Ust'-Labinsk

Ust'-Labinsk
Усть-Лабинск
Lidnanznam;	Flag;
Valdkund	Venäma
Eläjiden lugu (2023)	39,050 ristitud
Pind	37,15 km²
Pämez'	Stanislav Gainüčenko; (sulaku 2020—)
Telefonkod	+7−86 135-xx-xxx
Avtokod	23, 93, 123
Aigvö	UTC+3 (MSK+0)

Ust'-Labinsk (ven.: Усть-Лаби́нск, suline mugažo Усть-Лаба i Услаба́, adig.: Лэбап) om Venäman lidn, lidnankund da avtotesol'm Krasnodaran randan keskuzpalas. Se om Ust'-Labinskan rajonan administrativine keskuz.

Istorii

Eländpunktan aluz om pandud vl 1794 kuti Ust'-Labinskai-stanic (ven.: станица Усть-Лабинская) sirdanuzil Donan randaspäi kozakoil. Vl 1900 saudihe raudtestancijan «Jekaterinodar — Kavkazskai»-keskustal. Stanic sai lidnan statusad nügüdläiženke nimenke vl 1958. Stanican lidnusen varmitesed oma kaičenus hüvin.

Ust'-Labinsk šingotase sömtegimištol (efirvoiden ekstrakcijan kombinat, saharan tegim, lihakombinat), sauvondmaterialiden pästandan edheotandoil (gazbetontegesed, raudbetontegesed), kohenduzmehanižel tegimel^[1] (mašiništ sahar-, voi- i sauvondtegimištoiden täht, metallan ümbriradmine), propilenhavadoiden tegimel. Lidn om maižanduzrajonan keskuseks, kazvatadas villänkul'turoid, änikoid, semnid, i lindvodindan ferm radab. «Kuban'»-agroholdingan päfater om saudud lidnas.

Geografijan andmused

Lidn sijadase 75 m korktusel valdmeren pindan päl, Kuban'-jogen oiktal korktal randal, sen ühthejoksmust vaste Labanjogenke.

Ust'-Labinsk seižub Adigejan Tazovaldkundan röunanno. Matkad Krasnodarhasai om 62 km päivlaskmha. Lähembaine lidn om Korenovsk koumekümne kilometrad lodeheze avtotedme.

Tobmuz

Ust'-Labinsk om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Edeline Administracijan pämez' om Sergei Viskubov (reduku 2017 — semendku 2019). Lidnan Nevondkundan ezimez' om Svetlana Agibalova vn 2019 kül'mkuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 43 270 ristitud, vn 2021 — 40 158 ristitud. Kaik 41 348 eläjad oli lidnas vl 2017. Kaikiš suremb lidnan ristitišt oli läz 44 tuhad eläjid vozil 1996−2003.

Rahvahad (enamba 1 % vl 2010): venälaižed — 91,9 %, armenijalaižed — 3,2 %, ukrainalaižed — 1,3 %, toižed rahvahad — 3,1 %, rahvahuden ozutandata — 0,5 %.

Hristanuskondan kuz' pühäpertid oma saudud: koume — ortodoksine^[2], kaks' — baptizman, üks' — seičemenden päivän adventistoiden.

Lapsiden opendusen aluzkundad oma severz'-se päivkodid, keskškolad. Saudud Oleg Deripaska-edheotajan fondal licei lahjoitud lapsiden täht^[3] om avaitud vl 2022. Ust'-Labinskan socialiž-pedagogine kolledž^[4] om lidnan professionaližen opendusen aluzkundaks.

Galerei

Amptud nacistoil Suren sodan aigan sijaližiden eläjiden velleskaum (2020)
Ph. Sergii Radonežalaižen jumalanpert' (ortodoksine hristanuskond), vn 2010 nägu
Rajonan kodirandantedištandmuzei vl 2018
Vanh sauvuz Leninan i Demjan Bednijan irdoiden saumal (2013)
Vanh sild Kubaniš päliči i nägu lidnusespäi Hatukai-aulha (Adigei) vl 2012
Ust'-Labinskai-päraudtestancii vl 2023

Homaičendad

Irdkosketused

Lidnankundan tobmuden oficialine sait (gorod-ust-labinsk.ru). (ven.)

Ust'-Labinsk Vikiaitas

	Krasnodaran randan lidnad
	Abinsk \| Anap \| Apšeronsk \| Armavir \| Belorečensk \| Gelendžik \| Gul'keviči \| Hadižensk \| Hul Purde \| Jeisk \| Korenovsk \| Krasnodar \| Krimsk \| Kropotkin \| Kurganinsk \| Labinsk \| Novokubansk \| Novorossiisk \| Primorsko-Ahtarsk \| Slavänsk Kubanil \| Soči \| Temrük \| Tihoreck \| Timašovsk \| Tuapse \| Ust'-Labinsk

[1] Kohenduzmehanižen «Ust'-Labinskii»-tegimen sait (ulormz.ru). (ven.)

[2] Ust'-Labinskan pühäpertid sobory.ru-saital. (ven.)

[3] Ezmäižen universitetižen licein N.I. Lobačevskijan nimed sait (ul-lyceum.ru). (ven.)

[4] Ust'-Labinskan socialiž-pedagogižen kolledžan sait (ulspk.ru). (ven.)

[1]

[2]

[3]

[4]

Lidnanznam	Flag
Valdkund	Venäma
Eläjiden lugu (2023)	39,050 ristitud
Pind	37,15 km²

Pämez'	Stanislav Gainüčenko (sulaku 2020—)
Telefonkod	+7−86 135-xx-xxx
Avtokod	23, 93, 123
Aigvö	UTC+3 (MSK+0)