Rtiščevo

Rtiščevo (ven.: Рти́щево) om Venäman lidn, lidnankund da raudtesol'm Saratovan agjan lodehes. Se om Rtiščevon rajonan administrativine keskuz.

Rtiščevo
Ртищево

Lidnanznam	Flag
Valdkund	Venäma
Eläjiden lugu (2021)	38,030 ristitud
Pind	32,95 km²
Pämez'	Vladimir Kalämin (sügüz'ku 2018—)
Telefonkod	+7−84 540-xx-xxx
Avtokod	64, 164
Aigvö	UTC+4 (MSK+1)

Istorii

Eländpunktan aluz om pandud 17. voz'sadal, mainitase vspäi 1666. Edel 1723 vot žilon nimituz oli Pokrovskoje, sid' pomeššikoiden Rtiščevad-rodun kanzannimen mödhe, hö oliba žilon pidajikš vhesai 1794. Toine oli Rtiščevo-žilo raudtestancijanno vspäi 1871. Žilo raudtestancijanno sai lidnan statusad vn 1925 6. päiväl kezakud. Ühtištuihe endevanhad Rtiščevo-žilod lidnanke vl 1974.

Rtiščevo šingotase mašinansauvomižen «Argon»-tegimel (elektromagnitižed ajaimed, kaičendsistemad, käroudusen indikatorad, mebel'furnitur, mašinad vaumičemha heinäd da villäd živatoile sötkeks), magaduzsijansobiden da koditekstilin tegimel, sömtegimištol (kanafabrik ümbriradajanke tehmiženke), mugažo asfal'ttegim radab.

Geografijan andmused

Lidn sijadase rajonan keskuzpalas, Ol'šank-jogen (ven.: Ольшанка 42 km pitte) i Iznajir-jogen keskes (ven.: Изнаир 98 km pitte), 210 m ü.m.t. keskmäižel korktusel. Ol'šank-jogi om lidnan pohjoižröunaks, molembad joged oma Hopran üläjoksmusen hurad ližajoged. Matkad Penzan agjhasai om 20 km pohjoižhe orhal, Saratovhasai om 167 km päivnouzmha-suvipäivnouzmha orhal, 197 km avtotel vai raudtel. Lähembaižed lidnad oma Serdobsk (Penzan agj) 37 km pohjoižpäivnouzmha orhal, 48 km avtotel vai raudtel, i Arkadak 41 km suvhe-suvipäivlaskmha orhal, 52 km avtotel vai raudtel. Sodalendimport om koumes kilometras lodeheze lidnaspäi.

Rtiščevo om lidnankundan (municipaližen ühtnikan) üks'jäine eländpunkt. Lidnankundan pind — 32,95 km².

Eläjad

Vn 2010 Venäman rahvahanlugemižen mödhe lidnan da lidnankundan eläjiden lugu oli 41 289 ristitud, rajonan viž seičemendest. Kaikiš suremb lidnan ristitišt oli 44..45 tuhad eläjid vll 1989−2003 (45 100 rist. vll 1996−1998).

Rahvahad (enamba 0,4% vl 2010): venälaižed — 94,1%, ukrainalaižed — 0,6%, armenijalaižed — 0,4%, totarlaižed — 0,4%, toižed rahvahad i rahvahuden ozutandata — 4,5%.

Ortodoksižen hristanuskondan kaks' jumalanpertid oma avaitud lidnas: ph. Aleksandr Nevalaižen i ph. Mikulai-čudonsädajan.

Rtiščevon politehnine licei i Samaran valdkundaližen raudteiden universitetan filial (ende Rtiščevon raudtetransportan tehnikum) oma lidnan professionaližen opendusen aluzkundoikš.

Galerei

• 
  Ujundbassein (2008)
• 
  Ph. Aleksandr Nevalaižen jumalanpert', vn 2005 nägu
• 
  Suvipäivnouzmaižen raudten palakundan sauvuz vl 2007
• 
  Lidnan kul'turkeskuz (2007)
• 
  Rtiščevo I-päraudtestancii vl 2017

Irdkosketused

• Lidnankundan lehtpoled rajonan oficialižel rtishevo.sarmo.ru-saital. (ven.)
• Lidnan informacine sait (rtishevo.ru). (ven.)