Päivlaskmpol'ne Dvin

Päivlaskmpol'ne Dvin (ven.: За́падная Двина́) om Venäman lidn da lidnankund Tverin agjan suvipäivlaskmas. Se om Päivlaskmpol'žen Dvinan ümbrikon (edel vn 2020 semendkud — rajonan) administrativine keskuz.

Päivlaskmpol'ne Dvin
Западная Двина

Valdkund	Venäma
Eläjiden lugu (2020)	7,783 ristitud
Pind	12,66 km²
Telefonkod	+7−48 265-xx-xxx
Avtokod	69
Aigvö	UTC+3 (MSK+0)

Istorii

Eländpunktan aluz om pandud Päivlaskmpol'ne Dvin-raudtestancijha vl 1900, sijadase «Moskv — Rig»-keskustal. Nimitihe stancijad jogen mödhe, se sai radnikžilon statusad vl 1927. Radnikžilo sai lidnan statusad vl 1937.

Päivlaskmpol'ne Dvin-lidn šingotase mecan ümbriradmižel da turizmal, mugažo maidtegim radab.

Geografijan andmused

Lidn sijadase Päivlaskmaižen Dvinan randal (se-žo Daugav alajoksmuses), Valdai-ülüden suvipäivlaskmas, 185 m ü.m.t. keskmäižel korktusel. Matkad Tverihesai om läz 250 km pohjoižpäivnouzmha orhal. Lähembaižed lidnad oma Nelidovo 50 km päivnouzmha raudtel vai avtol, Toropec 38 km lodeheze orhal i Andreapol' 50 km pohjoižhe avtotedme, järed lidn — Velikije Luki 100 km päivlaskmha «Baltii»-trassadme (M9).

Päivlaskmpol'ne Dvin oli lidnankundan üks'jäižeks eländpunktaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 9 845 ristitud, rajonan koume videndest. Kaikiš suremb lidnan ristitišt oli 11 556 eläjad vl 1989. Kaik 8 249 eläjad oli lidnas vl 2017.

Ortodoksižen hristanuskondan nell' pühäpertid oma avaitud lidnas: Mikulai-čudonsädajan jumalanpert' (letihe vll 2004−2008) i koume časounäd (oma saudud 2000-nzil vozil).

Päivlaskmpol'žen Dvinan tehnologine kolledž om lidnan professionaližen opendusen aluzkundaks.

Edeline lidnan pämez' oli Aleksandr Borovkov vn 2013 sügüz'kuspäi.

Irdkosketused

• Lidnan da sen ümbrikon tobmuden sait (zapdvina.ru). (ven.)
• Enččen lidnankundan tobmuden sait (gorodzapdvina.zapdvina.ru). (ven.)