Himki

Himki (ven.: Хи́мки) om Venäman lidn da lidnümbrik Moskvan agjan keskuzpalan lodehes. Se om agjan koumanz' lidn eläjiden lugun mödhe, Moskvan lodehline ezilidn.

Himki
Химки

Lidnanznam	Flag
Valdkund	Venäma
Eläjiden lugu (2020-01-01)	259,550 ristitud
Pind	109,8 km²
Pämez'	Dmitrii Vološin (sügüz'ku 2016—)
Telefonkod	+7−495-xxx-xx-xx. +7−498
Avtokod	50, 90, 150, 190, 750
Aigvö	UTC+3 (MSK+0)

Istorii

Äiluguižed žilod da küläd mainitasoiš Himkin territorijal 16. voz'sadaspäi, sidä kesken Himki-külä. Nügüdläižen eländpunktan aluz om pandud vl 1850 kuti Himskai-raudtestancii da žilo senno «Moskv — Piter»-raudtel, radaškanzi vn 1851 kül'mkus. Stancijan ümbrišt oli kezaküläpertiden tahond 1920-nzihe vozihesai. Kätihe Himkid radnikžiloks vl 1937 i sauvoškanzihe kahtent aviategint. Anttihe lidnan statusad vn 1939 26. päiväl keväz'kud. Lidn oli Himkin rajonan keskuseks vll 1940−1960 i 1965−2005. Ühtištuihe Shodn'-lidnad Himkinke vn 2004 sügüz'kus.

Himki šingotase aviakosmižen sarakon kahtel tegimel (raketlikutimed, kosmižed apparatad), zenitraketsistemiden projektiruindan konstruktorbürol, sauvondan edheotandoil, Venäman kaikiš järedamban Šeremetjevo-lendimportan logistižil keskustoil.

Geografijan andmused

Lidn sijadase kanalan Moskvan nimed oiktal randal tobjimalaz (ven.: Канал имени Москвы 128 km pitte, ühtenzoitab Volgad Moskv-jogenke), 180 m ü.m.t. keskmäižel korktusel. Om penid jogid lidnan territorijal, sidä kesken Moskvan hurad ližajoged: Himk-jogen (ven.: Хи́мка vai Хи́нска, Хи́нка 18 km pitte) üläjoksmuz Himkan mecas i Shodn'-jogi (ven. Схо́дня 47 km pitte) lidnümbrikon päivlaskmas. Lidnümbrik röunatab Moskvanke suves, keskuzpalas i lodehes. Toižed lähembaižed lidnad oma Dolgoprudnii ani päivnouzmha, Lobn' 10 km pohjoižpäivnouzmha, Krasnogorsk 12 km suvipäivlaskmha i Zelenograd (Moskvan pala) 4 km lodeheze.

«Moskv — Piter»-raudtekeskust i «Venäma»-avtote (M10-trass, Moskv — Piter) mändas lidnan keskuzpalan kal't. Maksline «Neva»-avtote (M11-trass, Moskv — Piter) läbitab lidnan päivnouzmad. Rahvahidenkeskeine civiline Šeremetjevo-lendimport (SVO / ШРМ, 50 mln passažiroid vl 2019) radab Himkin pohjoižes.

Himki om lidnümbrikon üks'jäine eländpunkt.

Eläjad

Vl 1926 žilon ristitišt oli 2 876 eläjad, vl 1939 lidnan — 23 092 eläjad. Vn 2010 Venäman rahvahanlugemižen mödhe lidnan eläjiden lugu oli 207 425 ristitud. Kaikiš suremb lidnan ristitišt om nügüd'.

Ortodoksižen hristanuskondan 17 jumalanpertid i 8 časounäd oma olmas lidnas, mugažo protestantizman kaks' jumalanpertid (baptistoiden i evangelistoiden).

Rahvahad (2010): venälaižed — 91,9%, ukrainalaižed — 1,8%, armenijalaižed — 1,3%, toižed rahvahad — 5,0%.

Professionaližen opendusen aluzkundad oma Himkin tehnikum, üläopendusen kaks' akademijad (civiližen kaičendan, privatine turizman) i Moskvan valdkundaline kul'turan institut.

Galerei

• 
  Phh. Pedroin da Pauloin jumalanpert'
  (om saudud vll 1829−1848, vn 2016 nägu)
• 
  Himki-biznespark
• 
  «Arena Himki»-futbolstadion
• 
  Himki-raudtestancii
  vl 2008

Irdkosketused

• Lidnümbrikon Ezitajiden Nevondkundan sait (sdhimki.ru). (ven.)
• Lidnümbrikon administracijan sait (admhimki.ru). (ven.)