Saratovan agj

Saratovan agj
Саратовская область

Saratovan agjan flag Saratovan agjan znam
Pälidn	Saratov
Pind - Ühtes - saum vezid (%).	32-nz' 101 240 km² 3,54
Eläjiden lugu - Kaik - Sageduz	20-nz' 2,462,950 ristitud (2018) 24,33 rist./km²
Regionaline KSP - Kaik, nügüdläižiš arvoiš - Ühtele hengele	28-nz' 655,1 mlrd rub. (2016) 263,8 tuh. rub.
Federaline ümbrik	Volgaveren
Venäman ekonomine region	Volganrandaline
Valdkundkel' (-keled)	venäkel'
Gubernator	Valerii Radajev
Ohjastusen ezimez'	hän-žo
Agjan Duman ezimez'	Ivan Kuz'min
Avtokod	64, 164
Aigvöd	UTC+4 (MSK+1)

Saratovan agj (ven.: Саратовская область) om Venälaižen Federacijan subjekt.

Se mülüb Volgaveren federaližhe ümbrikho.

Agjan administrativine keskuz da kaikiš suremb lidn om Saratov.

Keled

Valdkundkel' om üks'jäine — venäkel'.

Istorii

Saratovan agj om olmas vs 1936 tal'vkun 5. päiväspäi.

Saratovan agjan Päkäskuz om vahvištadud vn 2005 24. päiväl semendkud Agjan Duman ezitajil, om allekirjutadud gubernatoral sen-žo voden 2. päiväl kezakud da om väges möhembaižidenke vajehtusidenke. Se vajehti endišt Päkäskust, kudamb oli vahvištadud vn 1995 5. päiväl sulakud.

Geografijan andmused

Saratovan agjan reljefan kart

Agjal om röunoid Samaran agjanke pohjoižpäivnouzmas, Orenburgan agjanke päivnouzmas, Kazahstananke suvipäivnouzmas (sen Päivlaskmaiž-Kazahstanan agjanke), Volgogradan agjanke suves, Voronežan da Tambovan agjoidenke päivlaskmas, Penzan da Ul'janovskan agjoidenke pohjoižes. Saratovan agj om mererandatoi.

Pind om 101 240 km². Stepid da mustma ottas territorijan tobjad palad. Agjan päivlaskmpolen joged jokstas Donha, niišpäi Hopr da Medvedic oma znamasižed. Agjan suvipäivnouzmpol'žed Sur' Uzen'- da Pen' Uzen'-joged kadodas Kazahstanan letkihe. Kaikiš pidemb jogi om Volg, sen znamasižed ližajoged oma Sur' Irgiz da Terešk. Volgan hura rand nimitase Volgantagaižeks. Kaikiš järedambad vezištod oma Saratovan i Volgogradan vezivaradimed.

Agjan päivnouzman reljef om tazo. Päivlaskmaižen reljef om kukhikaz da vanoikaz. Volgaveren ülüz läbitab agjan kesked suvespäi pohjoižhe pidust' Volgan oiktad randad. Kaikiš korktemb čokkoim om Hvalinskan mägiden nimetoi kukkaz agjan pohjoižes (369 m).

Klimat om ven kontinentaline, kontinentaližuz ližadab päivlaskmaspäi päivnouzmha. Keza om läm' +20..+22 C° keskmäiženke lämudenke. Vilukun da uhokun keskmäine lämuz om −8 C°, pakaižed oleldas −30 Cel'sijan gradushasai. Paneb sadegid 250 mm vodes agjan suvipäivnouzmas da 550..580 mm vodes agjan päivlaskmas. Kevädel oleleb sadegid kaikiš penemba.

Londuseližed varad oma kivivoi, londuseline gaz, palab šoidkivi, sauvondmaterialad (mouckivi, saved, letked, mergel'), fosforitad, kaliisol, mustma.

Tobmuz

Agjan Duman sauvuz Saratovas

Agjan pämez' nimitase gubernatoraks. Valerii Radajev radab gubernatoran vs 2012 sulakun 5. päiväspäi, Agjan Dum pani händast radsijha eziauguižešti Venäman prezidentan taričendan mödhe. Hänen valdatusiden strok om viž vot. Gubernator om mugažo agjan Ohjastusen ezimez', hän märičeb sen strukturad da paneb sen ühtnijoid radnikusile. Varagubernator, nell' Ohjastusen varaezimest da Gubernatoran Apparat oma hänele abhu.

Saratovan agjan üks'kodine parlament om Agjan Dum. Kaik rahvaz valičeb sen 45 ezitajad videks vodeks. Ivan Kuz'min radab Agjan Duman ezimeheks vs 2017 sügüz'kun 26. päiväspäi.

Radonoigendai tobmuz om Saratovan agjan Ohjastuz. Agjan ministrused, komitetad, ohjandused da valdkundaližed inspekcijad alištudas Ohjastusele.

Agjan Duman ühtnijoiden järgenduseližed valičendad oliba vn 2017 10. päiväl sügüz'kud (6. kucund). Valitihe gubernatorad sil-žo päiväl, nügüdläine gubernator sai vägestust ezmäižes turas 74,63% änid rezul'tatanke da radab kahtenden strokun jäl'geten.

Eläjad

Vn 2010 Venäman rahvahanlugemižen mödhe eläjiden lugu oli 2 521 892 ristitud. Kaikutte koumanz' ristit nelläspäi om lidnalaine.

Kaik om kahesatoštkümne lidnad agjas da 26 lidnanvuittušt žilod. Toižed järedad lidnad (enamba 100 tuh. ristituid, surembaspäi penembha) oma Engel's da Balakovo. Vl 2017 kaik om 20 eländpunktad enamba mi 10 tuh. eläjidenke.

Rahvahad (enamba 0,4% vl 2010): venälaižed — 85,3%, kazahlaižed — 3,0%, totarlaižed — 2,1%, ukrainalaižed — 1,7%, armenijalaižed — 1,0%, azerbaidžanlaižed — 0,6%, čuvašalaižed — 0,5%, mordvinalaižed — 0,4%, toižed rahvahad — 2,8%, rahvahuden ozutandata — 2,6%.

Irdkosketused

• Saratovan agjan gubernatoran da Ohjastusen oficialine portal (saratov.gov.ru). (ven.)
• Saratovan agjan Duman oficialine sait (srd.ru). (ven.)