Krasnoturjinsk

Krasnoturjinsk (ven.: Краснотурьи́нск) om Venäman lidn Sverdlovskan agjan lodehes. Se om Krasnoturjinskan lidnümbrikon administrativine keskuz.

Krasnoturjinsk
Краснотурьинск

Lidnanznam	Flag
Valdkund	Venäma
Eläjiden lugu (2021)	55,910 ristitud
Pind	309,5 km²
Pämez'	Aleksandr Ustinov (sügüz'ku 2013—)
Telefonkod	+7−34 384-xx-xxx
Avtokod	66, 96, 196
Aigvö	UTC+5 (MSK+2)

Istorii

Eländpunktan aluz om pandud vn 1758 sügüzel kuti Turjan kaivuded-žilo (ven.: Турьинские рудники) otmaha kävutamižhe severzid-se kaivuzid, kudambiden valdoičii oli Üläturan Maksim Pohodäšin-torgovan. Saihe vas'ken, raudan i kuldan kivendoid, möhemba boksitoid-ki (vspäi 1931). Kätihe lidnanvuiččeks Turjinskii-žiloks vl 1928. Žilo sai lidnan statusad vn 1944 27. päiväl kül'mkud nügüdläiženke nimenke. Vspäi 1963 aluštub agjan tobmudele oikti.

Krasnoturjinsk šingotase Bogoslovskii-alüminijantegimel (mülüb «Rusal»-kompanijha, radab boksitoil Severoural'skan löudmižsijišpäi) i Bogoslovskai-LEK:al, kuldan i hobedan samižel, leibänkombinatal, sauvondmaterialiden edheotandoil (raudbetontegesed, savič, kabeläd, pumaterialad).

Geografijan andmused

Lidn sijadase Pohjoižen Uralan päivnouzmaižil pautkil, Turj-jogen muugotil randoil (126 km, ven.: Турья́ «järvekaz jogi» mansin kelespäi, Sos'van oiged ližajogi, Obin hurapol'ne bassein), 201 m ü.m.t. keskmäižel korktusel. Matkad Jekaterinburghasai om 326 km suvhe orhal, 385 km avtotedme vai raudtedme. Lähembaižed lidnad oma Serov 35 km suvipäivnouzmha orhal, avtotedme vai raudtedme, Karpinsk 2 km päivlaskmha orhal, avtol vai raudtedme, i Volčansk 20 km pohjoižhe orhal, avtotedme vai raudtel.

Rudničnii-žilo (4035 rist. vl 2010) i völ nell' žilod mülüdas lidnümbrikho Krasnoturjinskan ližaks. Lidnümbrikon pind — 718,93 km².

Eläjad

Vn 2010 Venäman rahvahanlugemižen mödhe eläjiden lugu oli 59 633 ristitud, lidnümbrikon ühesa kümnendest. Kaikiš suremb lidnan ristitišt oli 64..67 tuhad eläjid vl 1962 i vll 1986−2003 (67 324 rist. vl 1989).

Rahvahad (ozutadud rahvahudenke vl 2010): venälaižed — 88,1%, saksalaižed — 5,4%, totarlaižed — 2,8%, ukrainalaižed — 1,1%, toižed rahvahad — 2,6%.

Ortodoksižen hristanuskondan kuz' pühäpertid ratas Krasnoturjinskas: ph. hengenavaidamižen Maksim-kundlijan päjumalanpert' (om saudud vll 1844−1852), kaks' jumalanpertid, časoun' i naižjumalankodi kahtenke jumalanpertinke. Lüteranine pühäpert' i uden apostoloiden jumalankodikundan pühäpert' oma letud lidnas. Islaman «Nur»-mečet' om avaitud lidnas vspäi 2011.

Koume sportkompleksad oma sätud lidnas. Professionaližen opendusen aluzkundad: Krasnoturjinskan professionaline licei (politehnikum), Krasnoturjinskan industrialine kolledž, Krasnoturjinskan čomamahoiden kolledž, Sverdlovskan agjan medicinižen kolledžan filial (Jekaterinburg), Uralan valdkundaližen tehnižen universitetan filial (Jekaterinburg).

Galerei

• 

  Lidnümbrikon administracijan sauvuz (2007)

• 

  Ph. hengenavaidamižen Maksim-kundlijan päjumalanpert', vn 2018 nägu

• 

  Bogoslovskii-alüminijantegimen LEK vl 2007

• 

  Tätüižteatr (2006)

• 

  Krasnoturjinskai-seižutezpunktan vagzal vl 2007

Lidnan ühthine nägu Turj-jogen vastrandalpäi vn 2007 elokus

Irdkosketused

• Lidnümbrikon Duman oficialine sait (duma-krasnoturinsk.ru). (ven.)
• Lidnümbrikon Administracijan oficialine sait (краснотурьинск-адм.рф). (ven.)