Staric

Staric (ven.: Ста́рица) om Venäman lidn Tverin agjan suvipalas. Se om Starican ümbrikon (edel vn 2022 sulakud — rajonan) administrativine keskuz da pala.

Staric
Старица

Lidnanznam
Valdkund	Venäma
Eläjiden lugu (2021)	6,938 ristitud
Pind	7,65 km²
Telefonkod	+7−48 263-xx-xxx
Avtokod	69
Aigvö	UTC+3 (MSK+0)

Istorii

Eländpunktan aluz om pandud Tverin Mihail Jaroslavič-ruhtinasen käskön mödhe vl 1297 kuti Gorodesk-lidnuz (mž. Gorodok) Staric-jogen randal. Vozil 1505−1566 oli Starican ruhtinazkundan keskuseks, sil aigalpäi nimitaškanzihe lidnad nügüdläižikš.

Staric šingotase mehanižel tegimel («Rodina»-tedotehmižühtelmaz, palad lendimiden täht) i mašiništonsauvomižen edheotandal (avtokonorüden palad). Ende omblendfabrik i mechoz radoiba mugažo.

Geografijan andmused

Lidn sijadase rajonan keskuzpalan suvipäivnouzmas, Volg-jogen muugotil randoil, 175 m ü.m.t. keskmäižel korktusel. Avtotesild ühtenzoitab randoid vspäi 1963.

Matkad Tverihesai om 65 km pohjoižpäivnouzmha avtol. Lähembaižed lidnad oma Ržev i Zubcov vižkümne kilometrad suvipäivlaskmha avtoteidme. Staric-raudtestancii sijadase 12 km päivlaskmha lidnaspäi avtotedme.

Tobmuz

Staric oli lidnankundan üks'jäižeks eländpunktaks. Lidnankundan pind oli 7,65 nellikkilometrad.

Edeline lidnan pämez' oli Svetlana Kalitkina vn 2017 redukuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 8 607 ristitud, rajonan koumandez, vn 2021 — 6 938 ristitud. Kaik 7 872 eläjad oli lidnas vl 2017. Kaikiš suremb lidnan ristitišt oli enamba ühesad tuhad vozil 1989−2009 (9 800 rist. vl 1998).

Rahvahad (enamba 0,4 % vl 2021): venälaižed — 77,7 %, ukrainalaižed — 0,7 %, čečenalaižed — 0,5 %, toižed rahvahad — 2,3 %, rahvahuden ozutandata — 18,8 %.

Ortodoksižen hristanuskondan 16 pühäpertid oma kaičenus paloin vai täuzin: Starican Emäganpäivän mez'jumalankodin kompleks (12. voz'sadaspäi: kaksin päjumalanpertid, jumalanpertid, časounäd), phh. Borisan i Gleban päjumalanpert', kuz' jumalanpertid, koume časounäd. Niiden ližaks koume jumalanpertid ei ole kaičenus.

Lapsiden opendusen aluzkundad oma koume päivkodid (nomer 2, 3, 4), keskškol (kaks' korpusad), čomamahtoiden škol, sportškol. Starican kolledž om lidnan professionaližen opendusen aluzkundaks.

Galerei

• 
  Lidnan administracijan pert' (2020)
• 
  Starican Emäganpäivän mez'jumalankodi i avtotesild Volgas päliči, vn 2018 nägu
• 
  Torguindkeskuz vl 2020
• 
  Starican pedagogine kolledž vl 2019 (ende hengeline škol)
• 
  Starican kodirandantedištandmuzei (2021)

Irdkosketused

• Lidnan da Starican ümbrikon tobmuden sait (старицкий-район.рф). (ven.)
• Lidnan turizman sait (staritsa.net). (ven.)