Ust'-Katav

Ust'-Katav (ven.: Усть-Ката́в, bašk.: Ҡытаутамаҡ, tot.: Кытау-Тамак) om Venäman lidn Čeläbinskan agjan päivlaskmaižes sarakos. Se om Ust'-Katavan lidnümbrikon administrativine keskuz.

Ust'-Katav
Усть-Катав

Lidnanznam	Flag
Valdkund	Venäma
Eläjiden lugu (2023)	21,016 ristitud
Pind	27,45 km²
Pämez'	Sergei Semkov (tal'vku 2015—)
Telefonkod	+7−35 167-xx-xxx
Avtokod	74, 174
Aigvö	UTC+5 (MSK+2)

Istorii

Eländpunktan aluz om pandud vl 1758 kuti mecpilindan žilo jogivaldmoidenke sauvomha susedližid raudantegimid, sid' žilo udenno raudantegimenno, nimitihe jogen mödhe. Ust'-Katavan Tegim-radnikžilo sai lidnan statusad vn 1942 28. päiväl elokud, vspäi 1943 om nügüdläiženke nimitusenke.

Ust'-Katav šingotase vagonansauvomižen tegimel (tramvaid, pompad i torvarmatur, gazanregulätorad, kosmine sarak) i mecan ümbriradmižen tegimel.

Geografijan andmused

Lidn sijadase ümbrikon suvipäivlaskmas, Jurüzan'-jogen molembil randoil, Katav-jogen (bašk.: Ҡытау 111 km pitte, Kaman hurapol'ne bassein) lanktendanno Jurüzanihe huralpäi, 371 m ü.m.t. keskmäižel korktusel. Katavan uit padoseinänke om saudud lidnan keskuzpalas da suves.

Baškortostan om ani lodeheze lidnaspäi. Matkad Čeläbinskhasai om 209 km pohjoižhe orhal, 260 km avtotel vai 290 km raudtel. Lähembaižed lidnad oma Jurüzan' i Tröhgornii suvipäivnouzmha, Katav-Ivanovsk suvhe, Sim-lidn päivlaskmha.

«Čeläbinsk — Uf»-avtote (M5-trass) mäneb lidnan suviröunaks. Ust'-Katav-stancii radab «Čeläbinsk — Uf»-raudtekeskustal vspäi 1890, sijadase Jurüzanin pohjoižrandal.

Tobmuz

Kaik seičeme muite žilod, kaks' žilod raudtestancijanno i üks' külä mülüdas lidnümbrikho Ust'-Katavan ližaks. Lidnümbrikon pind — 675 km².

Lidnümbrikon tobmuden pämez' om sen Administracijan pämez'. Lidnümbrikon Deputatoiden nevondkundan ezimez' om Sergei Pul'däjev vn 2020 redukuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 23 580 ristitud, lidnümbrikon — 26 917 ristitud. Vl 2019 ühthemänho 22 042 ristitud elihe lidnas i 24 922 ristitud kaikes lidnümbrikos. Kaikiš suremb lidnan ristitišt oli 31 400 eläjad vl 1992.

Rahvahad (2010): venälaižed — 87,0 %, baškiralaižed — 7,2 %, totarlaižed — 3,6 %, toižed rahvahad — 2,2 %.

Ortodoksižen hristanuskondan kaks' pühäpertid oma saudud lidnas: Raštvoiden jumalanpert' (letihe vll 1799−1820) i Jumalanmaman Smolenskan jumalaižen puine časoun' (1998). Niiden ližaks üks' jumalanpert' om avaitud i kaks' jumalanpertid oma kaičenus vaiše paloin lidnümbrikon žiloiš. Islaman pühäpert' om avaitud lidnas vspäi 2021.

Ust'-Katavan industrialiž-tehnologine tehnikum om lidnan professionaližen opendusen aluzkundaks.

Galerei

• 
  Bränskan sild Jurüzaniš päliči vl 2012
• 
  Vaumitud tondaks Permihe ezmäine 71-623-tramvai raudteil Ust'-Katavan vagonansauvomižen tegimenno vl 2011
• 
  Vagonansauvojiden kul'turkeskuz T. Belokonevan nimed (2010)
• 
  Ust'-Katav-päraudtestancijan sauvuz vl 2021

Irdkosketused

• Lidnümbrikon oficialine sait (ukgo.su). (ven.)