Las Vegas

Las Vegas (mugažo anglijan i ispanijan kelil, virkmine: angl. [lɑːs ˈveɪɡəs], isp. [laz ˈβeɣas] «kazvateližed alangištod») om Amerikan Ühtenzoittud Štatoiden lidn Nevad-štatan suvipäivnouzmas. Oficialine anglijankel'ne nimituz — City of Las Vegas, oficialižetoi — muite Vegas. Se om štatan kaikiš suremb lidn.

Las Vegas

Lidnanznam	Flag
Valdkund	Amerikan Ühtenzoittud Valdkundad
Eläjiden lugu (2017)	648,224 ristitud
Pind	352 km²
Pämez'	Kerolin Goldmark Gudman (heinku 2011—)
Telefonkod	+1−702, +1−725
Aigvö	tal'vel UTC−8, kezal UTC−7

Las Vegas Strip

Vegas om azartvändoiden da bobuštusiden pälidn mail'man znamoičendanke, om saudud da radab enamba 80 kazinod i severz-se tuhad vändhonusid. Äiluguižed adivpertid da massižen aigtegon sauvused tehtas lidnad AÜV:oiden sajiden, prezentacijoiden i reklaman kompanijoiden znamasižeks sijaks.

Istorii

Eländpunktan aluz om pandud vn 1905 15. päiväl semendkud i pit'kan aigan oli järedaks raudtestancijaks (nügüd' ei ole passažirühtenzoitust). Vspäi 1911 om lidnan statusanke. Vn 1931 19. päiväl semendkud Nevad-štatan tobmuz laski azartvändoid sen kaikedme territorijadme. Ühtenaikte Guveran padoseinän lendand lidnanno varatoiti Vegasad vedel, i se šingotaškanzi.

Geografijan andmused

Lidn sijadase rahvahatoman Mohave-man keskuses, 610 m ü.m.t. keskmäižel korktusel, läz Mid-vezivaradint. Matkad štatan Karson Siti-pälidnhasai om 526 km lodeheze orhal, Nevadan südäitukuižhe poligonhasai — 100 km pohjoižhe.

Klimat om subtropine letetazangišton. Heinkun keskmäine lämuz om +33,6 C°, tal'vkun — +8,7 C°, voden keskmäine lämuz om +20,6 C°. Paneb sadegid 106 mm vodes, 2..19 mm kuidme. Lumi katab ümbärdajid mägid kaikuččel tal'vel.

Eläjad

Vn 2010 AÜV:oiden rahvahanlugemižen mödhe lidnan eläjiden lugu oli 583 756 ristitud, enamba 1,9 mln ristituid elihe lidnaglomeracijas. Kaikiš suremb ristitišt om nügüd'.

Irdkosketused

• Lidnan tobmuden oficialine sait (lasvegasnevada.gov). (angl.)
• Lidnan turizman sait (visitlasvegas.com). (angl.)