Kuala Lumpur

Kuala Lumpur (mugažo malain i anglijan kelil, malajine virkand: [ˈkwalə ˈlumpʊr]) om Malaizijan pälidn da kaikiš suremb lidn.

Kuala Lumpur

Lidnanznam	Flag
Valdkund	Malaizii
Eläjiden lugu (2017)	1,790,000 ristitud
Pind	243 km²
Pämez'	Nor Hisham Ahmad Dahlan (reduku 2018—)
Telefonkod	+60-(0)3-xxxx-xxxx
Aigvö	UTC+8

Lidnan valičemižrajonad vl 2009.

Istorii

Eländpunktan aluz om pandud vl 1857. Kätihe britanižen Malain Ühtištuz-kolonijan pälidnaks vl 1946. Om federaližen territorijan statusanke vspäi 1974.

Kuala Lumpur šingotase valdkundan administrativižeks, finansižeks i openduzkeskuseks. Nened aluzkundad oma saudud lidnas: tavar- i fondbiržad, Malaizijan bankoiden i korporacijoiden päfaterad. Erazvuitte tegimišt om kesketud ezilidnoiš tobjimalaz, se om tekstiline sarak, avtoiden i elektronikan ühthekeradamine, maižanduztehnikan tehmine, metalližtegesiden pästand, sauvondedheotandad, kaučukan ümbriradmine, sömtegimišt (pal'mvoi). Millionad turistoid vodes tuldas tänna. Sadas tinad i kivihil't läz lidnad.

Geografijan andmused

Lidn sijadase Klang-jogen alangištos, Malakk-pol'saren päivlaskmas, 66 m ü.m.t. keskmäižel korktusel. Kuala Lumpuran Port Klang-avanport om sätud 40 km päivlaskmha Klang-ezilidnan taga, Indižen valdmeren randal.

Klimat om ekvatorialine, om räk da upar' vodes läbi.

Eläjad

Vl 2010 eläjiden lugu oli 1 627 172 ristitud. Lidnan aglomeracijas elädas 7,2 mln ristituid 2243 km² pindal.

Transport

Avtobusad, kiruhavtobusad, taksid, ezilidnelektrojonused, kebn metro (vspäi 1998, 2 jonod, 37 stancijad, 46 km raudted) i monorel's (vspäi 2003, 11 stancijad, 8 km raudted) oma kundaližeks transportaks lidnas ezilidnoidenke. Kiruhavtobusad, elektrojonused, metro, monorel's i aeroekspressad ratas ühtes Klang-alangišton integriruidud sistemas (mal.: Sistem Transit Bersepadu Lembah Klang (TRANSIT)).

Rahvahidenkeskeine civiline lendimport (KUL, 58,5 mln passažiroid vl 2017) sijadase 45 km suvhe Kuala Lumpuran keskusespäi Putradžai-lidnan taga, ühtes Sepang-trassanke. Aeroekspress ühtenzoitab pälidnanke. Tehtas reisid Azijan läz kaikihe pälidnoihe, Indonezijan i Indijan äjihe lidnoihe, Gold Kostha, Londonha i Frankfurtha, mugažo Malaizijadme. Toine vanh Sultan Abdul Aziz Šah-lendimport (SZB, 2,8 mln passažiroid vl 2017) radab Subang-ezilidnas 15 km päivlaskmha pälidnan keskusespäi, se holitab tatanmaižid passažirreisid i jügureisid Azijan lähižihe maihe.

Irdkosketused

• Kuala Lumpuran ohjastusen oficialine portal (dbkl.gov.my). (malain) (angl.)