtotedme vai 95 km raudtedme.

Ozöri-raudtestancii radab lidnas vspäi 1893, se om 39-kilometrižen sarakon Kolomnaspäi (sen Golutvin-päraudtestancijaspäi) lopstancii. Pordaigaline pullosild radab Okas päliči.

Tobmuz

Ende lidn oli Ozörin lidnümbrikon administrativižeks keskuseks da palaks (om tühjitadud vn 2020 redukuspäi), sijazihe sen keskuzpalas, edel vn 2015 semendkud ümbrik oli rajonaks.

Eläjad

Vl 1939 lidnan ristitišt oli 22 629 eläjad, vl 1959 — 24 786 eläjad. Vn 2010 Venäman rahvahanlugemižen mödhe lidnan eläjiden lugu oli 25 800 ristitud, rajonan seičeme kümnendest. Kaikiš suremb lidnan ristitišt oli enamba 28 tuhad eläjid vll 1989−1998 (28 500 rist. vl 1992).

Rahvahad (2010): venämalaižed — 95,0 %, ukrainalaižed — 1,0 %, toižed rahvahad — 4,0 %.

Ortodoksižen hristanuskondan kaks' jumalanpertid oma kaičenus i saudud lidnas.

Lapsiden opendusen aluzkundad oma kuz' nimitadud i nomeruidud päivkodid (nomer 2, 5, 9, 10, 14, 15), koume keskškolad (nomer 1, 2, 3), gimnazii (nomer 4), lapsiden sädamižen keskuz, čomamahtoiden škol, Ozöri-sportaluzkund. Jegor'jevskan tehnikuman Ozörin filial om lidnan professionaližen opendusen aluzkundaks.

Galerei

• 
  Enččen lidnümbrikon administracijan pert' (2016)
• 
  Eläban Eziauguižen Stroican jumalanpert' (1851), vn 2017 nägu
• 
  Konditerine kombinat vl 2016
• 
  Kul'turkeskuz (2016)
• 
  Ozöri-raudtestancii vl 2016

Irdkosketused

• Lidnümbrikon tobmuden sait (kolomnagrad.ru). (ven.)
• Lidnan informacine sait (ozery.info). (ven.)