Lihoslavl'

Lihoslavl' (ven.: Лихосла́вль) om Venäman lidn da raudtesol'm Tverin agjan keskuses. Se om Lihoslavlin ümbrikon (edel vn 2021 sulakud — rajonan) administrativižeks keskuseks.

Lihoslavl'
Лихославль

Lidnanznam	Flag
Valdkund	Venäma
Eläjiden lugu (2021)	11,017 ristitud
Pind	16 km²
Telefonkod	+7−48 261-xx-xxx
Avtokod	69
Aigvö	UTC+3 (MSK+0)

Istorii

Lihoslavl' -usadib mainitase ezmäižen kerdan revizijan nimikirjutesiš vl 1816. Lähevenui Ostaškovo-külä mainitase ezmäižen kerdan Novotoržokan makundan aigkirjas vl 1624. Ühtištadihe raudtestancijad Ostaškovo-külänke vl 1907 udenke nügüdläiženke nimenke erištamha Ostaškov-lidnaspäi. Lihoslavl' sai lidnan statusad vl 1925. Vozil 1937−1939 se oli Karjalan rahvahaližen ümbrikon administrativižeks keskuseks.

Lihoslavlin ižandusen päsarakod oma elektrotehnine tegimišt (pidatezarmatur) da sömtegimišt (leibän edheotand), mugažo avtoradiatoriden tegim, čomamahtkeramiktegesiden tegim i söteližadusiden edheotand ratas lidnas.

Geografijan andmused

Lidnan sijaduz ümbrikos i agjas vn 2006 kartal

Lidn sijadase rajonan suves, Kavanjogen oiktal randpolel (kahtes kilometras, ven.: река Кава, Tverc-jogen hura ližajogi, Volgan bassein), 170 m ü.m.t. keskmäižel korktusel. Pen' Čerömuški-jogi lankteb Lihoslavlin järvhe ani lidnan päivnouzmaižen röunan taga, järv om ratud vl 1906.

Matkad Tverin röunhasai om nell'kümne kilometrad lodeheze orhal vai 45 km avtotedme. Lähembaine lidn om Toržok 35 km päivlaskmha orhal.

Tobmuz

Kaik koume pen't eländpunktad mülüiba lidnankundha Lihoslavlin ližaks: Jubileinii-žilo (246 rist. vl 2010), MPMK-eländpunkt (162 rist. sil-žo vodel) i Čelnovk-külä (65 eläjad). Lidnankundan pind oli 16,15 nellikkilometrad.

Enččen lidnankundan tobmuden pämez' oli sen Administracijan pämez'. Lidnan Administracii om likvidiruidud vn 2022 heinkus. Jäl'gmäine Administracijan pämez' oli El'vira Baranova (kül'mku 2018 — heinku 2022), edeližed — Valerija Leonova (reduku 2016 — kül'mku 2018), Larisa Koževnikova (radoi vn 2016 redukuhusai). Lidnankundan Deputatoiden nevondkund om pästtud radmaspäi vn 2021 redukuspäi, organizacijan likvidator oli Olesä Smirnova. Nevondkundan ezimehed oliba Maksim Smirnov (sulaku 2019 — reduku 2021), Jevgenii Kotov (radoi vn 2019 sulakuhusai).

Eläjad

Vn 2010 Venäman rahvahanlugemižen mödhe lidnan eläjiden lugu oli 12 257 ristitud, lidnankundan — 12 730 ristitud, rajonan ristitišton nell' ühesandest, vn 2021 lidnan — 11 017 ristitud. Kaik 11 790 eläjad oli lidnas vl 2017. Kaikiš suremb lidnan ristitišt oli enamba 13 tuhad eläjid vozil 1989−2001 (13 449 rist. vl 1989).

Ortodoksižen hristanuskondan Pühän Jumalanmaman Emäganpäivän pühäpert' (1885−1899) om avaitud lidnas.

Lapsiden opendusen aluzkundad oma viž nimitadud päivkodid, koume keskškolad (nomer 1, 2, 7), čomamahtoiden škol, sportškol. Kalašnikovo-žilon kolledžan Lihoslavlin palakund i Toržokan pedagogižen kolledžan filial oma lidnan professionaližen opendusen aluzkundoikš.

Transport

Lihoslavl' -raudtestancii radab «Moskv — Piter»-raudtel vspäi 1850 (vll 1897−1902 Novotoržskai, edeline nimi oli Ostaškovo), sarak Toržokha om olmas vspäi 1870. Ezilidnelektrojonused ühtenzoittas lidnad Bologojenke, Tverinke i Moskvanke.

Kaks'kümnekilometrine sarak tuleb lidnha suves «Moskv — Piter»-avtotespäi.

Galerei

• 
  Lihoslavlin rajonan administracijan sauvuz (2010)
• 
  Jumalanmaman Emäganpäivän pühäpert', vn 2021 nägu
• 
  Karjalan rahvahaline kodirandantedištandmuzei vl 2021
• 
  Škol nomer seičeme (2010)
• 
  Lihoslavl' -päraudtestancii vl 2006

Irdkosketused

• Lidnan da sen ümbrikon tobmuden sait (lihoslavl69.ru). (ven.)
• Enččen lidnankundan tobmuden sait (gorod.lihoslavl69.ru). (ven.) (om täuttud vn 2021 tal'vkuhusai)