Kamennogorsk

Kamennogorsk (ven.: Каменного́рск, vhesai 1948 Antrea, suom.: Antrea tähäsai, ven.: А́нтреа, roč.: Sankt Andree nügüd'-ki) om Venäman lidn Leningradan agjan lodehes. Kamennogorsk mülüb Viipurin rajonha, sen koumanz' surtte lidn da videnz' surtte eländpunkt.

Kamennogorsk
Каменногорск

Lidnanznam	Flag
Valdkund	Venäma
Eläjiden lugu (2023)	7,068 ristitud
Pind	10 km²
Pämez'	Vasilii Gusev (2013—)
Telefonkod	+7−81 378-xx-xxx
Avtokod	47
Aigvö	UTC+3 (MSK+0)

Istorii

Mehed elädas lidnan ümbrištos amussai, vl 1913 löuzihe kalaverkod 9. voz'tuhaspäi EME. 14.−17. voz'sadoil žilo oli Ülävuoksan karjalaižiden küliden keskuseks. Eländpunkt mainitase ezmäižen kerdan dokumentoiš vl 1597 kuti ph. Ezikuctud Ondrijan lüteranižen kundan keskuz, nimitihe ročikš. Vozil 1809−1917 alištui Venäman tobmudele suomen nimenke, se mülüi Viipurin gubernijha. Vozil 1917−1940 mülüi Suomenman Viipurin agjan Antrean makundha.

Vn 1940 keväz'kul Tal'vsodan jäl'ghe kožundaktan mödhe Antrea-torguindžilo oli mülünu NSTÜ:n Karjalaha i anttihe lidnan statusad, vn 1944 kül'mkuspäi alištub Leningradan agjan tobmudele. Vl 1948 udesnimitihe lidnad Granitnii, sid' Pervomaisk, i sen-žo voden 1. päiväl redukud nimitihe lidnad nügüdläižikš.

Kamennogorskan ižandusen päsarakod oma rugižkiven samine (seičeme edheotandad) i cellülozbumagaine («Svenska Cellulosa Aktiebolaget»-kompanijan bumagfabrik).

Geografijan andmused

Lidn sijadase Karjalan kaglhan pohjoižpalas, Vuoks-jogen üläjoksmusen hural randal tobjimalaz da peniden järviden randoil, 20 m ü.m.t. keskmäižel korktusel. Matkad Piterin röunhasai (Zelenogorsk) om sada kilometrad raudtedme, Piterin keskushesai om 130 km suvipäivnouzmha orhal vai 174 km avtotedme. Matkad Suomenman röunhasai (avtokontrol'punkt Svetogorskas) om 30 km lodeheze jogedme, avtotedme vai raudtedme.

Kaik kaks'kümne ühesa žilod mülüdas lidnankundha Kamennogorskan ližaks, kaikiš surembad — Vozroždenije (suom.: Kavantsaari, 1803 eläjad vl 2010) i Prudi («uitod», 1012 rist. vl 2010). Lidnankundan pind — 1733,57 km².

Eläjad

Vl 1959 eläjiden lugu oli 3 025 ristitud. Vn 2010 Venäman rahvahanlugemižen mödhe lidnan eläjiden lugu oli 6 739 ristitud, lidnankundan — 12 740 ristitud. Lidnan ristitišt oli kuz'..seičeme tuhad vozil 1996−2017 i vspäi 2021, kaikiš suremb oli 7 160 eläjad vl 2021. Vl 2017 kaik 6 696 ristitud elihe lidnas i 12 521 ristitud kaikes lidnankundas.

Ortodoksižen hristanuskondan ph. Serafim Sarovalaižen puine jumalankodi om saudud vll 1997−2003. Sen ližaks, 19. voz'sadan lüteranižen kirhan jändused oma olmas memorialižes «Antrea»-puištos.

Professionaližen opendusen aluzkundad ratas lähembaižiš lidnoiš.

Lidnankundan pämez' om Deputatoiden nevondkundan ezimez'.

Transport

Voib sadas Viipurišpäi avtobusal vai ezilidnelektrojonusel. «Piter — Svetogorsk»- i «Viipur — Hiitol (Karjal) — Lahdenpohj»-raudtejonod ristikoitas lidnas. Ezmäine jono kävutase ajamha jüguid tobjimalaz Suomenmaha da tagaz. Kamennogorsk I-raudtestancii om olmas «Viipur — Hiitol»-jonol, saudihe vl 1892. Sen ližaks Kamennogorsk II-stancii-raudtesol'm om avaitud vn 2015 redukus vaiše jüguiden täht.

«Viipur — Priozersk»-avtote läbitab lidnad.

Galerei

• 
  Lämoipalonvastaine keskuz
• 
  Kul'turkeskuz (ezimal)
• 
  Bumagfabrik vl 2019, oli sahartegimeks edel Tal'vsodad
• 
  Keskškol
• 
  Kamennogorsk I-raudtestancijan sauvused (2019)

Irdkosketused

• Lidnankundan tobmuden aluzkundoiden oficialine sait (kamennogorsk.vbglenobl.ru). (ven.)