Kalininsk

Kalininsk (ven.: Кали́нинск) om Venäman lidn da lidnankund Saratovan agjan suvipäivlaskmas. Se om Kalininskan rajonan administrativine keskuz.

Kalininsk
Калининск

Lidnanznam
Valdkund	Venäma
Eläjiden lugu (2021)	14,949 ristitud
Pind	24 km²
Pämez'	Sergei Nugaev (sulaku 2013—)
Telefonkod	+7−84 549-xx-xxx
Avtokod	64, 164
Aigvö	UTC+4 (MSK+1)

Istorii

Ende tahondan nimituz oli Balandinskii-jurt, poimdihe marjoid, saihe met, vahad, kalad, senid, živatoiden karvoid. Eländpunktan aluz om pandud vl 1680, nimitihe jogen mödhe: Balandinskii-lidnut, Baland (ven.: Баланда́). Vl 1895 raudte tuli torguindžilho, saudihe Bokovai-stancijad (ven.: Боковая). Vspäi 1897 oli Baland-slabadaks. Kätihe radnikžiloks vl 1939. Žilo sai lidnan statusad vl 1962 udenke nügüdläiženke nimitusenke, nevondkundaližen valdkundan Mihail Kalinin-šingotajan kanzannimen mödhe. Kalinin edesti žilon raudtedepon i Rusttan armijan saldatoiden suimil vn 1919 20. päiväl heinkud.

Kalininsk šingotase äiprofil'žel himižel tegimel, sauvondmujuiden tegimel, sömtegimištol (lihakombinat, oludentegim).

Geografijan andmused

Lidn sijadase Baland-jogen oiktal randal tobjimalaz (ven.: Баланда́ 164 km pitte, Don-jogen hurapol'ne bassein), 150 m ü.m.t. keskmäižel korktusel.

Matkad Saratovhasai om 103 km päivnouzmha orhal, 114 km avtotedme vai 130 km raudtedme. Lähembaižed lidnad oma Žirnovsk (Volgogradan agj) 61 km suvhe orhal vai 84 km avtotel, i Atkarsk 55 km pohjoižpäivnouzmha orhal, 78 km avtotedme vai raudtedme. Kalininsk-Saratovskii-lopraudtestancii radab lidnan päivlaskmas.

Klimat om ven kontinentaline kuivahk. Voden keskmäine lämuz om +5,6 C°, kezakun-elokun +19,2..+21,0 C°, tal'vkun-uhokun −6,9..−10,8 C°. Paneb sadegid 459 mm vodes, enamba kezakus-kül'mkus (43..53 mm kus), vähemba uhokus-keväz'kus (22..24 mm kus).

Tobmuz

Kalininsk om lidnankundan üks'jäižeks eländpunktaks.

Lidnankundan tobmuden pämez' om sen Deputatoiden nevondkundan ezimez'. Lidnan administracii om likvidiruidud vn 2014 redukus, rajonan administracii tegeb sen velgusidme.

Eläjad

Vn 2010 Venäman rahvahanlugemižen mödhe lidnan eläjiden lugu oli 16 441 ristitud, rajonan pol', vn 2021 — 14 949 ristitud. Kaik 15 841 eläjad oli lidnas vl 2017. Kaikiš suremb lidnan ristitišt oli 18..20 tuhad eläjid vll 1979−2009 (20 100 rist. vll 1998−2001).

Rahvahad (2010): venälaižed — 91,2 %, ukrainalaižed — 3,8 %, armenijalaižed — 1,1 %, toižed rahvahad — 3,9 %.

Ortodoksižen hristanuskondan ph. Ol'gan jumalanpert' om avaitud lidnas vl 1989 enččen bankan i torgovanan pertiš. Islaman mečet' radab toštmižsaudud vanhas puižes pertiš vspäi 1994.

Lapsiden opendusen aluzkundad oma severz'-se päivkodid, kaks' keskškolad (nomer 1 i 2), lapsiden sädamižen pert', čomamahtoiden škol, sportškol. Kalininskan agrobiznesan tehnikum om lidnan professionaližen opendusen aluzkundaks.

Irdkosketused

• Lidnan da sen rajonan oficialine sait (kalininsk.sarmo.ru). (ven.)
• Lidnan informacine sait (kalininsk.ru). (ven.)