Engel's (lidn)

Engel's (ven.: Э́нгельс) om Venäman lidn da lidnankund Saratovan agjan keskuzpalas. Se om agjan kahtenz' lidn eläjiden lugun mödhe, Engel'san rajonan administrativine keskuz da pala, Saratovan suvipäivnouzmaine ezilidn, mülüb Saratovan lidnaglomeracijha.

Engel's
Энгельс

Lidnanznam	Flag
Valdkund	Venäma
Eläjiden lugu (2021)	226,143 ristitud
Pind	113,77 km²
Pämez'	Sergei Gorevskii (2005—)
Telefonkod	+7−8453-xxx-xxx
Avtokod	64, 164
Aigvö	UTC+4 (MSK+1)

Istorii

Eländpunktan aluz om pandud vl 1747 kuti Pokrovskai-slabad (ven.: Покровская слобода) sirdanuzil Poltavan i Har'kovan gubernijoišpäi ukrainalaižil. Žilo sai lidnan statusad Pokrovsk-nimitusenke vl 1918, šingotihe villän torguindal i mecpilindal. Sil-žo aigal saksan nimituz oli Kozakenštadt (saks.: Kosakenstadt) «kozakoiden lidn». Udesnimitihe nügüdläižikš vl 1931 Fridrih Engel's-tedomehen kanzannimen mödhe. Vll 1922−1941 eländpunkt oli Volganrandan saksalaižiden Tazovaldkundan pälidnaks. Vl 1965 avtotesild ühtenzoiti lidnad Saratovanke.

Engel'san ižandusen päsarakod oma transportine mašinansauvomine (elektrovedimed, vagonad, specialine tehnik raudten täht, trolleibusad, specavtod kaičendministrusen täht, varapalad), ühthine mašinansauvomine (tömašinad meblin tehmižen täht, avialadimed, manometrad, instrument, katl'ad, radiatorad), sauvondmaterialiden pästand (raudbetontegesed, kanghatomad materialad, savič, teraztorved, cinkuidud profil', metalližkonstrukcijad), sömtegimišt (maidkombinat, leibänkombinat, konditerine fabrik). Toižed järedad edheotandad oma pezendabutusiden tegim i mebel'fabrik.

Geografijan andmused

Lidn sijadase rajonan lodehes, Volgan Volgogradan vezivaradimen hural randal, 15..40 m korktusil, 30 m ü.m.t. keskmäižel korktusel. Matkad Saratovhasai om koume kilometrad lodeheze orhal, 3 km avtotel vai 20 km raudtel. Toine lähembaine lidn om Marks 49 km pohjoižpäivnouzmha orhal vai 53 km avtotedme. Pokrovsk-Volganrandaline-raudtestancii (ven.: Покровск-Приволжский) radab 20-kilometrižen sarakon suvižes Privolžskii-žilospäi lopstancijaks. Raudtesild ühtenzoitab Volgan randoid päivlaskmha Privolžskii-žilospäi. Järed sodakosmine Engel's-lendimbaz zavodiše ühtes kilometras päivnouzmha lidnan röunaspäi.

Kaik kuz' žilod, sidä kesken Privolžskii-radnikžilo (33 929 rist. vl 2018), mülüdas lidnankundha (municipaližhe ühtnikha) Engel'san ližaks vn 2013 sulakuspäi. Lidnankundan pind — 184,34 km².

Eläjad

Vl 1939 lidnan ristitišt oli 69 tuhad eläjid. Vn 2010 Venäman rahvahanlugemižen mödhe lidnan eläjiden lugu oli 202 419 ristitud, lidnankundan — 204 065 ristitud. Kaikiš suremb lidnan ristitišt oli 227 049 eläjad vl 2020. Kaik 226 176 ristitud elihe lidnas i 264 990 ristitud kaikes lidnankundas vl 2018, rajonan viž kudendest.

Rahvahad (enamba 0,4% vl 2010): venälaižed — 83,2%, totarlaižed — 2,5%, ukrainalaižed — 2,1%, kazahlaižed — 0,9%, armenijalaižed — 0,5%, azerbaidžanlaižed — 0,5%, mordvinalaižed — 0,4%, vaugedvenälaižed — 0,4%, toižed rahvahad — 1,9%, rahvahuden ozutandata — 7,6%.

Profopendusen aluzkundad oma Engel'san mehaniž-tehnologine tehnikum, medkolledž, proftehnologijoiden kolledž, tegimištoliž-ekonomine kolledž i kaks' üläopendusen aluzkundad: Engel'san tehnologine institut (Saratovan valdkundaližen tehnižen universitetan filial) i Volgaveren kooperativine institut (Venäman kooperacijan universitetan filial, Mitišči).

Galerei

• 
  Engel'san rajonan administracijan sauvuz (2017)
• 
  Pühän Stroican kafedraline päjumalanpert', vn 2017 nägu
• 
  Illä-endustajan jumalanpert', vn 2022 nägu
• 
  «Transmaš»-tegimen sauvused vl 2016 (ende raudten radhonused)
• 
  Engel'san tehnologine institut (2022)
• 
  Engel'san kuvagalerei (2016)
• 
  Lapsiden čomamahtoiden škol nomer 1 (2022)
• 
  «Oblaka»-torguimižbobuštuzkeskuz (2022, Pil'ved)
• 
  Lendimed Engel'san aviabazal vl 2019
• 
  Avtotesild Volgas päliči vl 2013

Irdkosketused

• Lidnankundan oficialine sait (engels.me). (ven.)
• Lidnan da rajonan administracijan oficialine sait (engels-city.ru). (ven.)