Tihoreck

Tihoreck (ven.: Тихоре́цк) om Venäman lidn da lidnankund Krasnodaran randan pohjoižpäivnouzmas. Se om Tihoreckan rajonan administrativine keskuz, mülüb sihe vspäi 2008.

Tihoreck
Тихорецк

Lidnanznam	Flag
Valdkund	Venäma
Eläjiden lugu (2023)	54,582 ristitud
Pind	46,02 km²
Pämez'	Jevgenii Golub' (reduku 2018—)
Telefonkod	+7−86 196-xx-xxx
Avtokod	23, 93, 123
Aigvö	UTC+3 (MSK+0)

Istorii

Nevondkundaline lidnanznam (1970)

Tihoreckai-raudtestancii (ven.: станция Тихорецкая) radab vn 1874 semendkuspäi «Rostov — Vladikavkaz»-keskustal. Nimitihe raudtestancijad lähižen Tihoreckai-stanican mödhe (ven.: станица Тихорецкая), se sijadase seičemes kilometras pohjoižpäivnouzmha, udesnimitihe vl 1930 Fastoveckajaks putlikoičendad vaste. Ühtištadihe Tihoreckii-futorad i žilod raudtestancijanno da kätihe lidnaks vn 1926 1. päiväl keväz'kud, nimitihe nügüdläižikš. Toižen mail'man sodan aigan lidn oli okkupiruidud Germanijan i Romanijan sodavägil (5. eloku 1942 — 30. viluku 1943). Vspäi 1961 alištihe lidnad randan tobmudele oikti.

Tihoreck šingotase sömtegimišton (leibän, lihan, saguden kombinatad, oludentegim) da raudten edheotandoiden keskuseks, mugažo mašiništonsauvomižen tegim radab, se pästab raudteiden kohenduztehnikad.

Geografijan andmused

Lidn sijadase Čelbas-jogen oiktal randpolel (ven.: Челбас 288 km pitte, lankteb soho Azovmeren randal, om sidodud Azovmerhe solakahiden limanoiden kal't), koumes kilometras jogespäi, 80 m ü.m.t. keskmäižel korktusel.

Matkad Krasnodarhasai om 128 km suvipäivlaskmha orhal vai 155 km avtol ajaden, mugažo voib sadas oiktadme raudtedme. Lähembaine lidn om Kropotkin 63 km suvipäivnouzmha raudtedme vai «Kavkaz»-avtotedme.

Tobmuz

Kamennii-žilo (1144 rist. vl 2010) i Tihon'kii-žilo raudtesarakonno (328 rist. vl 2010) mülüdas lidnankundha Tihoreckan ližaks. Lidnankundan pind — 76,03 km².

Edeline lidnankundan pämez' (Administracijan pämez') om Sergei Koräkin (sügüz'ku 2015 — reduku 2018).

Eläjad

Vn 2010 Venäman rahvahanlugemižen mödhe lidnan eläjiden lugu oli 61 823 ristitud, lidnankundan — 63 295 ristitud, rajonan pol'. Vn 2021 rahvahanlugemižen mödhe lidnan ristitišt oli 55 686 eläjad. Vl 2017 kaik 58 982 ristitud elihe lidnas i 60 445 ristitud kaikes lidnankundas. Kaikiš suremb lidnan ristitišt oli 70 300 eläjad vl 1996.

Rahvahad (lidnan eläjad, enamba 1,0 % vl 2010): venälaižed — 94,5 %, armenijalaižed — 1,6 %, ukrainalaižed — 1,4 %, toižed rahvahad — 2,2 %, rahvahuden ozutandata — 0,3 %.

Ortodoksižen hristanuskondan koume pühäpertid oma avaitud lidnas: Jumalanmaman Emäganpäivän kafedraline päjumalanpert' (letihe vl 1910), Sündun Eläbzdusen i ph. Ksenija Piterilaižen jumalanpertid.

Lapsiden opendusen aluzkundad oma 12 municipališt päivkodid i Venäman raudteiden üks' päivkodi, kuz' keskškolad (nomer 1, 2, 3, 4, 7, 34), kaks' gimnazijad (nomerad 6, 8), kaks' sportškolad, čomamahtoiden škol, čomamahtoine škol, lapsiden tehnižen sädamižen keskuz. Tihoreckan koume tehnikumad oma lidnan professionaližen opendusen aluzkundoikš: raudtetransportan (Rostovan raudteühtenzoitusen universitetan filial), industrialine, saraktehnologijoiden.

Transport

Avtobusad (15 maršrutad) da taksid oma kundaližeks transportaks lidnas. Järed raudtesol'm i raudtetransportan edheotandad sijadasoiš lidnas.

«Kavkaz»-avtote (R-217) om lidnan pohjoižpäivnouzmaižeks röunaks.

Galerei

• 
  Rajonan Maižandusen ohjanduzkund (2018)
• 
  Tulend rajonan Hoštusen alleiha, vn 2017 nägu
• 
  «Gostinii dvor»-adivpert' vl 2007 (Adivpertintanaz)
• 
  «Pobeda»-kinoteatr (2013, Vägestuz)
• 
  Tihoreckai-päraudtestancii vl 2018 (istorine sauvuz om restavracijas)

Irdkosketused

• Lidnankundan tobmuden sait (tihoretsk-gorod.ru). (ven.)