Zlatoust

Zlatoust (ven.: Златоу́ст, bašk.: Златоуст / Алтынтамаҡ, tot.: Зылатаус) om Venäman lidn Čeläbinskan agjan päivlaskmas. Se om agjan koumanz' lidn eläjiden lugun mödhe, Zlatoustan lidnümbrikon administrativine keskuz.

Zlatoust
Златоуст

Lidnanznam	Flag
Valdkund	Venäma
Eläjiden lugu (2020)	163,919 ristitud
Pind	118,2 km²
Pämez'	Maksim Pekarskii (reduku 2019—)
Telefonkod	+7−3513-xxx-xxx
Avtokod	74, 174
Aigvö	UTC+5 (MSK+2)

Istorii

Venälaižed ectihe kuldad niiš tahoiš 17. voz'sadal, no saihe kilt. Nügüdläižen eländpunktan aluz om pandud osttud baškiralaižil maihe vl 1754 kuti žilo raudkivendon löudmižsijanno sauvomha da holitamha Zlatoustovskii-tegint, nimitihe ph. Johann-Kuldansun mödhe. Valdkund osti tegint vl 1811, i radnikžilo sai lidnan statusad sil-žo vodel. Vspäi 1815 vilun azegišton fabrik radaškanzi, vspäi 1857 — terazjuraižimiden tegim. Vl 1890 raudte ühtenzoiti Venäman evropižen palan keskusenke. Toižen mail'man sodan aigan evakuiruihe sihe enamba 20 edheotandad: Tulan azegišton, Podol'skan mehanine, Ezmäine Moskvan časuiden da toižed tegimed.

Zlatoust šingotase elektrometallurgižel tegimel, raketkompleksoiden tegimel, sauvondmašiništon tehmižel (vibropressad, betontegimed), sauvondmaterialiden pästandal (abrazivad, metalližkonstrukcijad), časuiden tegimel, vilun azegišton fabrikal, sömtegimištol (jomad, lihaproduktad), mugažo omblendfabrik, vedimdepo i Uralan tegimištoližiden edheotandoiden projektine institut ratas lidnas.

Geografijan andmused

Lidn sijadase lidnümbrikon keskuzpalas, Ai-jogen alangišton randoil (bašk.: Әй 549 km pitte, Kaman hurapol'ne bassein) sen ližajogidenke, 400..600 m korktusil, 538 m ü.m.t. keskmäižel korktusel, Suviuralan evropižes palas. Rel'jef om mägikaz, lidn om ümbärtud mägisel'gil da kavag'mecoil. Zlatoustan uit (4,2 km², 413 m ü.m.t.) om saudud lidnan keskuses. Matkad Čeläbinskhasai om 109 km päivnouzmha orhal, 143 km avtotel vai 161 km raudtel. Lähembaižed lidnad oma Karabaš 49 km pohjoižpäivnouzmha orhal, 83 km avtotel vai 230 km raudtel, i Miass 30 km päivnouzmha-suvipäivnouzmha orhal, 40 km avtotedme vai raudtedme.

«Čeläbinsk — Uf»-raudte läbitab lidnan pohjoižpalad i om päivnouzmaižeks röunaks, Zlatoust-stancii radab lidnas. Ural-avtote (M5-trass) mäneb 3..6 km suvipäivlaskmha lidnan röunaspäi.

Kahesa pen't žilod i üks' žilo raudtestancijanno mülüdas lidnümbrikho Zlatoustan ližaks. Lidnümbrikon pind — 1895 km².

Eläjad

Vl 1939 lidnan ristitišt oli 99 tuhad eläjid. Vn 2010 Venäman rahvahanlugemižen mödhe lidnan eläjiden lugu oli 174 962 ristitud, lidnümbrikon — 177 155 ristitud. Kaikiš suremb lidnan ristitišt oli 200..208 tuhad eläjid vll 1982−1998 (208 tuh. rist. vll 1991−1992). Kaik 167 464 ristitud elihe lidnümbrikos vl 2019.

Nened pühäpertid oma avaitud lidnas: ortodoksižen hristanuskondan viž jumalapertid i kaks' časounäd, islaman pämečet' i Mahallä-pühäpert' nomer 938.

Professionaližen opendusen aluzkundad oma Zlatoustan tehnologijan da ekonomikan tehnikum, Zlatoustan medicinine tehnikum, pedagogine i industrialine kolledžad, üläopendusen aluzkundoiden (Čeläbinsk, Jekaterinburg) koume filialad.

Galerei

• 
  Muštnik Pavel Anosov-metallurgale (2014)
• 
  Kodirandantedištandmuzei (2013)
• 
  Ph. Serafim Sarovalaižen kafedraline päjumalanpert', vn 2016 nägu
• 
  Ph. Simeon Verhoturjelaižen-čudonsädajan jumalanpert' läz päraudtestancijad, vn 2010 nägu
• 
  Azegišton fabrikan istorine sauvuz vl 2013
• 
  Časuiden tegim vl 2011
  (lidnan kundan istorine sauvuz)
• 
  Zlatoustan industrialine kolledž (tehnikum vl 2008)
• 
  Mašinansauvojiden kul'turkeskuz (2014)
• 
  «Agat»-torguimižbobuštuzkeskuz (2021)
• 
  Zlatoust-päraudtestancijan sauvuz vl 2008

Irdkosketused

• Lidnümbrikon oficialine sait (zlat-go.ru). (ven.)