Nelidovo

Nelidovo (ven.: Нели́дово) om Venäman lidn da lidnankund Tverin agjan suvipäivlaskmas. Se om Nelidovon lidnümbrikon (edel vn 2018 sulakud — rajonan) administrativine keskuz.

Nelidovo
Нелидово

Lidnanznam	Flag
Valdkund	Venäma
Eläjiden lugu (2020)	18,102 ristitud
Pind	19,35 km²
Telefonkod	+7−48 266-xx-xxx
Avtokod	69
Aigvö	UTC+3 (MSK+0)

Istorii

Nügüd'aigaižen eländpunktan aluz om pandud Nelidovo-raudtestancijha vl 1901. Se om nimitadud amuižen bajarišton rodun mödhe, kudamban Sergei Nelidov-ezitai andoi umad maksuta sauvomha raudted. Suren sodan aigan žilo oli okkupiruidud nacistoil vn 1941 redukus, päzutihe žilod vn 1942 25. vilukud. Sid' žilo oli muretud sodategoiden tagut rajonas, ned jätksiba vn 1943 keväz'kuhusai. Udessaudihe Nelidovod täuzin ezmäižil sodanjäl'ghižil vozil. Nelidovo-radnikžilo sai lidnan statusad vl 1949.

Nelidovon ižandusen päsarakod oma mašinoidensauvomine (pressuindmašiništ, metizad, somustoittud tegesed) i mecan ümbriradmine, mugažo plastmasstegim da omblendfabrik ratas lidnas. Vozil 1934−1996 buran hilen samine tegihe lidnas.

Geografijan andmused

Lidn sijadase Mežanjogen randal (ven.: Межа́ vai Мёжа 259 km pitte, Päivlaskmaižen Dvinan hura ližajogi), Valdai-ülüden suves, 200 m ü.m.t. keskmäižel korktusel. Matkad Tverihesai om 230 km pohjoižpäivnouzmha. Lähembaižed järedad lidnad oma Ržev 105 km päivnouzmha raudtedme vai «Baltii»-avtotedme i Velikije Luki 150 km päivlaskmha raudtedme vai avtol. Lähembaižed lidnad oma Belii 50 km suvhe i Päivlaskmpol'ne Dvin 50 km päivlaskmha.

Ühtennimine Nelidovo-raudtestancii sijadase «Moskv — Rig»-keskustal. «Baltii»-trass (M9-avtote) mäneb vides kilometras pohjoižhe lidnaspäi.

Tobmuz

Nelidovo oli lidnankundan üks'jäižeks eländpunktaks, sen pind oli 19,35 km².

Lidnan jäl'gmäine pämez' oli Zinaida Bombina vn 2013 sügüz'kuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 22 896 ristitud, rajonan (nüg. lidnümbrik) koume nelländest. Kaik 19 400 eläjad oli lidnas vl 2017. Kaikiš suremb lidnan ristitišt oli 30 044 eläjad vl 1989.

Rahvahad (2010): venälaižed — 95,1 %, čiganalaižed — 2,5 %, toižed rahvahad — 2,4 %.

Ortodoksižen hristanuskondan viž pühäpertid oma kaičenus i saudud lidnas: Jumalanmaman Balikinon jumalaižen jumalanpert' (1970, om avaitud vspäi 1989), ph. Joann Kronštadtalaižen sur' jumalanpert' (om sauvomas vspäi 1999), kodijumalanpert', kaks' časounäd. Niiden ližaks Eläban Eziauguižen Stroican jumalanpert' ei ole kaičenus (oli saudud vll 1820−1848).

Nelidovon kolledž om lidnan professionaližen opendusen aluzkundaks.

Galerei

• 
  Motokrossan trass (2008)
• 
  Škol nomer viž (2014)
• 
  Nelidovon gidropressiden tegim vl 2011
• 
  Kul'turkeskuz — kaivajiden kul'turpert'kulu (2010)
• 
  Nelidovo-päraudtestancijan sauvuz vl 2012

Irdkosketused

• Lidnan da lidnümbrikon oficialine sait (nelidovo.su). (ven.)