Boksitogorsk

Boksitogorsk vai Boksit (ven.: Бокситого́рск) om Venäman lidn da lidnankund Leningradan agjan suvipäivnouzmas. Se om Boksitogorskan rajonan administrativine keskuz (vspäi 1952).

Boksitogorsk
Бокситогорск

Lidnanznam	Flag
Valdkund	Venäma
Eläjiden lugu (2023)	15,674 ristitud
Pind	13 km²
Pämez'	Irina Titova (sulaku 2019—)
Telefonkod	+7−81 366-xx-xxx
Avtokod	47
Aigvö	UTC+3 (MSK+0)

Istorii

Ende Pärdoman pogast oli lidnan sijas, amuiženno tarabošsijanno. Eländpunktan aluz om pandud vl 1929 kuti Boksiti-külä läz boksitoiden da mouckiven löudmižsijid. Vl 1935 külä kändihe žiloks, nimitihe nügüdläižikš. Žilo sai lidnan statusad vl 1950.

Boksitogorsk šingotase RUSAL-kompanijan boksittegimel i elektromehanižel edheotandal. Ende biohimine tegim radoi sijaližel turbhal mugažo.

Geografijan andmused

Lidnan tobj pala seižub Pärdoml'-jogen oiktal randal (Säs'-jogen bassein), 100 metrad ü.m.t. keskmäižel korktusel. Matkad Piterihesai om 271 kilometrad orhal. Lähembaine lidn om Pikalövo 20 km pohjoižpäivnouzmha orhal vai 30 km avtotedme.

Kaik kümne pen't küläd mülüdas lidnankundha Boksitogorskan ližaks. Lidnankundan pind — 213 km².

Tobmuz

Lidnankund jagase videks valičemižümbrikoks. Lidnankundan Deputatoiden Nevondkund mülütab 15 deputatad, sen pämez' om Irina Titova vn 2019 sulakuspäi.

Lidnankundan edeližed pämehed (Nevondkundan ezimehed):

• Nadežda Pikaleva vn 2014 19. päiväspäi sügüz'kud, läksi erindha ičetahtol;
• Mihail Katüščenko (2. uhoku 2017 — 5. sulaku 2019).

Lidnankundan Administracii om likvidiruidud vn 2014 lopus, rajonan tobmuz tegeb sen velgusidme.

Eläjad

Vn 2010 Venäman rahvahanlugemižen mödhe kaik 16 585 ristitud elihe lidnas, 16 716 — kaikes lidnankundas. Vl 2017 lidnan ristitišt oli 15 406 eläjad, lidnankundan 15 516 eläjad. Boksitogorskan rajonan ristitišton läz koumandest eläb Boksitogorskas. Kaikiš suremb lidnan ristitišt oli 23 212 eläjad vl 1979.

Ortodoksižen hristanuskondan puine Pühän Jumalanmaman Katken jumalanpert' om avaitud lidnas vspäi 2007. Om äi pühäpertid i jumalankodi lähižiš küliš.

Lapsiden opendusen aluzkundad oma kuz' päivkodid, koume keskškolad (nomer 1, 2, 3), ližaopendusen keskuz, čomamahtoiden škol, lapsiden i norišton sportškol. Leningradan valdkundaližen universitetan Puškinan nimed (Puškin) Boksitogorskan institut (filial) om lidnan professionaližen opendusen aluzkundaks.

Transport

Kundaline transport om avtobusad lidnan südäimes, ümbrištos da Piterihesai.

Lidnan Boksitad-raudtestancii radab vedamha jüguid vaiše. Lähembaine järed raudtestancii passažiroiden täht om Pikalövo I, se sijadase 27 kilometras pohjoižpäivnouzmpolehe avtotedme.

Galerei

• 
  Boksitogorskan lidnankundan sijaduz rajonan kartal (2013)
• 
  Fontank-järven randird, vn 2022 nägu
• 
  Boksitad-raudtestancii vl 2007

Lidnan ühthine nägu pohjoižpäivnouzmaspäi vn 2020 kezakus

Irdkosketused

• Lidnankundan lehtpoled Boksitogorskan rajonan oficialižel saital (adm.boksitogorsk.ru). (ven.)