Bologoje

Bologoje (ven.: Болого́е) om Venäman lidn da raudtestancii Tverin agjan lodehes. Se om Bologojen rajonan i Bologojen lidnankundan administrativine keskuz.

Bologoje
Бологое

Lidnanznam	Flag
Valdkund	Venäma
Eläjiden lugu (2021)	20,234 ristitud
Pind	122,69 km²
Pämez'	Igor' Gavrilov (tal'vku 2008—)
Telefonkod	+7−48 238-xx-xxx
Aigvö	UTC+3

Istorii

Eländpunkt mainitase ezmäižen kerdan vl 1495 kuti Bologoje-külä Bologojen järvenno Uz'lidnan Derevskai-agjan aigkirjas. Vl 1851 «Moskv — Piter»-raudte tuli Bologojehe, i külä šingotaškanzihe. Saudihe äi edheotandoid holitamha raudted, sikš miše Bologoje-Moskovskoje-stancii sijadase raudten keskel. Vn 1917 3. päiväl kezakud ühtištadihe Bologoje-žilod Bologoje-külänke da anttihe lidnan statusad Venäman Pordaigaližen ohjastusen käskön mödhe, lidn mülüi Valdain makundha. Toižen mail'man sodan aigan lidn oli alištunu bombardiruindale 527 kerdad vn 1941 heinkuspäi kut znamasine raudtesol'm, eriližešti vn 1943 13.-23. keväz'kud (tacihe 1811 bombad), no ei olend okkupiruidud.

Bologoje šingotase raudteinfrastruktural i raudtespecmašinoiden kohendusel, torvarmaturan tegimel, mebel'fabrikal, sömtegimištol (maidtegim, leibän edheotandad).

Geografijan andmused

Lidnan sijaduz rajonas i agjas vn 2006 kartal

Lidn sijadase rajonan keskuzpalan suves, Valdai-ülüden pohjoižpäivnouzmaižil pautkil 150..200 m korktusil, 175 m ü.m.t. keskmäižel korktusel, Bologojen järven randal (7,87 km², Olhav-jogen bassein), i Orgizkovo-järv om lidnan pohjoižes.

Matkad Tverišpäi om 164 km lodeheze. Lähembaižed lidnad oma Višnii Voločok 50 km suvipäivnouzmha avtotedme, Udoml' 60 km päivnouzmha raudtedme, i Uz'lidnan agjan Boroviči 56 km pohjoižhe orhal vai 80 km avtol, Okulovk 70 km lodeheze orhal vai 90 km avtol, Valdai 48 km päivlaskmha orhal vai 66 km M10-trassadme.

Klimat om ven kontinentaline. Voden keskmäine lämuz om +4,4 C°, kezakun-elokun +15,4..+17,5 C°, tal'vkun-uhokun −6,3..−8,8 C°. Ekstremumad oma −46,5 C° (viluku) i +35,8 C° (heinku, eloku). Kezaaigan minimum om −2,6 C° (kezaku), tal'vaigan maksimum om +9,2 C° (tal'vku, uhoku). Ei voi panda halad heinkus vaiše (minimum +0,9 C°). Paneb sadegid 642 mm vodes, enamba kezakus-elokus (74..85 mm kus), vähemba uhokus-sulakus (33..37 mm kus).

Tobmuz

Kaik ühesa pen't küläd da Platiščenk-raudtestancii (ven.: Платищенка, 1. rist. vl 2010) mülüdas lidnankundha Bologojen ližaks. Bologoje jagase koumeks territorialižeks rajonaks: Tegimen, Päivlaskmaine, Järventagaine.

Lidnankundan tobmuden pämez' om sen Administracijan pämez'. Lidnan Deputatoiden nevondkund om likvidacijan pordhal vn 2023 tal'vkuspäi rajonan toižetamižen tagut ümbrikoks, sen jäl'gmäine ezimez' oli Andrei Matveev (reduku 2018 — tal'vku 2023).

Eläjad

Vn 2010 Venäman rahvahanlugemižen mödhe lidnan eläjiden lugu oli 23 494 ristitud, lidnankundan — 23 660 ristitud, se oti enamba pol't rajonan ristitištos. Vn 2021 rahvahanlugemižen mödhe lidnan ristitišt oli 20 234 eläjad. Vl 2017 kaik 21 425 eläjad oli lidnas i 21 524 ristitud kaikes lidnankundas. Kaikiš suremb lidnan ristitišt oli 35 926 eläjad vl 1989.

Ortodoksižen hristanuskondan kuz' pühäpertid oma kaičenus i saudud lidnas: koume jumalanpertid i koume časounäd. Niiden ližaks kivine Jumalanmaman Katken jumalanpert' oli vll 1885−1932, poukahtihe.

Lapsiden opendusen aluzkundad oma päivkodid, nell' keskškolad (nomer 1, 10, 11, 12), kaks' aluzškolad (nomer 55, 57), čomamahtoiden škol, sportškol. Bologojen kolledž om lidnan professionaližen opendusen aluzkundaks.

Galerei

• 
  Sportpert'kulu (2017)
• 
  Eläban Eziauguižen Stroican jumalanpert', vn 2017 nägu
• 
  «Venäman raudted»-kompanijan kontor (2013)
• 
  Škol nomer 11 (2017)
• 
  Bologoje-Moskovskoje-päraudtestancijan (vai Bologoje-1) ühthine nägu vl 2018

Irdkosketused

• Lidnan kodirandantedištandan sait (bologoecity.narod.ru). (ven.)