Krasnoarmeisk (Saratovan agj)

Krasnoarmeisk (ven.: Красноарме́йск, saks.: Krasnoarmeisk) om Venäman lidn da lidnankund Saratovan agjan suves. Se om Krasnoarmeiskan rajonan administrativine keskuz.

Krasnoarmeisk
Красноармейск

Lidnanznam
Valdkund	Venäma
Eläjiden lugu (2021)	22,083 ristitud
Pind	25 km²
Pämez'	Aleksandr Kuz'menko (reduku 2016—)
Telefonkod	+7−84 550-xx-xxx
Avtokod	64, 164
Aigvö	UTC+4 (MSK+1)

Sil sanal voib olda toižid znamoičendoid; miše nähta niid, tulgat tänna.

Istorii

Eländpunktan aluz om pandud vl 1765 kuti sirdanuziden saksalaižiden Bal'cer-žilo (kolonii, saks.: Balzer), nimitihe ezmäižen tobminan Bal'cer Bartuli-manmehen nimen mödhe. Žilo sai oficiališt Pall'az Karamiš-nimitust (ven.: Голый Карамыш) jogen mödhe vn 1768 uhokus. Kätihe makundan keskuseks vl 1918, saksan avtonomijan kantonan keskuseks vl 1922. Žilo sai lidnan statusad vl 1925 Bal'cer-nimitusenke. Udesnimitihe vn 1942 semendkus Rusttan armijan oiktastuseks. Ei ole raudteühtenzoitust, tegimištoline raudtesarak om demontiruidud 1990-nzil vozil.

Krasnoarmeisk šingotase mašinansauvomižel (mehanine tegim, avtopaloiden pästand), keramikantegimel (kaidraižuiženke raudtenke kar'jeraspäi), kahtel omblendfabrikal.

Geografijan andmused

Lidn sijadase rajonan pohjoižpäivnouzmas, Pall'az Karamiš-joginiškan randoil (23 km pitte, Donan hurapol'ne bassein), 210 m ü.m.t. keskmäižel korktusel.

Matkad Saratovan keskushesai om 60 km pohjoižhe orhal vai 80 km avtotel. Toine lähembaine lidn om Žirnovsk (Volgogradan agj) 64 km päivlaskmha orhal vai 100 km avtotedme. «Saratov — Kamišin»-avtotekeskust mäneb koumes kilometras päivlaskmha lidnaspäi. Ümbäravtote om saudud lidnan suves. Volgan Volgogradan vezivaradimen rand om 15 kilometras pohjoižpäivnouzmha i päivnouzmha.

Tobmuz

Kaik viž žilod mülüdas lidnankundha (municipaližhe ühtnikho) Krasnoarmeiskan ližaks. Lidnankundan pind — 412,11 km².

Lidnankundan pämez' om sen Nevondkundan ezimez'. Edeline ezimez' om Aleksei Litvinov, radoi edel vn 2016 redukud. Lidnankundan erigoittud Administracii om likvidiruidud vn 2014 kezakus.

Eläjad

Vn 2010 Venäman rahvahanlugemižen mödhe lidnan i lidnankundan eläjiden lugu oli 24 364 ristitud, rajonan viž ühesandest. Kaikiš suremb lidnan ristitišt oli enamba 25 tuhad eläjid vll 1996−2005 (25 900 rist. vl 1998). Vn 2014 semendkus mülütihe koumed pen't municipališt ühtnikad lidnankundha. Kaik 22 994 ristitud elihe lidnas i 24 884 ristitud kaikes lidnankundas vl 2018.

Rahvahad (2010): venälaižed — 91,7 %, totarlaižed — 1,6 %, ukrainalaižed — 1,5 %, toižed rahvahad — 5,2 %.

Ortodoksižen hristanuskondan phh. Pedroin da Pauloin kaks' jumalanpertid oma saudud lidnas: vanh (vspäi 1992) i uz' (letihe vll 2004−2007).

Krasnoarmeiskan avtosauvomižen kolledž — Venäman rahvahaližen ižandusen i valdkundaližen radnikoičendan akademijan filial om lidnan professionaližen opendusen aluzkundaks.

Galerei

• 
  Edeline tekstil'fabrik vl 2000
• 
  Saudud mozaikpanegel istorine eländpert' (2023)
• 
  Juvelirlauk (2023, istorine eländpert')

Irdkosketused

• Lidnankundan lehtpoled rajonan tobmuden krasnoarmeysk64.ru-saital. (ven.)