Hul Purde

Hul Purde (ven.: Горя́чий Ключ) om Venäman lidn Krasnodaran randan keskuzpalan suvipäivlaskmas. Se om municipaližen «Hul Purde-lidn»-ühtnikan da lidnümbrikon administrativižeks keskuseks da palaks.

Hul Purde
Горячий Ключ

Lidnanznam	Flag
Valdkund	Venäma
Eläjiden lugu (2023)	41,482 ristitud
Pind	20,77 km²
Pämez'	Sergei Belopol'skii (kezaku 2021—)
Telefonkod	+7−86 159-xx-xxx
Avtokod	23, 93, 123
Aigvö	UTC+3 (MSK+0)

Istorii

Edel 19. voz'sadan kahtent pol't adiglaižiden Psifab-aul (adig.: Псыфабэ «hul vezi») oli necil sijal. Nügüdläižen eländpunktan aluz om pandud vl 1864 kuti lebutaho-kurort, saudihe sodaläžundkodid, kül'bendsijad da puištod. Vn 1965 11. päiväl kül'mkud kurortine žilo sai lidnan statusad.

Mineralveden butiliruindan tegimed, turistad, lebuntahtnikad, meblin tehmine, kivivoin samižen sarak šingotadas Hul Purde-lidnad.

Geografijan andmused

Lidn sijadase Kavkazan ezimägištonno, Psekups-jogen randoil (adig.: Псэкъупс 146 km pitte, Kubanin hura ližajogi), 70 m ü.m.t. keskmäižel korktusel. Matkad Krasnodarhasai om 50 km pohjoižhe avtotedme vai raudtedme. Lähembaine lidn om Adigeisk (Adigejan Tazovaldkundan pälidn) 35 km pohjoižhe niil-žo teil.

Klimat om ven subtropižen nepsan vönen pirdoidenke. Voden keskmäine lämuz om +12,2 C°, kezakun-elokun +20,6..+23,1 C°, vilukun-uhokun +1,7..+2,1 C°. Ekstremumad oma −29 C° i +38 C°. Paneb sadegid 895 mm vodes, läz tazomäras kuidme, enamba kül'mkus-vilukus (89..101 mm kus).

Tobmuz

Kaik 30 eländpunktad mülüdas lidnümbrikho Hulan Purtken ližaks: kahesa stanicad, 13 žilod da ühesa futorad, ühtenzoittas niid seičemeks küläümbrikoks. Lidnümbrikon pind — 1766,5 km².

Municipaližen «Hul Purde-lidn»-ühtnikan edeližed pämehed (lidnümbrikon Administracijan pämehed) oma Aleksandr Kil'gankin (kül'mku 2018 — sulaku 2021) i Ivan Fedorovskii (kezaku 2015 — reduku 2018). Lidnümbrikon Nevondkundan ezimez' om Vladimir Jerohin vn 2020 redukuspäi. Edeline Nevondkundan ezimez' om Aleksandr Korobka (kül'mku 2017 — reduku 2020).

Eläjad

Vn 2010 Venäman rahvahanlugemižen mödhe lidnan eläjiden lugu oli 30 126 ristitud, lidnümbrikon — 57 289 ristitud. Vn 2021 rahvahanlugemižen mödhe lidnan ristitišt oli 40 903 eläjad, lidnümbrikon — 66 282 eläjad. Vl 2018 kaik 37 475 ristitud elihe lidnas i 66 008 ristitud kaikes lidnümbrikos. Kaikiš suremb lidnan ristitišt om nügüd', lidnümbrikon oli 69 702 eläjad vl 2020.

Rahvahad (lidnan eläjad, enamba 0,4 % vl 2010): venälaižed — 83,4 %, armenijalaižed — 5,9 %, ukrainalaižed — 2,5 %, adiglaižed — 0,6 %, totarlaižed — 0,5 %, vaugedvenälaižed — 0,4 %, saksalaižed — 0,4 %, toižed rahvahad — 2,0 %, rahvahuden ozutandata — 4,3 %.

Ortodoksižen hristanuskondan kaks' pühäpertid oma avaitud lidnas: Eläban Eziauguižen Stroican jumalanpert' (letihe vll 1995−2009) i Jumalanmaman Iveronan jumalaižen časoun'.

Lapsiden opendusen aluzkundad oma seičeme päivkodid (nomer 1..5, 8, 16), nell' keskškolad (nomer 1..4), lapsiden sädamižen keskuz, lapsiden da norišton sportškol. Hulan Purtken medicinine kolledž i tehnologine tehnikum oma lidnan professionaližen opendusen aluzkundoikš.

Transport

Hul Purde-raudtestancii radab vspäi 1978, sijadase jogen hural randpolel, «Krasnodar — Tuapse»-keskustal. «Don»-avtote (M4-trass) läbitab lidnan hurarandališt palad.

Avtobusad da ezilidnelektrojonused ühtenzoittas lidnad ümbrištonke.

Galerei

• 
  Lidnan keskuzline Leninan ird vn 2006 elokus
• 
  Iveronan časoun' i Iveronan purde, vn 2012 nägu
• 
  «Predgorje Kavkaza»-sanatorii vl 2012 (Kavkazan ezimägišt)
• 
  Jäpert'kulu (2014)
• 
  Hul Purde-päraudtestancii vl 2006

Irdkosketused

• Lidnümbrikon tobmuden sait (gorkluch.ru). (ven.)