Balašov (lidn)

Balašov (ven.: Балашо́в) om Venäman lidn, lidnankund da raudtesol'm Saratovan agjan päivlaskmas. Se om agjan nellänz' lidn eläjiden lugun mödhe, Balašovan rajonan administrativine keskuz.

Balašov
Балашов

Lidnanznam	Flag
Valdkund	Venäma
Eläjiden lugu (2021)	74,057 ristitud
Pind	70,81 km²
Pämez'	Mihail Vinenkov (reduku 2023—)
Telefonkod	+7−84 545-xx-xxx
Avtokod	64, 164
Aigvö	UTC+4 (MSK+1)

Istorii

Eländpunktan aluz om pandud 17. voz'sadal kuti Vasilii Balaškan futor. Oli küläks i imperatorižen pert'kulun Balašovo-žiloks (ven.: дворцовое село Балашово) vspäi 1768. Sai makundan lidnan statusad nügüdläiženke nimitusenke vn 1780 kül'mkus. Vll 1954−1957 oli Balašovan agjan keskuseks.

Balašov šingotase tekstilinkombinatal (sintetižed kanghad), sömtegimištol (sahar, jauh, leibäntegesed, makaronad, villän i voikul'turoiden varadand, kanafabrik), sauvondmaterialiden pästandal (beton i raudbetontegesed), elektroizoläcijan edheotand šoidkiven alusel, mugažo vedimdepo, laps'sobiden fabrik i kengiden edheotand ratas lidnas.

Geografijan andmused

Lidn sijadase rajonan keskuzpalan päivlaskmas, Hopr-jogen üläjoksmusen hural randal (ven.: Хопёр, Donan hura ližajogi), 140 m ü.m.t. keskmäižel korktusel.

Hopr-jogi om lidnan pohjoižröunaks, «Voronež — Saratov»-avtote om suviröunaks. Kaik koume raudtestancijad ratas lidnas: Balašov-1, Balašov-2, Balašov-Passažirine. Balašov-sodalendimport i sodalidnut oma vides kilometras suvipäivnouzmha lidnaspäi.

Matkad Voronežan agjan röunhasai om 35 km suvipäivlaskmha, Saratovhasai om 200 km päivnouzmha orhal, 212 km avtotel vai 300 km raudtel. Lähembaižed lidnad oma Borisoglebsk i Povorino (Voronežan agj) 75 km päivlaskmha-suvipäivlaskmha orhal, 90 km avtotedme vai raudtedme, Arkadak 50 km pohjoižhe-pohjoižpäivnouzmha orhal, 59 km avtotel vai raudtel, i Kalininsk 91 km päivnouzmha orhal, 98 km avtotedme vai 300 km raudtedme.

Tobmuz

Balašov om lidnankundan (municipaližen ühtnikan) üks'jäižeks eländpunktaks. Läz 20 lidnanlaptad. Lidnankundan pind — 70,81 km².

Lidnankundan tobmuden pämez' om sen Nevondkundan ezimez'. Valitas Nevondkundan 20 deputatad videks vodeks. Edeline Nevondkundan ezimez' om Vladimir Jakubovič (sügüz'ku 2013 — uhoku 2023). Edeližed lidnan Administracijan pämehed oma Sergei Aleksandrov (eloku 2014 — reduku 2018), Sergei Kolesnikov (eloku 2012 — eloku 2014). Lidnan erigoittud Administracii om likvidiruidud vn 2023 sulakus, likvidator om Vladimir Jakubovič (kül'mku 2018 — sulaku 2023).

Eläjad

Vl 1939 48 tuhad ristituid elihe lidnas. Vn 2010 Venäman rahvahanlugemižen mödhe lidnan eläjiden lugu oli 82 227 ristitud, rajonan koume nelländest, vn 2021 — 74 057 ristitud. Kaik 77 391 eläjad oli lidnas vl 2017. Kaikiš suremb lidnan ristitišt oli 95..99 tuhad eläjid vll 1982−2006 (99 tuh. rist. vl 1987 i 98 330 rist. vl 2002).

Rahvahad (2010): venälaižed — 96,4 %, ukrainalaižed — 1,3 %, toižed rahvahad — 2,3 %.

Ortodoksižen hristanuskondan seičeme pühäpertid oma kaičenus i saudud lidnas: Mikoi-arhangelan kafedraline päjumalanpert' (1908, edel Surt sodad baptizman pühäpert'), nell' jumalanpertid i kaks' časounäd. Islaman mečet' om avaitud.

Professionaližen opendusen aluzkundad oma Balašovan maižandusen mehanizacijan tehnikum, privatine Balašovan biznesan da tehnologijoiden kooperativine tehnikum, Saratovan agjan bazine medicinine kolledž — Balašovan filial, Saratovan čomamahtoižen kolledžan filial, Saratovan valdkundaližen universitetan Balašovan filial, Balašovan lendandškol — Krasnodaran sodaaviacijan institutan fakul'tet.

Galerei

• 
  Kodirandantedištandmuzei (2005)
• 
  Mikoi-arhangelan kafedraline päjumalanpert', vn 2018 nägu
• 
  Jauhtegim nomer 7 vl 2014
• 
  Saratovan valdkundaližen universitetan Balašovan filial (2014)
• 
  Balašov I-päraudtestancijan sauvuz vl 2014

Irdkosketused

• Lidnan tobmuden oficialine sait (balashovadmin.ru). (ven.)