Pikalövo (ven.: Пикалёво) om Venäman lidn da lidnankund Leningradan agjan suvipäivnouzmas. Se om Boksitogorskan rajonan kaikiš suremb lidn kahtespäi.

Pikalövo
Пикалёво
 Lidnanznam
 Flag
Valdkund Venäma
Eläjiden lugu (2023) 20,169 ristitud
Pind 38,06 km²
Pikalövo Пикалёво
Pämez' Lüdmila Griškina
(sügüz'ku 2019—)
Telefonkod +7−81 366-xx-xxx
Avtokod 47
Aigvö UTC+3 (MSK+0)

Istorii vajehta

Eländpunkt mainitase ezmäižen kerdan vl 1620 Änižen pätinan aigkirjas, sijadase amuižel pustolänil. Eziauguine futor oli nimitadud Pikalöv-manmehen-alusenpanijan kanzannimen mödhe. Vl 1906 nimitihe raudtestancijad «Piter — Vologd»-jonol Pikalövo-külän mödhe. Vozil 1927−1930 Pikalövo-žilo oli Pikalövon rajonan administrativižeks keskuseks. Vozil 1935−1941 saudihe cementtegint da radnikžilod.

Vspäi 1947 Pikalövo oli lidnanvuiččeks žiloks. Se sai lidnan statusad vl 1954. Vozil 1996−2006 alištui agjan tobmudele oikti da ei mülünd Boksitogorskan rajonha. Vozil 2008−2009 mail'man finansižen krizisan aigan pätegimiden pidajad tahtoiba saubata enambust niišpäi, no eläjad ei antkoi tehta necidä, sen tagut lidn sai tetabut.

Pikalövon ižandusen sarakod oma sauvondmaterialiden pästand (cement[1], vahtbeton, raudbetontegesed), substancijoiden pästand (alüminijan hapanduz[2], gallii, potaš, mouckivi), mugažo mecanümbriradmižen edheotand i kolbasceh ratas lidnas.

Geografijan andmused vajehta

Lidn sijadase Rädan'-jogen oiktal randal (Säs'-jogen bassein), 180 m ü.m.t. keskmäižel korktusel.

Matkad Piterihesai om 220 km päivlaskmha orhal, 230 km raudtedme vai 260 km avtotedme. Om 27 kilometrad päivlaskmpolehe lähembaižhe Boksitogorsk-lidnhasai.

Tobmuz vajehta

Pikalövo om lidnankundan üks'jäižeks eländpunktaks.

Lidnankundan tobmuden pämez' om sen Deputatoiden nevondkundan ezimez'. Edeline nevondkundan ezimez' om Nikolai Semönov (sügüz'ku 2014 — sügüz'ku 2019). Lidnan Administracijan pämez' om Dmitrii Sadovnikov vn 2016 redukuspäi.

Eläjad vajehta

Vn 2010 Venäman rahvahanlugemižen mödhe lidnan eläjiden lugu oli 21 562 ristitud, vn 2021 — 20 388 ristitud, rajonan kaks' videndest. Kaik 20 379 eläjad oli lidnas vl 2017. Kaikiš suremb lidnan ristitišt oli 24..25 tuhad eläjid vozil 1989−2001 (25 700 rist. vl 2000).

Ortodoksižen hristanuskondan kaks' pühäpertid[3] oma avaitud lidnas: Sündun Ristan Zdviženjan jumalanpert' (2006) i Hristan Eläbzdusen Pühäpertin Udištandan puine jumalanpert' (om letud vspäi 1998).

Lapsiden opendusen aluzkundad oma nell' keskškolad, lapsiden sädamižen pert', čomamahtoiden škol, lapsiden i norišton sportškol. Leningradan valdkundaline universitet Puškinan nimed, sen Boksitogorskan institutan (filialan) palakund[4] (edel 2010. vot pedagogine kolledž) om lidnan professionaližen opendusen aluzkundaks.

Transport vajehta

Avtobusad oma kundaližeks transportaks lidnas da sen ümbrištos. «Vologd — Uz' Ladog»-mante (A114-trass) ümbärdab lidnad 2000-nziden voziden auguspäi, ende läbiti.

Kaik koume raudtestancijad om läz lidnad: Pikalövo I (passažiroiden täht), Pikalövo II (tegimištzonas) i Fabričnai (ven.: Фабричная, jüguiden täht). Ezilidnelektrojonused ühtenzoittas Piterinke.

Homaičendad vajehta

  1. Pikalövon cementantegim scement.ru-saital. (ven.)
  2. Pikalövon alüminijan hapandusen tegimen sait (pglz.ru). (ven.)
  3. Pikalövon pühäpertid sobory.ru-saital. (ven.)
  4. LVU:n Puškinan nimed Boksitogorskan institutan sait (билгу.рф). (ven.)

Irdkosketused vajehta



Leningradan agjan lidnad
Boksitogorsk | Gatčin | Ivangorod | Kamennogorsk | Kingisepp | Kiriši | Kirovsk | Koltuši | Kommunar | Kos'kenaluine | Kudrovo | Lug | Lüban' | Murino | Nikol'skoje | Otradnoje | Pikalövo | Primorsk | Priozersk | Pöud | Sertolovo | Slanci | Sosnovii Bor | Svetogorsk | Säs'stroi | Šlissel'burg | Tihvin | Tosno | Uz' Ladog | Viipur | Visock | Volhov | Volosovo | Vsevoložsk